“Navroʻz” umumxalq bayrami va Oʻzbekiston Respublikasi Mustaqilligi kunining 10 yilligigacha foydalanishga topshiriladigan obyektlar toʻgʻrisida (48-son)

23.01.2001

Oʻzbekiston Respublikasi Vazirlar Mahkamasining

qarori

“Navroʻz” umumxalq bayramini va Oʻzbekiston Respublikasi Mustaqilligi kunining 10 yilligini bayram qilishga tayyorgarlik koʻrish davomida muhim sanoat va ijtimoiy obyektlar qurilishini va ishga tushirilishini oʻz vaqtida tugallashni taʼminlash maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar va idoralarning 1-ilovaga* muvofiq muhim sanoat va ijtimoiy obyektlarni “Navroʻz” umumxalq bayramigacha va 2-ilovaga* muvofiq obyektlarni Oʻzbekiston Respublikasi mustaqilligi kunining 10 yilligigacha foydalanishga topshirish toʻgʻrisidagi takliflari maʼqullansin.

* 1-2 ilovalar berilmaydi.

2. Ishlab chiqarish va ijtimoiy obyektlar qurilishi va ishga tushirilishini oʻz vaqtida tugallash va taʼminlash uchun 3-ilovaga* muvofiq tarkibda Respublika komissiyasi tuzilsin.

* 3-ilova berilmaydi.

Respublika komissiyasi:

“Navroʻz” umumxalq bayramigacha va Oʻzbekiston Respublikasi mustaqilligi kunining 10 yilligigacha Toshkent shahrida, viloyatlarda va Qoraqalpogʻiston Respublikasida ishga tushirish moʻljallangan obyektlar qurilishini oʻz vaqtida tugallash vazifalarini hal etishda saʼy-harakatlar muvofiqlashtirilishini taʼminlasin hamda manfaatdor vazirliklar va idoralarga, hokimiyat va boshqaruv mahalliy organlariga koʻmaklashsin;

Oʻzbekiston Respublikasi mustaqilligi mustahkamlanishida, mamlakat iqtisodiyoti tadrijiy va barqaror rivojlanishida, aholi turmush sharoitlari yaxshilanishida muhim ahamiyatga ega boʻlgan obyektlar qurilishi va foydalanishga topshirilishining borishi ommaviy axborot vositalarida keng yoritilishini tashkil etsin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

yuqorida koʻrsatilgan vazifalar yuklangan hududiy komissiyalar tuzsinlar, ular faoliyatining Respublika komissiyasi bilan mustahkam muvofiqlashtirilishini taʼminlasinlar;

“Navroʻz” va Oʻzbekiston Respublikasi mustaqilligi kunining 10 yilligi bayramigacha ishga tushiriladigan ijtimoiy va sanoat obyektlarining qoʻshimcha roʻyxatini belgilasinlar.

Belgilansinki, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari hududiy komissiyalar rahbarlari va Respublika komissiyasi aʼzolari hisoblanadilar.

4. Respublika komissiyasi amalga oshirilgan ishlarning natijalari toʻgʻrisida Oʻzbekiston Respublikasi Vazirlar Mahkamasiga 2001-yil 15-martgacha va 25-avgustgacha axborot bersin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Isayev va Oʻzbekiston Respublikasi Prezidentining Davlat maslahatchisi I.H. Joʻrabekov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 23-yanvar,

48-son