Tamaki sanoatini rivojlantirishga doir qoʻshimcha chora-tadbirlar toʻgʻrisida (496-son)

15.11.1999

Oʻzbekiston Respublikasi Vazirlar Mahkamasining

qarori

[Koʻchirma]

Respublika tamaki sanoatini rivojlantirishni taʼminlash hamda uning eksport imkoniyatini oshirish, “British Amerikan Tobakko PLS” kompaniyasining investitsiya loyihasini oʻz vaqtida amalga oshirish, texnika bilan qayta jihozlash, tamaki mahsuloti ishlab chiqarish boʻyicha qoʻshimcha mahalliy ishlab chiqarishlarni barpo etish uchun xorijiy investitsiyalarni keng jalb qilish maqsadida Vazirlar Mahkamasi qaror qiladi:

1. “OʻzBAT A.J.” qoʻshma korxonasi tomonidan xorijiy kompaniyalar bilan birgalikda 1999—2004-yillarda tamaki industriyasini mahalliylashtirish dasturi ishlab chiqilayotganligi maʼlumot uchun qabul qilinsin, Dastur:

2004-yilga borib Oʻzbekistonda tamaki sanoati uchun zarur boʻlgan tamaki yetishtirishni 48 foizgacha, bosma-oʻrov materiallari ishlab chiqarishni 56 foizgacha va boshqa komponentlarni ishlab chiqarishni 50 foizgacha, mahalliylashtirishning umumiy darajasini 50 foizgacha yetkazishni;

qoʻshma korxonaning eksport imkoniyatini kengaytirish boʻyicha koʻriladigan chora-tadbirlar bilan birgalikda 2004-yilga borib “OʻzBAT A.J.” qoʻshma korxonasining oʻz valyuta xarajatlarini oʻzi qoplashini taʼminlashni nazarda tutadi.

Vazirlar Mahkamasining Investitsiya dasturlari departamenti Xorijiy investitsiyalar agentligi bilan birgalikda mahalliylashtirish dasturini amalga oshirishda, shu jumladan xorijiy investorlarni jalb qilishda “OʻzBAT A.J.” qoʻshma korxonasiga zarur yordam koʻrsatsin.

2. “OʻzBAT A.J.” qoʻshma korxonasiga:

qoʻshma korxonaning xoʻjalik faoliyatini amalga oshirish uchun zarur boʻlgan olib kelinadigan asbob-uskunalar, xomashyo materiallari va boshqa mahsulotlar bojxona bojlari toʻlash yuzasidan berilgan imtiyozlar;

valyuta tushumining bir qismini majburiy sotishdan ozod qilish yuzasidan berilgan imtiyozlar, qoʻshma korxonaga markazlashtirilgan valyuta resurslaridan mablagʻ ajratish tegishli miqdorga qisqartirilgan holda;

tamaki mahsulotlari ishlab chiqarish obyektlarini qurish va ulardan foydalanish, shuningdek tamaki bargini qayta ishlash va fermentatsiyalash yuzasidan mutlaq huquqlar 2004-yil noyabr oyigacha uzaytirilsin.

4. Oʻzbekiston Respublikasi Makroiqtisodiyot va statistika vazirligi hamda Qishloq va suv xoʻjaligi vazirligining faqat “OʻzBAT A.J.” qoʻshma korxonasiga 10 yil muddatga “Izmir” tamaki bargini yetishtirish, xarid qilish, qayta ishlash va eksport qilishni tashkil etish huquqini berish toʻgʻrisidagi takliflariga rozilik berilsin.

Oʻzbekiston Respublikasi Qishloq va suv xoʻjaligi vazirligi “OʻzBAT A.J.” qoʻshma korxonasi buyurtmanomalari boʻyicha “Izmir” tamakisini yetishtirish uchun har yili zarur lalmi yerlar ajratilishini taʼminlasin.

Samarqand va Qashqadaryo viloyatlari hokimliklari “Izmir” tamakisini boshqa xaridorlar tomonidan xarid qilinishini bartaraf etish ustidan nazorat oʻrnatsinlar.

Oʻzbekiston Respublikasi Davlat bojxona qoʻmitasi “Izmir” tamakisining ruxsatsiz olib chiqib ketilishini bartaraf etish chora-tadbirlarini taʼminlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M.Z. Usmonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1999-yil 15-noyabr,

496-son