1998-yilgi boshoqli don ekinlari hosilini uyushqoqlik bilan yigʻishtirib olish masalalari toʻgʻrisida (240-son)
04.06.1998
Oʻzbekiston Respublikasi Vazirlar Mahkamasining
qarori
Boshoqli don ekinlari hosilini oʻz vaqtida va sifatli yigʻishtirib olishni taʼminlash va don xarid qilishning belgilangan hajmlarini bajarish maqsadida Vazirlar Mahkamasi qaror qiladi:
1. Qishloq va suv xoʻjaligi vazirligi (Bobojonov) va “Oʻzqishloqxoʻjaliktaʼminottuzatish” davlat-kooperativ qoʻmitasi (Olimjonov) tomonidan Vazirlar Mahkamasining 1998-yil 10-martdagi 106-son qaroriga muvofiq gʻalla kombaynlarini qishloq xoʻjaligi korxonalari balansidan “MTP” davlat-aksiyadorlik jamiyatlari balansiga berish tugallanganligi maʼlumot uchun qabul qilinsin.
Hosilni yigʻishtirib olishda “MTP” davlat-aksiyadorlik jamiyatlari va xoʻjaliklar tarkibida Qoraqalpogʻiston Respublikasi va viloyatlar boʻyicha 1-ilovaga muvofiq 7876 kombayn, shu jumladan, 799 “Keys” kombayni ishlaydi.
Oʻrim-yigʻim tashkil etilishi hamda don hosili oʻz vaqtida va sifatli yigʻishtirib olinishi uchun masʼuliyat shaxsan Qoraqalpogʻiston Respublikasi Vazirlar Kengashi raisi, viloyatlar hokimlari, Qishloq va suv xoʻjaligi vazirligi hamda “Oʻzqishloqxoʻjaliktaʼminottuzatish” davlat-kooperativ qoʻmitasi rahbarlari zimmasiga yuklansin.
2. Qoraqalpogʻiston Respublikasi Vazirlar Kengashi, viloyatlar hokimliklari, Qishloq va suv xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi, “Oʻzmevasabzavotuzumsanoat-xolding” kompaniyasi, “Oʻzdonmahsulot” davlat korporatsiyasi:
boshoqli don ekinlarini yigʻishtirish boshlanishidan oldin keyinchalik yanchilgan don miqdori va don kirim qilinishi ustidan nazoratni taʼminlash uchun hosil har bir dala boʻyicha ekspert baholanishini va tegishli dalolatnomalar tuzilishini tugallasinlar;
kombaynchilar, transport vositalari haydovchilari, oʻrim-yigʻimda va don tashishda band boʻlgan boshqa xodimlar mehnatiga kombaynning ish unumiga, oʻrim-yigʻim sifatiga qarab haq toʻlash va ularni moddiy ragʻbatlantirishga oid tavsiyalarni bir hafta muddatda ishlab chiqsinlar va xoʻjaliklarga yetkazsinlar. Mehnatga natura bilan haq toʻlash hisobiga don berishni “Oʻzdonmahsulot” davlat korporatsiyasi korxonalariga don sotish topshiriqlari bajarilgandan, urugʻlik fondi gʻamlangandan va mahsulot kirim qilingandan keyin amalga oshirsinlar;
kombaynlarning guruh boʻlib ishlashini tashkil etsinlar, ularning har bir guruhiga texnika xizmati koʻrsatish vositalari, transport vositalari, yonilgʻi quyish mashinalarini biriktirib qoʻysinlar. Gʻallaning yetilishiga qarab guruhlarning harakatlanish yoʻnalishlarini ishlab chiqsinlar;
zarur shirali ozuqa zaxirasini yaratish va sugʻoriladigan yerlardan foydalanish samaradorligini oshirish maqsadida don hosili yigʻishtirib olingandan keyin takroriy ekinlar ekish uchun maydonlarni aniqlasinlar. Qisqa muddatlarda ularni haydasinlar va 2-ilovaga muvofiq ozuqa, sabzavot ekinlari va boshqa ekinlarni eksinlar.
3. Qishloq va suv xoʻjaligi vazirligi tomonidan taqdim etilgan va Qoraqalpogʻiston Respublikasi Vazirlar Kengashi, viloyatlar hokimliklari bilan kelishilgan boshoqli don ekinlarini oʻrib-yigʻishni boshlash va tugallash jadvaliga 3-ilovaga muvofiq rozilik berilsin. Ularga jadvalning bajarilishini qattiq nazorat qilishni taʼminlash topshirilsin.
4. “Oʻzqishloqxoʻjaliktaʼminottuzatish” davlat-kooperativ qoʻmitasi (Olimjonov), “Oʻzqishloqxoʻjalikmash-xolding” kompaniyasi (Matchonov) don hosilini yigʻishtirib olish davrida sanoat korxonalarining “MTP” davlat-aksiyadorlik jamiyatlari bilan tegishli shartnomalar tuzishlari asosida sanoat korxonalarini tumanlarga 4-ilovaga muvofiq biriktirib qoʻysinlar.
5. “Oʻzavtotrans” davlat korporatsiyasi (Sidiqnazarov), “Oʻzqishloqxoʻjaliktaʼminottuzatish” davlat-kooperativ qoʻmitasi don hosilini yigʻishtirib olish davrida xoʻjaliklarning buyurtmanomalariga muvofiq shartnoma asosida yuk avtomashinalarini 5-ilovaga muvofiq miqdorlarda respublika mintaqalariga yuborsinlar.
Zarurat boʻlganda don tashishga Mudofaa vazirligi va boshqa vazirliklar, idoralar va tashkilotlarning avtomobil transporti shartnoma asosida jalb qilinsin.
Xoʻjaliklar tomonidan donni don qabul qilish punktlariga yetkazib berish boʻyicha transport xarajatlari “Oʻzdonmahsulot” davlat korporatsiyasi tomonidan toʻlanishi belgilab qoʻyilsin.
6. “Oʻzdonmahsulot” davlat korporatsiyasi (Otayev):
topshirilgan gʻalla uchun xoʻjaliklar bilan har besh kunda hisob-kitob qilsin;
zaruriyat boʻlganda uzoq tumanlarda va gʻalla koʻp joylarda qoʻshimcha don qabul qilish punktlari ochsin.
7. Don tashiyotgan temiryoʻl va avtomobil transporti xizmatlari uchun oʻz vaqtida hisob-kitob qilinishini taʼminlash maqsadida 1998-yil don hosilini tashish davrida istisno tariqasida “Oʻzdonmahsulot” davlat-aksiyadorlik korporatsiyasi tizimi korxonalari uchun bevosita ishlab chiqarish faoliyati bilan bogʻliq kechiktirib boʻlmaydigan ehtiyojlarga (transport xarajatlarini hisobga olgan holda) tushumdan 10 foiz miqdorida mablagʻ ajratish stavkasi belgilansin.
8. Markaziy bank, “Paxta-bank”, “Gʻalla-bank” va boshqa tijorat banklariga xoʻjaliklarni va mashina-traktor parklarini gʻalla oʻrish mavsumi qatnashchilariga oʻrim-yigʻim ishlari boshlangan kundan boshlab har besh kunda ish haqi toʻlash uchun naqd pul bilan taʼminlash tavsiya qilinsin.
9. “Oʻzdavneftmahsulot” birlashmasi (Tojiyev) boshoqli don ekinlarini yigʻishtirishning butun davrida xoʻjaliklarga va hosil oʻrim-yigʻimida band boʻlgan mashina-traktor parklariga yonilgʻi-moylash materiallari belgilangan limitlar boʻyicha uzluksiz berilishini taʼminlasin. “Keys” kombaynlari va traktorlari uchun moy yetkazib berilishiga alohida eʼtibor berilsin.
10. Ichki ishlar vazirligi, Qoraqalpogʻiston Respublikasi Vazirlar Kengashi va viloyatlar hokimliklari donni oʻrib-yigʻib olish joylarida, xirmonlarda va don qabul qilish punktlarida donni nobud qilish va talon-toroj qilish hollarining oldini olish maqsadida kecha-kunduz ishlaydigan nazorat postlari oʻrnatsinlar.
11. “Oʻzdonmahsulot” davlat korporatsiyasi Andijon viloyati hokimligi bilan birgalikda Vazirlar Mahkamasining 1997-yil 11-sentabrdagi 434-57-son qaroriga 1-ilovaga qatʼiy muvofiq holda don ekinlari urugʻligini tayyorlash, ishlov berish va ularni respublika xoʻjaliklariga sotish boʻyicha zarur chora-tadbirlarni amalga oshirsin. Qishloq va suv xoʻjaligi vazirligi esa viloyatlar hokimliklari bilan birgalikda xoʻjaliklar tomonidan oʻzlari 1998-yil hosilidan yetishtirgan urugʻlik ularning ehtiyojini taʼminlaydigan hajmlarda tayyorlanishini taʼminlasin.
Urugʻlik donni “Oʻzdonmahsulot” davlat korporatsiyasi bilan tuzilgan kontraktatsiya shartnomalari boʻyicha don sotishning umumiy hajmlari hisobiga topshirish, shuningdek tovar dondan urugʻlik maqsadida foydalanish qatʼiy taqiqlansin. Shaxsiy javobgarlik Qoraqalpogʻiston Respublikasi Vazirlar Kengashi raisi, viloyatlar va tumanlar hokimlari zimmasiga yuklansin.
12. “Oʻzdonmahsulot” davlat korporatsiyasiga urugʻchilik xoʻjaliklaridan navli urugʻlarni sifatiga muvofiq — super elita uchun tovar donga belgilangan narxdan 300 foizga, elita urugʻ uchun 200 foizga, birinchi reproduksiyali urugʻ uchun 150 foizga, ikkinchi-uchinchi reproduksiyali urugʻ uchun 100 foizga oshirilgan narxlar boʻyicha xarid qilishga ruxsat berilsin, ular davlat resurslariga xarid qilinadigan don hajmlariga kiritilmasin.
13. “Oʻzagrokimyotaʼminot” birlashmasi elevator va omborxonalarni, shuningdek don mahsulotlarini zararli mikroblardan tozalash uchun zarur miqdorda fumigantlar keltirilishini taʼminlasin.
“Oʻzkimyosanoat” uyushmasi va “Oʻzagrokimyotaʼminot” birlashmasi ushbu zaharli ximikatlarning bir qismini respublika korxonalarida ishlab chiqarishni tashkil etish masalalari yuzasidan taklif tayyorlashni tezlashtirsinlar va Vazirlar Mahkamasiga taklif kiritsinlar.
14. Oʻzbekiston Respublikasi Makroiqtisodiyot va statistika vazirligi:
tuman darajasidan boshlab don tayyorlashning yagona statistika hisobini yuritsin, don qabul qilish punktlaridan xoʻjaliklar boʻyicha hisobotlarni faqat qabul kvitansiyalari nusxalari ilova qilingan holda qabul qilsin;
don yetishtirishning umumiy hajmini aniqlash uchun aholi xoʻjaliklarida yetishtirilgan donni alohida satrda hisobga olsin;
don yetishtirish va sotish toʻgʻrisidagi statistika hisobotining toʻgʻriligini muntazam tekshirib borsin va aniqlangan notoʻgʻri maʼlumotlar toʻgʻrisida Vazirlar Mahkamasini xabardor qilsin.
15. Mazkur qarorning bajarilishini nazorat qilish Bosh vazirning birinchi oʻrinbosari I.H.Joʻrabekov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1998-yil 4-iyun,
240-son
Vazirlar Mahkamasining 1998-yil 4-iyundagi 240-son qaroriga 1-ILOVA
1998-yilda boshoqli don ekinlari oʻrim-yigʻimida gʻalla kombaynlarining qatnashishi
* sholi oʻrish-yigʻish kombaynlari qatnashishi hisobga olingan holda
** 1998-yilda olinadigan 150 ta yangi “Keys” kombayni hisobga olingan holda
Vazirlar Mahkamasining 1998-yil 4-iyundagi 240-son qaroriga 2-ILOVA
1998-yilda boshoqli don ekinlari yigʻishtirib olingandan keyin sugʻoriladigan yerlarda takroriy qishloq xoʻjaligi ekinlari ekish
MAYDONLARI
Vazirlar Mahkamasining 1998-yil 4-iyundagi 240-son qaroriga 3-ILOVA
1998-yilgi boshoqli don ekinlari hosilini oʻrib-yigʻib olishni boshlash va tugallashning
TAXMINIY MUDDATLARI
Vazirlar Mahkamasining 1998-yil 4-iyundagi 240-son qaroriga 4-ILOVA
1998-yilda boshoqli don ekinlari hosilini yigʻishtirib olish davrida “Oʻzqishloqxoʻjaliktaʼminottuzatish” davlat- kooperativ qoʻmitasi va “Oʻzqishloqxoʻjalikmash-xolding” kompaniyasi zavodlarining don ekuvchi tumanlarga
BIRIKTIRIB QOʻYILIShI
Vazirlar Mahkamasining 1998-yil 4-iyundagi 240-son qaroriga 5-ILOVA
1998-yilgi boshoqli don ekinlari hosilini tashish uchun jalb qilinadigan yuk avtomobillari