Bozor munosabatlariga oʻtish sharoitida respublika ommaviy axborot vositalarini davlat yoʻli bilan muhofaza qilishning birinchi navbatdagi chora-tadbirlari toʻgʻrisida (PF-391-son)

28.04.1992

Oʻzbekiston Respublikasi Prezidentining

Farmoni

Narxlar oshib borayotgan sharoitda vaqtli matbuotning va boshqa ommaviy axborot vositalarining moliyaviy ahvolini yaxshilash hamda moddiy-texnika negizini mustahkamlash, ularning xodimlarini ijtimoiy muhofaza qilishni taʼminlash va respublika fuqarolarining har tomonlama axborot olishga boʻlgan konstitutsiyaviy huquqlarini roʻyobga chiqarish maqsadida:

1. 1992-yilda vaqtli matbuot va ommaviy axborot boshqa organlarining faoliyati bilan bogʻliq qimmatlashib borayotgan xarajatlarni qoplashga 100 million soʻm miqdorida respublika budjetidan mablagʻ ajratilsin. Kelgusida respublika budjetida ana shu maqsadlarga mablagʻ ajratishni koʻzda tutish zarur deb topilsin.

Bosh vazir oʻrinbosari (oʻrtoq E.S. Samandarov), Davlat maslahatchisi, respublika roʻznomalari va oynomalarining bosh muharrirlaridan, shuningdek Oʻzbekiston Respublikasi Davlat matbuot komitetining, “Sharq” nashriyot-matbaachilik konserni, Oʻzbekiston Davlat teleradioeshittirish kompaniyasi, Oʻzbekiston Milliy axborot agentligi, Oʻzbekiston kasaba uyushmalari federatsiyasi Kengashi, Oʻzbekiston Jurnalistlar uyushmasi, Oʻzbekiston Respublikasi Moliya vazirligi, Aloqa vazirligi, Energetika va elektrlashtirish vazirligining hamda Oʻzbekiston Respublikasi Vazirlar Mahkamasi huzuridagi Bosh soliq boshqarmasining vakillaridan iborat komissiya tashkiliy masalalarni koʻrib chiqsin va vaqtli nashrlarni chiqarish xarajatlari qimmatlashganligini qoplash uchun ajratilgan mablagʻ doirasida ommaviy axborot vositalariga mablagʻ ajratishning aniq miqdorlarini belgilasin.

2. Komissiya (oʻrtoq E.S. Samandarov) bir hafta muddat ichida quyidagi masalalarni ishlab chiqib, ular yuzasidan takliflar tayyorlasin:

respublikaning vaqtli nashrlarini va davlat kitob nashriyotlarini roʻznomalar, oynomalar, darsliklar hamda bolalar adabiyotini bosib chiqarish uchun zarur boʻlgan bosma qogʻoz navlari, karton, muqova materiallari va boshqa materiallar bilan taʼminlash;

roʻznoma va oynomalarning muharririyatlarini, matbaa va kitob savdosi korxonalarini, Oʻzbekiston Davlat teleradioeshittirish kompaniyasini va Oʻzbekiston Milliy axborot agentligini qoʻshimcha qiymat soligʻidan ozod qilish hamda vaqtli nashrlarni, darsliklar va bolalar adabiyotini bosib chiqarish va sotishdan tushadigan daromadlarga imtiyozli soliq belgilash. Takliflar Oʻzbekiston Respublikasining Oliy Kengashiga taqdim etilsin;

ommaviy axborot vositalari uchun ularning asosiy faoliyati doirasida binolarning ijara haqini toʻlashga imtiyozli tariflar belgilash;

Oʻzbekiston Respublikasining Davlat matbuot komitetiga, Oʻzbekiston Davlat teleradioeshittirish kompaniyasiga, Oʻzbekiston Milliy axborot agentligiga va “Sharq” konserniga mashina-uskunalar, texnika hamda teleradio apparatlar sotib olish uchun erkin muomaladagi valyuta ajratish.

3. Qoraqalpogʻiston Respublikasining Vazirlar Kengashi, viloyatlar va Toshkent shahar hokimlari mahalliy matbuot, televideniye va radioni pul bilan va moddiy-texnikaviy jihatdan taʼminlashni, shu jumladan budjetga kirmaydigan va jalb qilingan mablagʻlar hisobidan taʼminlashni yanada yaxshilash masalalarini koʻrib chiqsinlar.

4. Oʻzbekiston Davlat teleradioeshittirish kompaniyasi tizimi, Oʻzbekiston Milliy axborot agentligi, Oʻzbekiston Respublikasi Davlat matbuot komitetining Markaziy apparati, uning viloyat boshqarmalari, rayon, shahar va viloyat roʻznomalarining muharririyatlari, shuningdek respublika roʻznoma va oynomalari muharririyatlari xodimlarining mansab okladlari va maoshlari 1992-yilning 1-mayidan oʻrta hisobda 50 foiz oshirilsin.

5. Adabiyot, sanʼat va jurnalistika sohasida mualliflik haqining miqdorlarini 2 baravar oshirish toʻgʻrisida Vazirlar Mahkamasining 1992-yil 1-apreldagi 158-son qarorining amal qilishi Oʻzbekiston Milliy axborot agentligi tizimi xodimlariga joriy etilsin.

6. Oʻzbekiston Respublikasi Prezidenti huzuridagi Vazirlar Mahkamasi 10 kun muddat ichida mazkur Farmon bajarilishini tashkil etish yuzasidan qaror qabul qilsin.

7. Ushbu Farmon roʻyobga chiqarilishini nazorat qilish E.S. Samandarov, B.A. Nazarov oʻrtoqlar zimmasiga yuklansin.

Oʻzbekiston Respublikasining Prezidenti I. KARIMOV

Toshkent sh.,

1992-yil 28-aprel,

PF-391-son