2003-yilda gʻoʻzani navlar boʻyicha joylashtirish, navlarni yangilash hamda paxta xomashyosi yetishtirish hajmlari toʻgʻrisida (97-son)

21.02.2003

Oʻzbekiston Respublikasi Vazirlar Mahkamasining

qarori

Vazirlar Mahkamasining 2003-yil 19-fevraldagi 93-son qaroriga muvofiq hamda mintaqalar yer-suv resurslarining holatini hisobga olgan holda 2003-yilda gʻoʻzaning rayonlashtirilgan va istiqbolli navlarini oqilona joylashtirish chora-tadbirlarini amalga oshirish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi, Tashqi iqtisodiy aloqalar agentligi, “Oʻzpaxtasanoat” uyushmasining 2003-yil hosili paxta xomashyosi yetishtirish hajmlari, gʻoʻzaning rayonlashtirilgan va istiqbolli navlarini oqilona joylashtirishga doir paxta yetishtiruvchi xoʻjaliklar va tayyorlov tashkilotlari oʻrtasida tuzilgan kontraktatsiya shartnomalarini umumlashtirish asosidagi 1 va 2-ilovalarga muvofiq takliflari qabul qilinsin.

2. “Oʻzpaxtasanoat” uyushmasi, Oʻzbekiston Respublikasi Qishloq va suv xoʻjaligi vazirligi:

2003-yil 25-fevralgacha urugʻlik paxtani tozalashni, 1-martgacha esa 3-ilovaga muvofiq miqdorda ekiladigan chigitni tayyorlab qoʻyishni tugallasinlar, shuningdek urugʻchilik korporatsiyalari va kompaniyalarini tuksizlantirish uchun chigit bilan taʼminlasinlar;

yuqori sifatli urugʻlik chigit xoʻjaliklarga faqat dorilangan holda va sertifikatlar mavjud boʻlgan taqdirda, gʻoʻza seleksiya navlarining tasdiqlangan joylashtirilishiga qatʼiy muvofiq ravishda berilishini taʼminlasinlar;

2003-yil 25-fevralgacha 4-ilovaga muvofiq urugʻlik chigitni viloyatlararo tashishni tugallasinlar.

3. Oʻzbekiston Respublikasi Qishloq va suv xoʻjaligi vazirligi, “Oʻzpaxtasanoat” uyushmasi, Qoraqalpogʻiston Respublikasi Vazirlar Kengashi, viloyatlar hokimliklari:

paxta yetishtiruvchi xoʻjaliklarning agrotexnologiya va ekinlarning tasdiqlangan sxemalariga muvofiq chigit ekish normalariga qatʼiy rioya etishlarini taʼminlasinlar;

navlarni joylashtirishning tasdiqlangan tartibiga rioya qilinishi ustidan nazoratni taʼminlasinlar, tumanlarda tavsiya qilingan gʻoʻza navlarining ikkitadan ortiq, xoʻjaliklarda esa — bittadan ortiq navi ekilishiga yoʻl qoʻymasinlar;

2003-yil 10-martgacha urugʻlik paxta uchun chigit ekiladigan xoʻjaliklar roʻyxatini tanlov asosida qayta koʻrib chiqsinlar;

gʻoʻzaning yangi, istiqbolli va rayonlashtirilgan navlarini koʻpaytiruvchi elita-urugʻchilik xoʻjaliklari ishini alohida nazoratga olsinlar, ushbu navlarni yuqori unumdor va suv bilan taʼminlangan yerlarga eksinlar, agrotexnika va urugʻchilikka doir tadbirlarni yuqori darajada oʻtkazsinlar.

Gʻoʻzaning yangi navlarini sinash faqat ilmiy-tadqiqot institutlarining eksperimental bazalarida, bazaviy xoʻjaliklarda, yangi navlarni dastlabki koʻpaytirish xoʻjaliklarida hamda davlat nav sinash uchastkalarida olib borilsin.

4. 2003-yil mavsumi uchun gʻoʻzaning seleksiya navlari istiqbolligi va tegishli ravishda ragʻbatlantirilishi boʻyicha 5-ilovaga muvofiq uch guruhga boʻlinishi belgilansin.

5. “Oʻzkimyosanoat” va “Oʻzqishloqxoʻjalikkimyo” aksiyadorlik kompaniyalari, “Oʻzpaxtasanoat” uyushmasi, Oʻzbekiston Respublikasi Qishloq va suv xoʻjaligi vazirligi, Tashqi iqtisodiy aloqalar agentligi urugʻlik chigit paxta yetishtiruvchi xoʻjaliklarga oʻz vaqtida yetkazib berilishi uchun zarur miqdor va assortimentdagi urugʻlik chigitni dorilash vositalari “Paxtasanoat” hududiy birlashmalariga oʻn kun muddatda yetkazib berilishini taʼminlasinlar.

Oʻzbekiston Respublikasi Qishloq va suv xoʻjaligi vazirligi (“Oʻzdavurugʻliknazorat” markazi), “Oʻzpaxtasanoat” uyushmasi, “Oʻzqishloqxoʻjalikkimyo” aksiyadorlik kompaniyasi ekiladigan urugʻlik chigitni dorilash sifati ustidan kundalik nazorat oʻrnatsinlar, xoʻjaliklarga qogʻoz qoplarga joylanmagan va dorilanmagan chigitlar berilishiga yoʻl qoʻymasinlar.

6. “Oʻzkimyosanoat” hamda “Oʻzqishloqxoʻjalikkimyo” aksiyadorlik kompaniyalari mineral oʻgʻitlarni birinchi navbatda urugʻchilik xoʻjaliklariga hamda ilmiy muassasalarga oziqli moddalar boʻyicha qatʼiy mutanosiblikda va tovar paxta yetishtiruvchi xoʻjaliklar uchun belgilangan meʼyorlardan 10 foiz ortiq miqdorda yetkazib bersinlar.

7. Quyidagilar:

paxta yetishtiruvchi xoʻjaliklarni bahorgi dala ishlarini amalga oshirish uchun oʻz vaqtida qishloq xoʻjaligi texnikasi bilan taʼminlash va ularga ehtiyot qismlar yetkazib berish uchun masʼuliyat Oʻzbekiston Respublikasi Qishloq va suv xoʻjaligi vazirligi, “Oʻzagromashservis” uyushmasi, “Oʻzqishloqxoʻjalikmash-xolding” kompaniyasi, Qoraqalpogʻiston Respublikasi Vazirlar Kengashi, viloyatlar hokimliklariga;

xoʻjaliklarga, mashina-traktor parklariga yonilgʻi-moylash materiallari uzluksiz berilishini taʼminlash uchun masʼuliyat “Oʻzbekneftgaz” milliy-xolding kompaniyasiga yuklansin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari N.S. Yusupov hamda Oʻzbekiston Respublikasi Prezidentining Davlat maslahatchisi I.H. Joʻrabekov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2003-yil 21-fevral,

97-son

Vazirlar Mahkamasining 2003-yil 21-fevraldagi 97-son qaroriga 1-ILOVA

2003-yilda paxta xomashyosi yalpi hosilining

PROGNOZ KOʻRSATKIChLARI

Vazirlar Mahkamasining 2003-yil 21-fevraldagi 97-son qaroriga 2-ILOVA

Oʻzbekiston Respublikasi boʻyicha 2003-yil hosili uchun gʻoʻzaning roʻyxatdan oʻtkazilgan va istiqbolli navlarini

joylashtirish

Vazirlar Mahkamasining 2003-yil 21-fevraldagi 97-son qaroriga 3-ILOVA

2003-yil hosili uchun ekiladigan urugʻlik chigit tayyorlash boʻyicha

TOPShIRIQ

Vazirlar Mahkamasining 2003-yil 21-fevraldagi 97-son qaroriga 4-ILOVA

2001-yil hosili uchun urugʻlik chigitni viloyatlararo yetkazib berish boʻyicha

TOPShIRIQ

Vazirlar Mahkamasining 2003-yil 21-fevraldagi 97-son qaroriga 5-ILOVA

Gʻoʻzaning asosiy seleksiya navlari istiqbolliligiga va iqtisodiy ragʻbatlantirilishiga koʻra

GURUHLANIShI