“Oʻzbekiston yuksalish yoʻlida (oʻn yillik mustaqil taraqqiyot yoʻli)” fotoalbomini nashr etish toʻgʻrisida (176-son)

13.04.2001

Oʻzbekiston Respublikasi Vazirlar Mahkamasining

qarori

Oʻzbekiston Respublikasi mustaqilligining oʻn yillik bayramini munosib kutib olish, istiqlol yillarida siyosiy, iqtisodiy, ijtimoiy sohalarda qoʻlga kiritilgan katta yutuqlarni, hayotimizda roʻy berayotgan tarixiy oʻzgarishlarni xalqimiz va xalqaro jamoatchilik orasida keng targʻib etish maqsadida Vazirlar Mahkamasi qaror qiladi:

1. Vatanimizning betakror qiyofasini va yangi hayot qurish yoʻlida amalga oshirilayotgan ulkan bunyodkorlik ishlarini, yurtimiz odamlarining yorqin siymolarini aks ettiruvchi, koʻp ming yillik tariximiz, boy madaniyatimiz, serqirra sanʼatimiz haqida hikoya qiluvchi “Oʻzbekiston yuksalish yoʻlida (oʻn yillik mustaqil taraqqiyot yoʻli)” nomli rangli-bezakli fotoalbom tayyorlansin va nashr etilsin.

2. Mazkur fotoalbomni tayyorlash boʻyicha ishchi guruhi ilovaga muvofiq tasdiqlansin.

Ishchi oʻn kun muddat ichida mazkur fotoalbomning hajmi, tarkibi, maʼno-mazmuni ifodalangan dastur ishlab chiqsin. Fotoalbomning mazmun-mundarijasini belgilashda, arxiv hujjatlari, fotosuratlar va boshqa tasviriy vositalarni tanlashda quyidagi jihatlarga alohida eʼtibor qaratsin:

Oʻzbekistonning oʻziga xos qiyofasini, milliy tariximiz, yuksak maʼnaviyatimiz va boy madaniyatimizni, jahon hamjamiyatida munosib oʻrin egallashga qodir xususiyatlari va fazilatlarini yorqin lavhalar orqali koʻrsatish;

oʻlkamizning goʻzal tabiatini, saxovatli zaminimizning beqiyos manzaralarini aks ettirish;

mamlakatimiz boyliklari, tabiiy-mineral zaxiralari va iqtisodiy salohiyatini tasviriy vositalar yordamida namoyon etish;

koʻp millatli xalqimiz vakillarining oʻziga xos turmush tarzi, yurtimizda qaror topgan millatlararo totuvlik va osoyishtalik, diniy bagʻrikenglikni aks ettirish;

tarixiy-madaniy obidalarimiz, ularni qayta tiklash, yangi ziyoratgohlar barpo etish yoʻlidagi keng koʻlamli ishlarning xalqimiz maʼnaviyatini yuksaltirishdagi ahamiyatini qiyosiy usulda ifodalash;

Vatanimiz ostonasi boʻlmish poytaxtimiz Toshkent shahrida mustaqillik davrida bunyod etilgan zamonaviy binolar, ravon yoʻllar, mustahkam koʻpriklar, yangi uy-joylar, goʻzal bogʻ va xiyobonlarni aks ettirish.

Yuqorida qayd etilgan Oʻzbekistonning tarixi, oʻziga xos qiyofasi, ulkan salohiyati hamda oʻn yillik mustaqil taraqqiyot davrida yangi hayot, yangi jamiyat barpo etish yoʻlida qoʻyilgan qadamlar va erishilgan natijalarni, xalqaro jamoatchilik eʼtirof etadigan yutuqlarni bir-biri bilan uzviy bogʻliq holda fotosuratlar va boshqa hujjatlar asosida yoritish ishchi guruhining asosiy vazifasi ekani belgilab qoʻyilsin.

3. “Oʻzbekiston yuksalish yoʻlida (oʻn yillik mustaqil taraqqiyot yoʻli)” fotoalbomini oʻzbek, rus va ingliz-tillarida nashr etish vazifasi Oʻzbekiston Respublikasi Davlat matbuot qoʻmitasiga topshirilsin.

Fotoalbomni Germaniya Federativ Respublikasida chop etish nazarda tutilsin.

4. Davlat matbuot qoʻmitasi Oʻzbekiston Respublikasi Tashqi ishlar vazirligi hamda “Oʻzbekturizm” milliy kompaniyasi bilan birgalikda fotoalbomni keng miqyosda targʻib etish va realizatsiya qilish chora-tadbirlarini belgilasin.

5. Oʻzbekiston Respublikasi Moliya vazirligi fotoalbomni tayyorlash va nashr etish uchun zarur mablagʻlarni Davlat matbuot qoʻmitasi taqdim etgan sarf-xarajatlar smetasi asosida Vazirlar Mahkamasining zaxira jamgʻarmasi hisobidan ajratsin.

6. “Oʻzbekiston havo yoʻllari” milliy aviakompaniyasi:

aerosuratga olish uchun zarur texnik shart-sharoitlarni tashkil etsin;

Germaniyada nashr etilgan fotoalbom tirajini Toshkent shahriga olib kelishni taʼminlasin.

7. Oʻzbekiston Respublikasi Davlat bojxona qoʻmitasi fotoalbom tirajini Toshkent shahriga olib kirishda bojxona toʻlovlarini undirmasdan xizmat koʻrsatsin.

8. Mazkur qarorning bajarilishini nazorat qilish Prezidentning Davlat maslahatchisi X.Sultonov va Bosh vazir oʻrinbosari H.Karomatov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 13-aprel,

176-son

Vazirlar Mahkamasining 2001-yil 13-apreldagi 176-son qaroriga ILOVA

“Oʻzbekiston yuksalish yoʻlida (oʻn yillik mustaqil taraqqiyot yoʻli)” fotoalbomini tayyorlash boʻyicha ishchi guruhi