“Toshkent” xalqaro aeroportini rekonstruksiya qilish uchun Yevropa tiklanish va taraqqiyot banki (YETTB)ning kreditiga xizmat koʻrsatish chora-tadbirlari toʻgʻrisida (41-son)

23.01.1998

Oʻzbekiston Respublikasi Vazirlar Mahkamasining

qarori

[Koʻchirma]

“Toshkent” xalqaro aeroportini rekonstruksiya qilish loyihasini mablagʻ bilan taʼminlash uchun YETTB tomonidan beriladigan 48 mln AQSH dollari miqdoridagi kreditdan samarali foydalanishni taʼminlash maqsadida Vazirlar Mahkamasi qaror qiladi:

1. Maʼlumot uchun qabul qilinsinki:

YETTB kreditni 1-ilovaga muvofiq shartlarda bergan;

“Toshkent” xalqaro aeroporti bilan YETTB oʻrtasida 48 mln AQSH dollari summasiga kredit bitimi tuzilgan;

ushbu loyiha uchun jalb qilinayotgan kredit yuzasidan Oʻzbekiston Respublikasi Hukumati bilan YETTB oʻrtasida kafolat bitimi imzolangan.

2. Belgilansinki, kreditga xizmat koʻrsatish va uni hamda undan foydalanganlik uchun foizlarni toʻlash bilan bogʻliq xarajatlar 2-ilovaga* muvofiq “Toshkent” xalqaro aeroporti mablagʻlari hisobiga amalga oshiriladi.

* 2-ilova rus tilidagi matnda berilgan.

3. Oʻzbekiston Respublikasi Adliya vazirligi kredit va kafolat bitimlari yuzasidan yuridik xulosani YETTB tartibotiga mos keluvchi muddatlarda belgilangan tartibda rasmiylashtirsin.

4. Oʻzbekiston Respublikasi Tashqi iqtisodiy aloqalar vazirligi YETTB krediti hisobiga mablagʻ bilan taʼminlanadigan kontraktlarni belgilangan tartibda roʻyxatdan oʻtkazsin.

5. Oʻzbekiston Respublikasi Tashqi iqtisodiy faoliyat milliy banki mazkur kreditga belgilangan tartibda kompleks xizmat koʻrsatsin.

6. Oʻzbekiston Respublikasi Makroiqtisodiyot va statistika vazirligi “Toshkent” xalqaro aeroportini rekonstruksiya qilish loyihasini Oʻzbekiston Respublikasining 1999-yilgi va undan keyingi yillardagi Investitsiya dasturiga kiritsin.

8. “Toshkent” xalqaro aeroportini rekonstruksiya qilish uchun YETTB krediti hisobiga chet eldan yetkazib berilayotgan asbob-uskunalar, priborlar va boshqa vositalar, shuningdek xorijiy maslahatchilar xizmatlari bojxonada rasmiylashtirishda undiriladigan bojxona bojlari va yigʻimlardan, qoʻshilgan qiymat soligʻi va aksiz soligʻidan ozod qilinsin.

9. Oʻzbekiston Respublikasi Tashqi ishlar vazirligi, Ichki ishlar vazirligi rekonstruksiya qilish loyihasida qatnashayotgan xorijiy mutaxassislarni “Toshkent” xalqaro aeroporti buyurtmanomalari boʻyicha tegishli ravishda konsullik yigʻimlari va boj toʻlashdan ozod qilgan holda ular uchun viza masalalari belgilangan tartibda hal etilishini taʼminlasinlar.

10. Oʻzbekiston Respublikasi Ichki ishlar vazirligi koʻrsatib oʻtilgan loyiha qatnashchilarini Oʻzbekistonda yashash joyi boʻyicha roʻyxatdan oʻtkazganlik uchun yigʻimlar toʻlashdan ozod qilsin.

11. Davlat bojxona qoʻmitasi, “Oʻzbekiston havo yoʻllari” milliy aviakompaniyasi, “Oʻzbekiston temir yoʻllari” davlat-aksiyadorlik kompaniyasi va “Oʻzavtotrans” davlat korporatsiyasi “Toshkent” xalqaro aeroportining, ushbu loyiha boʻyicha pudratchilar va ikkilamchi pudratchilarning buyurtmanomalari boʻyicha yetkazib berilayotgan asbob-uskunalar va qurilish uchun materiallar oʻz vaqtida (koʻpi bilan uch kunda) bojxonada rasmiylashtirilishini va belgilangan joyga toʻsiqsiz yetkazilishini taʼminlasinlar.

12. “Oʻzbekinvest” eksport-import milliy sugʻurta kompaniyasi koʻrsatib oʻtilgan loyihani kompleks sugʻurta himoyasi bilan taʼminlashga koʻmaklashsin.

13. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari B.S. Hamidov va K.R. Rahimov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 23-yanvar,

41-son

Vazirlar Mahkamasining 1998-yil 23-yanvardagi 41-son qaroriga 1-ILOVA

Yevropa tiklanish va taraqqiyot bankining (YETTB) kredit berish

SHARTLARI

Bank va Qarz oluvchi oʻrtasidagi kredit bitimi (Kredit bitimi) hamda Kafolat bitimi asosida Bank Qarz oluvchi — davlat korxonasi — “Toshkent” xalqaro aeroportiga Kredit bitimida bayon qilingan shartlarda, asosiy summa toʻlovini 3 yilga kechiktirgan holda, 15 yil muddatga 48 mln (qirq sakkiz million) AQSH dollari summasida kredit (Kredit) beradi.

Kreditga foiz stavkasi bozor foiz stavkasiga muvofiq oʻzgaruvchan Libor foiz stavkasi boʻyicha qoʻshiladi. Majburiyat uchun komissiya stavkasi yiliga yarim (0,5%) foizni tashkil qiladi.

2001-yil 31-yanvar kreditdan foydalanishning oxirgi sanasi hisoblanadi.

Kredit quyidagi jadval boʻyicha qaytariladi: 2001-yil 20-martdan boshlab 2012-yil 20-sentabrgacha, har 6 oyda 2 mln AQSH dollaridan.