2002-yil boshoqli don ekinlari hosilini yigʻishtirib olishga doir tashkiliy chora-tadbirlar toʻgʻrisida (136-son)

23.04.2002

Oʻzbekiston Respublikasi Vazirlar Mahkamasining

qarori

Boshoqli don ekinlari hosili oʻz vaqtida va sifatli yigʻishtirib olinishini hamda davlat resurslari uchun don sotish boʻyicha kontraktatsiya shartnomalari bajarilishini taʼminlash maqsadida Vazirlar Mahkamasi qaror qiladi:

1. Don hosilini oʻz vaqtida va sifatli yigʻishtirib olishni tashkil etish va amalga oshirish uchun shaxsiy javobgarlik Qoraqalpogʻiston Respublikasi Vazirlar Kengashi raisi, viloyatlar hokimlari, Oʻzbekiston Respublikasi Qishloq va suv xoʻjaligi vazirligi, “Oʻzagromashservis” uyushmasi va uning mashina-traktor parklari hududiy birlashmalari rahbarlari zimmasiga yuklansin.

2. Oʻzbekiston Respublikasi Qishloq va suv xoʻjaligi vazirligi, “Oʻzdonmahsulot” davlat-aksiyadorlik korporatsiyasi, “Oʻzagromashservis” uyushmasi, Qoraqalpogʻiston Respublikasi Vazirlar Kengashi va viloyatlar hokimliklari:

joriy yilning 15-mayigacha don oʻrish kombaynlari, don tashuvchi transport vositalari tayyorlanishini hamda ularning “Oʻzdavtexnazorat” va Yoʻl harakati xavfsizligi bosh boshqarmasi inspektorlarining dalolatnomalari boʻyicha komissiya orqali qabul qilib olinishini, shuningdek xoʻjaliklardagi don xirmonlari tayyorlanishini tugallasinlar, donni qabul qilish maydonchalarini, don tozalash qurilmalari va boshqa donni dastlabki qayta ishlash vositalarini tuzatsinlar;

Qoraqalpogʻiston Respublikasi va viloyatlar boʻyicha kombaynlarning, shu jumladan yuqori unumli “Keys” va “Klaas”, “Nyu-Xolland” kombaynlari hosil oʻrim-yigʻimida 1-ilovaga muvofiq miqdorda qatnashishini taʼminlasinlar;

hamma joyda kombaynlarning guruh boʻlib ishlashini tashkil etsinlar, har bir guruhga transport, texnik xizmat koʻrsatish va yonilgʻi quyish vositalarini biriktirsinlar. Don yetilishi muddatlari hisobga olingan holda guruhlarning harakat qilish yoʻnalishlari ishlab chiqilsin;

texnikaning ishga yaroqli holda boʻlishini taʼminlash uchun ehtiyot qismlar va tuzatish materiallarining zarur zaxirasini yaratsinlar;

don yanchib olinishi va uning kirim qilinishi ustidan nazoratni taʼminlash uchun hosil ekspert baholanishini hamda har bir dala boʻyicha tegishli dalolatnomalar tuzilishini boshoqli don ekinlarini yigʻishtirib olish boshlangungacha tugallasinlar. Don hosildorligining prognoz va amaldagi koʻrsatkichlari oʻrtasida asoslanmagan farq paydo boʻlgan taqdirda aybdor shaxslarni javobgarlikka tortish chora-tadbirlari koʻrilsin;

don xoʻjaliklar tomonidan albatta dastlab tozalangan, iflosligi va namligi standart normativlardan ortiq boʻlmagan holda tayyorlov punktlariga yetkazib berilishini taʼminlasinlar;

Oʻzbekiston Respublikasi Moliya vazirligi bilan kelishgan holda bir hafta muddatda operatorlar, transport vositalari haydovchilari va oʻrim-yigʻimda, donni tozalash va tashishda, texnikaga xizmat koʻrsatishda band boʻlgan boshqa xodimlar mehnatiga ish unumiga va hosil oʻrim-yigʻimi sifatiga qarab haq toʻlash va moddiy ragʻbatlantirishga doir tavsiyalarni ishlab chiqsinlar va xoʻjaliklarga yetkazsinlar;

mehnatga mahsulot bilan haq toʻlash hisobiga don berishni faqat “Oʻzdonmahsulot” korporatsiyasi don qabul qilish korxonalariga don sotish boʻyicha shartnoma majburiyatlari bajarilgandan, urugʻlik fondi gʻamlangandan va mahsulot kirim qilingandan keyin amalga oshirsinlar.

3. “Oʻzdonmahsulot” korporatsiyasi:

oziq-ovqatbop donning davlat zaxirasini 2002-yilga tasdiqlangan don balansiga qatʼiy muvofiq miqdorda yangilasin, uning Oʻzbekiston Respublikasi Vazirlar Mahkamasining 2000-yil 20-maydagi 209-33-son qarorida belgilangan don mahsulotlari korxonalarida alohida saqlanishini taʼminlasin;

elevatorlar va omborlar, shuningdek don mahsulotlari fumigantlar bilan oʻz vaqtida zararsizlantirilishini taʼminlasin.

4. “Oʻzqishloqxoʻjalikmash-xolding” xolding kompaniyasi va “Oʻzagromashservis” uyushmasi kombaynlarga va boshqa texnikaga xizmat koʻrsatishda amaliy yordam berish uchun donni yigʻishtirib olish davrida 2-ilovaga muvofiq korxonalarni yirik don yetishtiruvchi tumanlarga shartnoma asosida biriktirib qoʻysinlar.

5. Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi, “Oʻzagromashservis” uyushmasi:

donning kombaynlardan xirmongacha va don qabul qilish punktlarigacha tashishning topshiriqda belgilangan hajmlari bajarilishini taʼminlaydigan miqdorda 3-ilovaga muvofiq donni tashish uchun yuk avtomobillari, tirkamali transport traktorlari qoʻyilishini taʼminlasinlar;

zarurat boʻlganda don tashishga Oʻzbekiston Respublikasi Mudofaa vazirligi hamda boshqa vazirliklar, idoralar va tashkilotlarning avtotransportini shartnoma asosida jalb etsinlar.

Belgilab qoʻyilsinki, xoʻjaliklar tomonidan donni don qabul qilish punktlariga tashish boʻyicha transport xarajatlari “Oʻzdonmahsulot” korporatsiyasi tomonidan toʻlanadi.

6. Oʻzbekiston Respublikasi Qishloq va suv xoʻjaligi vazirligi “Oʻzdavdoninspeksiya”, “Oʻzdonmahsulot” korporatsiyasi, Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda xoʻjaliklarning oʻzlari yetishtirgan hosildan Vazirlar Mahkamasining 2001-yil 14-sentabrdagi 373-son qarorida belgilangan miqdorlarda urugʻlik gʻamlashini tashkil etsin hamda urugʻlik tayyorlash sifati ustidan kundalik nazorat oʻrnatsin.

7. 2002-yil boshoqli don ekinlari hosilini oʻz vaqtida va sifatli yigʻishtirib olish ishlarini tashkil etish uchun 4-ilovaga muvofiq tarkibda Ishchi komissiya tuzilsin.

Qoraqalpogʻiston Respublikasi Vazirlar Kengashi raisi va viloyat hokimlari rahbarligida respublikaning barcha mintaqalarida shunday komissiyalar tashkil etilsin.

Ishchi komissiya (I.H. Joʻrabekov):

boshoqli don ekinlari hosili uyushqoqlik bilan yigʻishtirib olinishi ishlarining bajarilishini muntazam oʻrganib borsin;

Ishchi komissiya majlislarida hududiy shtablar, respublika vazirliklari va idoralari rahbarlarining hosilni uyushqoqlik bilan yigʻishtirib olish boʻyicha ular tomonidan olib borilayotgan ishlar toʻgʻrisidagi hisobotlarini eshitishni amaliyotga kiritsin.

8. 2002-yilda boshoqli don ekinlari hosilini yigʻishtirib olish davrida yoʻllarda harakatlanish xavfsizligini taʼminlash, yongʻinlar kelib chiqishining oldini olish hamda donning talon-toroj qilinishi va nobud boʻlishiga yoʻl qoʻymaslik maqsadida:

Oʻzbekiston Respublikasi Ichki ishlar vazirligi joriy yilning 1-iyunidan boshlab Ichki ishlar vazirligi taʼlim muassasalarining tinglovchilari va kursantlaridan 2200 kishini 5-ilovaga muvofiq viloyatlar ichki ishlar boshqarmalari ixtiyoriga yuborsin;

“Oʻzbekiston temir yoʻllari” davlat-aksiyadorlik kompaniyasi, “Toshshaharyoʻlovchitrans” davlat uyushmasi Ichki ishlar vazirligi buyurtmanomalari boʻyicha tinglovchilar va kursantlarni vaqtincha boʻlish joyiga olib borish hamda hosil yigʻishtirib olingandan keyin ularni qaytarib olib kelish uchun zarur miqdordagi transport vositalari ajratilishini taʼminlasinlar. Tinglovchilar va kursantlarni tashish bilan bogʻliq transport xarajatlari “Oʻzbekiston temir yoʻllari” davlat-aksiyadorlik kompaniyasi va “Toshshaharyoʻlovchitrans” davlat uyushmasi hisobidan qoplanadi;

Jizzax, Qashqadaryo, Samarqand, Sirdaryo, Surxondaryo va Toshkent viloyatlari hokimliklari tinglovchilar va kursantlarni vaqtincha yashash joylari, oziq-ovqat, ularni tashish uchun transport va yonilgʻi-moylash materiallari bilan taʼminlasinlar;

Oʻzbekiston Respublikasi Ichki ishlar vazirligi Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda donni oʻrib-yigʻib olish joylarida, don xirmonlarida va donni qabul qilib olish punktlarida kecha-kunduz ishlaydigan nazorat postlari tashkil qilsinlar;

Oʻzbekiston Respublikasi Sogʻliqni saqlash vazirligi yuborilayotgan tinglovchilar va kursantlarga tibbiy xizmat koʻrsatilishini, ular yashayotgan joylardagi sanitariya holati kundalik nazorat qilinishini taʼminlasin. “Dori-darmon” davlat-aksiyadorlik jamiyati Ichki ishlar vazirligiga sotish uchun zarur miqdorda dori-darmonlar va boshqa davolash vositalari ajratsin.

9. “Oʻzbekneftgaz” milliy xolding kompaniyasi, “Oʻzneftmahsulot” aksiyadorlik kompaniyasi hosilni yigʻishtirib olish davrida xoʻjaliklarga, mashina-traktor parklariga va hosilni yigʻishtirib olish va tashish bilan band boʻlgan boshqa tashkilotlarga yonilgʻi-moylash materiallari belgilangan limitlar boʻyicha uzluksiz berilishini taʼminlasinlar, “Keys”, “Klaas” va “Nyu-Xolland” kompaniyalarida ishlab chiqarilgan kombaynlar va traktorlar uchun moy yetkazib berilishiga alohida eʼtiborni qaratsinlar.

10. Oʻzbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi:

2002-yil don hosili uchun hisob-kitob qilish uchun mablagʻ ajratishda hosilni yigʻishtirib olish uchun respublikaning boshqa mintaqalaridan jalb qilingan “Keys” va “Klass” kombaynlari xizmati, don tashish boʻyicha avtotransport xizmatlari, shuningdek “Oʻzqishloqxoʻjalikmash-xolding” xolding kompaniyasi, “Oʻzagromashservis” uyushmasi va donni oʻrib-yigʻib olish mavsumiga texnik yordam koʻrsatuvchi boshqa tashkilotlarning korxonalari xizmatlari uchun haq toʻlash xarajatlarini nazarda tutsin;

“Oʻzdonmahsulot” korporatsiyasi bilan birgalikda topshirilgan don uchun xoʻjaliklar bilan oʻz vaqtida hisob-kitob qilinishini taʼminlasin.

11. “Paxta-bank”, “Gʻalla-bank” va boshqa xizmat koʻrsatuvchi tijorat banklariga xoʻjaliklar va mashina-traktor parklari, avtoxoʻjaliklarning don oʻrish-yigʻish mavsumi qatnashchilariga har 5 kunda ish haqi toʻlash uchun naqd pulga boʻlgan ehtiyojini Davlat ehtiyojlari uchun xarid qilinadigan qishloq xoʻjaligi mahsulotlarining hisob-kitob jamgʻarmasi tomonidan moliyalashtiriladigan mablagʻlar hisobiga toʻliq hajmda taʼminlash tavsiya qilinsin.

12. Don tashishni amalga oshiruvchi temir yoʻl va avtomobil transporti xizmatlari uchun oʻz vaqtida hisob-kitob qilishni taʼminlash maqsadida 2002-yil don hosilini tashish davri uchun joriy yilning 1-noyabrigacha “Oʻzdonmahsulot” korporatsiyasi tizimi korxonalari uchun, transport xarajatlarini hisobga olgan holda bevosita ishlab chiqarish faoliyati bilan bogʻliq dolzarb ehtiyojlarga pul tushumidan ajratmalar stavkasi, istisno tariqasida, 15 foizgacha miqdorda belgilansin.

13. “Oʻzagromashservis” uyushmasi korxonalari qishloq xoʻjaligi texnikasini boshoqli don ekinlari hosilini yigʻishtirib olishga tayyorlash uchun taʼmirlash materiallari olib kelishda bojxona toʻlovlari toʻlashdan 6-ilovaga muvofiq (bojxonada rasmiylashtirilganlik yigʻimlaridan tashqari), shuningdek ularni taʼmirlash korxonalari va mashina-traktor parklariga sotishda qoʻshilgan qiymat soligʻi toʻlashdan ozod qilinsin.

14. Oʻzbekiston Respublikasi Makroiqtisodiyot va statistika vazirligi xoʻjaliklar tomonidan don yetishtirish va uni sotish toʻgʻrisidagi statistika hisobotlarining toʻgʻriligini don qabul qilib olish korxonalari darajasida muntazam ravishda tekshirib borsin, aniqlangan buzilishlar toʻgʻrisida Vazirlar Mahkamasiga darhol axborot bersin.

15. Mazkur qarorning bajarilishini nazorat qilish Oʻzbekiston Respublikasi Prezidentining Davlat maslahatchisi I.H. Joʻrabekov va Oʻzbekiston Respublikasi Bosh vazirining oʻrinbosari N.S. Yusupov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2002-yil 23-aprel,

136-son

Vazirlar Mahkamasining 2002-yil 23-apreldagi 136-son qaroriga 1-ILOVA

2002-yilda boshoqli don ekinlari hosili oʻrim-yigʻimida gʻalla kombaynlarining qatnashishi

Vazirlar Mahkamasining 2002-yil 23-apreldagi 136-son qaroriga 2-ILOVA

2002-yil don hosilini oʻrib-yigʻib olish davrida “Oʻzqishloqxoʻjalikmash-xolding” kompaniyasi va “Oʻzagromashservis” uyushmasi korxonalarini don ekuvchi yirik tumanlarga biriktirib qoʻyish

Vazirlar Mahkamasining 2002-yil 23-apreldagi 136-son qaroriga 3-ILOVA

2002-yilgi boshoqli don ekinlari hosilini tashish uchun jalb qilinadigan transport vositalari soni

Vazirlar Mahkamasining 2002-yil 23-apreldagi 136-son qaroriga 4-ILOVA

2002-yil boshoqli don ekinlari hosilini oʻrib-yigʻib olishni uyushqoqlik bilan oʻtkazish boʻyicha Ishchi komissiya

TARKIBI

Vazirlar Mahkamasining 2002-yil 23-apreldagi 136-son qaroriga 5-ILOVA

2002-yil boshoqli don ekinlari hosili oʻrim-yigʻimiga jalb etiladigan Oʻzbekiston Respublikasi Ichki ishlar vazirligi taʼlim muassasalarining tinglovchilari va kursantlari

TAQSIMOTI

Vazirlar Mahkamasining 2002-yil 23-apreldagi 136-son qaroriga 6-ILOVA

2002-yilda boshoqli don ekinlari hosili oʻrim-yigʻimiga qishloq xoʻjaligi texnikasini tayyorlash uchun keltiriladigan taʼmirlash materiallari

ROʻYXATI