1997-yil hosili uchun kuzgi boshoqli don ekinlari ekishning tashkiliy-iqtisodiy chora-tadbirlari toʻgʻrisida (299-son)

27.08.1996

Oʻzbekiston Respublikasi Vazirlar Mahkamasining

qarori

[Koʻchirma]

1997-yil hosili uchun kuzgi boshoqli don ekinlari ekishni oʻz vaqtida va uyushqoqlik bilan oʻtkazish, gʻalla yetishtirishni koʻpaytirishda xoʻjaliklar va aholini moddiy ragʻbatlantirishni kuchaytirish maqsadida Vazirlar Mahkamasi qaror qiladi:

1. “Oʻzistiqbolstat” davlat qoʻmitasi, Oʻzbekiston Respublikasi Qishloq xoʻjaligi vazirligi va Oʻzbekiston Qishloq xoʻjaligi fanlari akademiyasining boshoqli don ekinlari ekish maydonlari, don yetishtirish va xoʻjaliklar tomonidan uni “Oʻzdonmahsulot” davlat korporatsiyasi korxonalariga sotishga oid takliflari 1, 2-ilovalarga muvofiq qabul qilinsin.

Qoraqalpogʻiston Respublikasi va viloyatlar boʻyicha boshoqli don ekinlari ekish jadvaliga 3-ilovaga muvofiq rozilik berilsin.

2. “Oʻzdonmahsulot” davlat korporatsiyasi:

Oʻzbekiston Qishloq xoʻjaligi vazirligi, Qoraqalpogʻiston Respublikasi Vazirlar Kengashi, viloyatlar va tumanlarning hokimliklari bilan birgalikda joriy yilning 1-noyabriga qadar 1997-yil gʻalla hosilini xarid qilish uchun, 1996-yil 1-sentabrdagi bir tonna gʻalla uchun jahon narxlarining 70 foizini xarid narxlari bazasi sifatida qabul qilgan holda, xoʻjaliklar bilan kontraktatsiya shartnomalari tuzsin;

1997-yil 1-aprelga qadar kontraktatsiya shartnomalarida koʻrsatib oʻtilgan gʻalla qiymatining kamida 40 foizi miqdorida xoʻjaliklarga bosqichma-bosqich avans toʻlasin.

3. Oʻzbekiston Respublikasi Moliya vazirligi va Qishloq xoʻjaligi vazirligi jahon bozori konyunkturasini hisobga olgan holda, lekin gʻalla uchun vujudga kelgan oʻrtacha jahon narxlarining 70 foizidan kam boʻlmagan darajada boshoqli don ekinlari uchun xarid narxlari boʻyicha 1997-yil 1-maygacha takliflar kiritsinlar.

“Oʻzdonmahsulot” davlat korporatsiyasi preyskurant narxlari tasdiqlangandan soʻng, tuzilgan shartnomalarga tegishli oʻzgartirishlar kiritsin.

Oʻzbekiston Qishloq xoʻjaligi vazirligi, Oʻzbekiston Qishloq xoʻjaligi fanlari akademiyasi Andijon viloyatida boshoqli don ekinlari urugʻchiligi bazasini yaratish toʻgʻrisidagi masalani oʻrganib chiqsinlar

Qoraqalpogʻiston Respublikasi Vazirlar Kengashi raisi, viloyatlar hokimlari, Qishloq xoʻjaligi vaziri (Jumaniyozov), “Oʻzkimyosanoat” uyushmasi raisi (Yusupbekov) va “Oʻzdonmahsulot” korporatsiyasi raisi (Mutalov) zimmasiga Vazirlar Mahkamasining 1996-yil 22-avgustdagi 353-f-son farmoyishi bilan tasdiqlangan urugʻlarni dorilash jadvaliga qatʼiy rioya qilinishi uchun shaxsiy javobgarlik yuklansin. Tovar dondan urugʻlik sifatida foydalanish qatʼiy man etilsin.

6. Qoraqalpogʻiston Respublikasi Vazirlar Kengashi, viloyatlar hokimliklari, Qishloq xoʻjaligi vazirligi va Oʻzbekiston Qishloq xoʻjaligi fanlari akademiyasi gʻalla ekuvchi xoʻjaliklarning ulush qoʻshib qatnashishi asosida qishloq xoʻjaligi tovar ishlab chiqaruvchilariga boshoqli don ekinlari urugʻlarini tayyorlash yuzasidan xizmat koʻrsatish uchun ixtisoslashtirilgan markazlar barpo etishni va koʻrsatib oʻtilgan markazlar urugʻlarni tozalash, kalibrlash, navlarga ajratish, dorilash uchun zarur boʻlgan asbob-uskunalar va urugʻlarning unib chiqishini tadqiq etuvchi laboratoriya asboblari bilan jihozlanishini taʼminlasinlar.

7. Qoraqalpogʻiston Respublikasi Vazirlar Kengashi, viloyatlar hokimliklari, Qishloq xoʻjaligi vazirligi, Melioratsiya va suv xoʻjaligi vazirligi, Oʻzbekiston Qishloq xoʻjaligi fanlari akademiyasi, “Oʻzqishloqxoʻjaliktaʼminottuzatish” davlat-kooperativ qoʻmitasi va “Oʻzkimyosanoat” uyushmasi shu yilning 15-sentabrigacha:

boshoqli don ekinlari uchun naturada maydonlar va massivlar ajratishni nihoyasiga yetkazsinlar, ularni unumli va suv bilan taʼminlash kafolatlangan yerlarda hamda xoʻjaliklarda qabul qilingan almashlab ekish sxemalarini (qishloq xoʻjaligi ekinlarining navbatlashishini) hisobga olgan holda joylashtirishni koʻzda tutsinlar. Zarur boʻlganda ekin maydonlarining mavjud tuzilmasini qayta koʻrib chiqsinlar va paxta hamda don ekinlari ekishni tumanlar hamda xoʻjaliklar boʻyicha qayta taqsimlasinlar;

sugʻoriladigan yerlarda bir gektar yerga 250 kg va lalmi yerlarda kamida 100 kg urugʻlik sarfi hisobidan zarur miqdorda urugʻlik tayyorlashni taʼminlasinlar va maydonlarga faqat tozalangan va dorilangan urugʻlarni eksinlar;

ekish texnikasining tayyorligini va xoʻjaliklarda zarur miqdorda fosfor oʻgʻiti toʻplanishini taʼminlasinlar;

mexanizatorlar va ekish mavsumining boshqa qatnashchilari uchun zarur ish sharoitlari yaratsinlar;

ekish mavsumi davrida tumanlarda hokimlar boshchiligida, ularga urugʻlik sarfi belgilangan normalarga muvofiq boʻlishi, ular oʻsimliklar kasalliklarini koʻzgʻatuvchilarga qarshi dorilanganligi uchun javobgarlik yuklangan holda, komissiyalar tuzsinlar.

Melioratsiya va suv xoʻjaligi vazirligi boshoqli don ekinlari ekiladigan maydonlarni suv bilan taʼminlash chora-tadbirlarini koʻrsin.

8. “Oʻzqishloqxoʻjaliktaʼminottuzatish” davlat-kooperativ qoʻmitasi, “Oʻzqishloqxoʻjalikmash-xolding” kompaniyasi, “Oʻzkimyosanoat” uyushmasi, “Oʻzdavneftmahsulot” birlashmasi Qishloq xoʻjaligi vazirligi va Oʻzbekiston Qishloq xoʻjaligi fanlari akademiyasi bilan birgalikda bir hafta muddatda qishloq xoʻjaligi korxonalari mineral oʻgʻitlar, urugʻlarni dorilovchi moddalar, gerbitsidlar, haydov traktorlari va ularga ehtiyot qismlar bilan kafolatli taʼminlashga oid chora-tadbirlarni tasdiqlasinlar va ularni tayyorlov va ekish mavsumi davrida amalga oshirsinlar.

9. Oʻzbekiston Respublikasi Tashqi iqtisodiy aloqalar vazirligi, Moliya vazirligi, Tashqi iqtisodiy faoliyat milliy banki 1997-yil mart oyiga qadar “KEYS” firmasining 400 ta haydov traktori va 200 ta gʻalla oʻrish kombaynini sotib olish imkoniyatlarini, ularni xarid qilishning moliyaviy manbalarini aniqlagan holda, oʻrganib chiqsinlar.

10. “Oʻzdavneftmahsulot” birlashmasi, “Oʻzkimyosanoat” uyushmasi ekish mavsumi davrida yonilgʻi-moylash materiallarini, mineral oʻgʻitlarni va urugʻlarni dorilovchi moddalarni, schyotlarida mablagʻlari boʻlmagan xoʻjaliklarga oldindan 15 foizlik toʻlovlarsiz, qarzlarni xoʻjaliklarga avans toʻlovlari toʻlanishiga qarab uzish sharti bilan, uzluksiz berilishini taʼminlasinlar.

11. “Oʻzistiqbolstat” davlat qoʻmitasi Qishloq xoʻjaligi vazirligi bilan birgalikda boshoqli don ekinlari ekilgan maydonlarning hammasini nazorat oʻlchovidan oʻtkazsinlar Vazirlar Mahkamasiga mazkur masala boʻyicha axborot 1996-yil 15-noyabrga qadar taqdim etilsin.

12. Mazkur qarorning bajarilishini nazorat qilish Bosh vazir oʻrinbosarlari R.A. Giniyatullin va B.S. Hamidov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 27-avgust,

299-son

Vazirlar Mahkamasining 1996-yil 27-avgustdagi 299-son qaroriga 1-ILOVA

1997-yil hosili uchun boshoqli don ekinlari

EKISh MAYDONLARI

Vazirlar Mahkamasining 1996-yil 27-avgustdagi 299-son qaroriga 2-ILOVA

1997-yilgi boshoqli ekinlar doni yalpi hosili va xoʻjaliklar tomonidan uni “Oʻzdonmahsulot” korporatsiyasi korxonalariga sotish hajmlari

Vazirlar Mahkamasining 1996-yil 27-avgustdagi 299-son qaroriga 3-ILOVA

1997-yil hosili uchun kuzgi boshoqli don ekinlari ekish

jadvali

(5-ilova Oʻzbekiston Respublikasi Vazirlar Mahkamasining 1996-yil 25-dekabrdagi 458-sonli qaroriga muvofiq oʻz kuchini yoʻqotgan)