Olimpiya zaxiralari kollejlarida sport zaxirasini tayyorlash tizimini yanada takomillashtirish chora-tadbirlari toʻgʻrisida (163-son)

30.07.2010

Oʻzbekiston Respublikasi Vazirlar Mahkamasining

qarori

Olimpiya zaxiralari kollejlari bazasida yuqori klassli sportchilar va sport zaxirasi tayyorlash tizimini yanada takomillashtirish, shuningdek ularning yagona tipdagi taʼlim muassasalari sifatidagi faoliyati tartibi va shart-sharoitlarini birxillashtirish maqsadida Vazirlar Mahkamasi qaror qiladi:

1. Quyidagilar:

Olimpiya zaxiralari kollejlari toʻgʻrisidagi nizom 1-ilovaga muvofiq;

Olimpiya zaxiralari kollejlarida tekin (imtiyozli) ovqatlantirish xarajatlarini qisman qoplash uchun ota-onalar toʻlovini toʻlash tartibi toʻgʻrisidagi nizom 2-ilovaga muvofiq;

Olimpiya zaxiralari kollejlari oʻquvchilari uchun sutkalik oziq-ovqat normasi 3-ilovaga muvofiq tasdiqlansin.

2. Oʻzbekiston Respublikasi Madaniyat va sport ishlari vazirligi, Xalq taʼlimi vazirligi hamda Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazining olimpiya zaxiralari kollejlarida 7-sinfdan 9-sinfgacha oʻqitgan holda umumtaʼlim boʻgʻinlarini tashkil etish toʻgʻrisidagi taklifi qabul qilinsin.

3. Oʻzbekiston Respublikasi Madaniyat va sport ishlari vazirligi, Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Qoraqalpogʻiston Respublikasi Vazirlar Kengashi, viloyatlar hokimliklari Oʻzbekiston Respublikasi Moliya vazirligi bilan birgalikda:

2010-2011 oʻquv yilidan boshlab Jizzax, Samarqand, Tayloq, Buxoro, Nukus, Qarshi, Termiz, Fargʻona, Urganch va Namangan olimpiya zaxiralari kollejlari tuzilmasiga mavjud moddiy-texnika bazasi va quvvatlar doirasida 7-sinfdan 9-sinfgacha oʻqitgan holda umumtaʼlim boʻgʻinlarini kiritsinlar;

2010-2011 oʻquv yilidan boshlab Urganch olimpiya zaxiralari kolleji huzuridagi maktab-internatni va Fargʻona olimpiya zaxiralari kolleji huzuridagi umumtaʼlim maktabini tugatsinlar, ushbu kollejlar tuzilmasiga 7-sinfdan 9-sinfgacha oʻqitgan holda umumtaʼlim boʻgʻinlarini kiritsinlar.

4. Oʻzbekiston Respublikasi Madaniyat va sport ishlari vazirligi, Xalq taʼlimi vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi:

umumtaʼlim bilimlarining uzviyligini va sport mahoratini uzluksiz oʻstirishni taʼminlashni, shuningdek olimpiya zaxiralari kollejlari oʻquvchilarini tayyorlash yoʻnalishlarini birxillashtirishni hisobga olgan holda 2010-2011 oʻquv yili boshlangungacha davlat taʼlim standartini ishlab chiqsinlar va belgilangan tartibda tasdiqlasinlar;

Oʻzbekiston Respublikasi Mehnat va aholini ijtimoiy muhofaza qilish vazirligi hamda Moliya vazirligi bilan birgalikda olimpiya zaxiralari kollejlarining namunaviy shtatlarini, shuningdek olimpiya zaxiralari kollejlarida oʻqituvchi-trenerlar mehnatiga haq toʻlash normativlarini va tartibini ikki oy muddatda ishlab chiqsinlar va belgilangan tartibda tasdiqlasinlar.

5. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi 2010-yil 15-avgustdan boshlab 4-ilovaga muvofiq olimpiya zaxiralari kollejlari, shu jumladan ularga tegishli binolar va inshootlar, moddiy-texnika vositalari, oʻquv asbob-uskunalari hamda boshqa mol-mulkning Oʻzbekiston Respublikasi Madaniyat va sport ishlari vazirligi tasarrufiga berilishini taʼminlasin.

6. Oʻzbekiston Respublikasi Moliya vazirligi 2010-yilgi Davlat budjeti parametrlariga oʻzgartirishlar kiritsin, 2011-yildan boshlab esa Oʻzbekiston Respublikasining Davlat budjeti parametrlarida ushbu qarorning amalga oshirilishi bilan bogʻliq xarajatlarni qoplashga taʼlim sohasi uchun ajratiladigan mablagʻlar doirasida zarur mablagʻlar ajratilishini nazarda tutsin.

7. Oʻzbekiston Respublikasi Madaniyat va sport ishlari vazirligi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda boshqa manfaatdor vazirliklar va idoralar bilan birgalikda bir oy muddatda Vazirlar Mahkamasiga qonun hujjatlariga ushbu qarordan kelib chiqadigan oʻzgartirish va qoʻshimchalar yuzasidan takliflar kiritsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2010-yil 30-iyul,

163-son

Vazirlar Mahkamasining 2010-yil 30-iyuldagi 163-son qaroriga 1-ILOVA

Olimpiya zaxiralari kollejlari toʻgʻrisida

NIZOM

I. Umumiy qoidalar

1. Mazkur Nizom “Taʼlim toʻgʻrisida”, “Jismoniy tarbiya va sport toʻgʻrisida”gi Oʻzbekiston Respublikasi qonunlariga, shuningdek Kadrlar tayyorlash milliy dasturiga muvofiq Olimpiya zaxiralari kollejlarining maqomini, ular faoliyati tartibini va asosiy yoʻnalishlarini belgilaydi.

2. Olimpiya zaxiralari kolleji oʻrta maxsus, kasb-hunar taʼlimi davlat sport-taʼlim muassasasi hisoblanadi, uning faoliyati oʻrta boʻgʻin sporti sohasida yuqori malakali mutaxassislar hamda sportning olimpiya va milliy turlari, shuningdek Olimpiya oʻyinlari dasturiga kiritish uchun nomzod boʻlgan turlari boʻyicha Oʻzbekiston Respublikasining sport terma jamoalarini shakllantirish uchun sport zaxirasi tayyorlashga yoʻnaltirilgan.

Olimpiya zaxiralari kolleji oʻquvchilarni samarali tanlab olish, ularning sport mahoratini tinimsiz oʻstirish hamda olimpiya zaxirasini sifatli tayyorlash maqsadida oʻz tuzilmasida 7-sinfdan 9-sinfgacha oʻqitgan holda umumtaʼlim boʻgʻinlariga ega boʻladi.

3. Olimpiya zaxiralari kolleji oʻz faoliyatida Oʻzbekiston Respublikasi Konstitutsiyasiga, Oʻzbekiston Respublikasi qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, mazkur Nizomga hamda boshqa qonun hujjatlariga, shuningdek oʻz ustaviga amal qiladi.

4. Olimpiya zaxiralari kolleji yuridik shaxs hisoblanadi, qonun hujjatlarida nazarda tutilgan tartibda tashkil etiladi, ushbu Nizom va boshqa qonun hujjatlari, shuningdek oʻz ustavi asosida faoliyat koʻrsatadi.

5. Olimpiya zaxiralari kollejlari Oʻzbekiston Respublikasi Jismoniy tarbiya va sport vazirligi tasarrufida boʻladi, kollejlar faoliyatiga umumiy tashkiliy, oʻquv-metodik va ilmiy rahbarlik qilish, shuningdek moddiy-texnik taʼminot Qoʻmita tomonidan amalga oshiriladi.

Olimpiya zaxiralari kollejlariga umumiy taʼlim hamda oʻrta maxsus, kasb-hunar taʼlimi dasturlari boʻyicha oʻquv-metodik rahbarlik qilish Davlat taʼlim standartlariga muvofiq Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan amalga oshiriladi.

6. Olimpiya zaxiralari kolleji sportning ommalashtirilayotgan turlari boʻyicha oʻquv-mashq mashgʻulotlarini taʼminlashi hamda tegishli sport bazasiga ega boʻlishi lozim.

7. Sport zaxirasini tayyorlash olib borilayotgan sport turlari hamda olimpiya zaxiralari kolleji oʻquvchilari kontingenti olimpiya zaxiralari kolleji taqdimnomasiga koʻra Oʻzbekiston Respublikasi Jismoniy tarbiya va sport vazirligi tomonidan tasdiqlanadi.

Olimpiya zaxiralari kolleji umumiy kontingenti 600 nafar oʻquvchidan iborat etib shakllantiriladi, umumiy va oʻrta maxsus, kasb-hunar taʼlimi boʻgʻinlari boʻyicha — 300 nafardan.

Toshkent shahridagi Oʻzbekiston Respublikasi Jismoniy tarbiya va sport vazirligi huzuridagi Respublika olimpiya zaxiralari kolleji umumiy kontingenti 660 nafar oʻquvchidan iborat etib shakllantiriladi, umumiy va oʻrta maxsus, kasb-hunar taʼlimi boʻgʻinlari boʻyicha — 330 nafardan.

8. Olimpiya zaxiralari kolleji 3810201 “Sport” mutaxassisligi, sportning tanlangan turlari boʻyicha trener-oʻqituvchi kasbini bergan holda kadrlar tayyorlaydi.

Olimpiya zaxiralari kollejiga boshqa mutaxassisliklar boʻyicha oʻquvchilar qabul qilinishiga yoʻl qoʻyilmaydi.

9. Olimpiya zaxiralari kollejida oʻqish:

umumiy taʼlim dasturi boʻyicha — 3 yil;

oʻrta maxsus, kasb-hunar taʼlimi dasturi boʻyicha — 3 yil.

10. Oʻquv dasturini oʻzlashtirgan va yakuniy davlat attestatsiyasidan oʻtgan olimpiya zaxiralari kolleji bitiruvchilariga oʻrta maxsus, kasb-hunar taʼlimi toʻgʻrisida davlat namunasidagi diplom beriladi, umumtaʼlim boʻgʻinlarining 9-sinflari bitiruvchilariga oʻrta maʼlumot toʻgʻrisida davlat namunasidagi attestat beriladi.

Diplomga oʻzlashtirilgan umumtaʼlim fanlari va maxsus fanlar, soatlar hajmi va ular boʻyicha baholar koʻrsatilgan varaqa ilova qilinadi.

Olimpiya zaxiralari kollejini bitirganlik toʻgʻrisidagi diplom egallangan mutaxassislikka muvofiq mehnat faoliyatini amalga oshirish, yoxud oʻqishning kelgusi bosqichida taʼlim olishni davom ettirish huquqini beradi.

II. Olimpiya zaxiralari kollejining maqsadi, vazifalari va uning faoliyatini tashkil etish

11. Quyidagilar olimpiya zaxiralari kollejining maqsadi hisoblanadi:

oʻquvchilarni chuqurlashtirilgan ixtisosli oʻqitish, har tomonlama kamol toptirish va ularning sport mutaxassisliklari va kasblarini egallashini taʼminlash;

yosh sportchilarni istiqlol gʻoyalariga sadoqat, vatanparvarlik va fidoyilik ruhida tayyorlash, ularda oʻz Vatani uchun faxrlanish va milliy madaniy-tarixiy anʼanalarni hurmat qilish tuygʻusini shakllantirish.

12. Quyidagilar olimpiya zaxiralari kollejining asosiy vazifalari hisoblanadi:

olimpiya zaxiralari kollejlarining umumtaʼlim boʻgʻini 9-sinflari bitiruvchilaridan eng iqtidorli sportchilarni, sport ixtisosidagi maktab-internatlarda, bolalar va oʻsmirlar sport maktablarida, olimpiya zaxiralari ixtisoslashtirilgan bolalar va oʻsmirlar sport maktablarida hamda ixtisoslashtirilgan bolalar va oʻsmirlar sport maktablarida dastlabki tayyorgarlikdan oʻtgan sportchilarni olimpiya zaxiralari kollejlarida oʻqishni davom ettirish uchun tanlab olish;

respublika va xalqaro sport musobaqalarida qatnashish uchun sport zaxirasini sport terma jamoalari tarkibiga tayyorlash;

oʻquvchi-sportchilarning respublika va xalqaro sport musobaqalarida ishtirok etishi uchun zarur va yetarli boʻlgan kasbiy moyilligini, mahorati va koʻnikmalari chuqur rivojlantirilishini taʼminlash, sport tayyorgarligi taʼlimining navbatdagi bosqichlarida oʻqishini, shuningdek egallangan mutaxassislik boʻyicha mehnat faoliyati bilan shugʻullanishni davom ettirish;

mutaxassislar va sport zaxirasini sifatli tayyorlash uchun zarur tashkiliy, oʻquv-metodik, moddiy-texnik va psixologik-pedagogik shart-sharoitlarni taʼminlash;

davlat taʼlim standarti doirasida umumtaʼlim va kasb-hunar oʻquv dasturlarini amalga oshirish;

oʻquv-tarbiya jarayonining sogʻlomlashtiruvchi yoʻnalishini amalga oshirish uchun shart-sharoitlarni taʼminlash, sogʻlom turmush tarzi normalarini joriy etish.

13. Olimpiya zaxiralari kollejlarida taʼlim va sport tayyorgarligi mazmuni, taʼlim va oʻquv-mashq jarayonini tashkil etish davlat taʼlim standartlari asosida ishlab chiqilgan oʻquv rejalari va dasturlari bilan belgilanadi.

14. Olimpiya zaxiralari kollejlari oʻquvchilarining ijtimoiy kafolatlari va ularni qoʻllab-quvvatlash qonun hujjatlarida, shuningdek kollej ustavida belgilanadi.

15. Olimpiya zaxiralari kollejining oʻqish, sport tayyorgarligi, mehnat va dam olish uchun zarur shart-sharoitlar yaratish boʻyicha faoliyati, oʻquvchilar va xodimlarning yashash sharoitlari, shuningdek ularning taʼminoti qonun hujjatlarida belgilangan tartibda amalga oshiriladi.

III. Respublika olimpiya zaxiralari kollejining faoliyati xususiyatlari

16. Toshkent shahridagi Oʻzbekiston Respublikasi Jismoniy tarbiya va sport vazirligi huzuridagi Respublika olimpiya zaxiralari kolleji sport sohasida oʻrta maxsus boʻgʻin mutaxassislari tayyorlash boʻyicha bazaviy oʻrta maxsus, kasb-hunar taʼlimi muassasasi hisoblanadi hamda quyidagi asosiy vazifalarni bajaradi:

seleksiya ishlari olib borish va istiqbolli sportchilarni tanlash, shu jumladan yuqori sport yutuqlariga ega boʻlgan olimpiya zaxiralari boshqa kollejlarining yosh sportchilari boʻlgan oʻquvchilar kontingentidan oʻtkazish hisobiga istiqbolli sportchilarni tanlash;

oʻquvchilarning aniq maqsadga yoʻnaltirilgan nazariy va jismoniy tayyorgarligi, ularni tayyorlashning oʻquv-mashq jarayoniga ilgʻor sport-psixologiya texnologiyalarini joriy etish;

olimpiya zaxiralari kollejlari faoliyatiga uslubiy rahbarlik qilish.

17. Seleksiya ishlari, boshqa sport maktablari va maktab-internatlar oʻquvchilari, olimpiya zaxiralari kollejlari oʻquvchilari kontingentidan yuqori sport yutuqlariga erishgan eng istiqbolli va iqtidorli oʻquvchilarni Respublika olimpiya zaxiralari kollejiga qabul qilish va oʻtkazish tartibi Oʻzbekiston Respublikasi Jismoniy tarbiya va sport vazirligi tomonidan Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi va Xalq taʼlimi vazirligi bilan birgalikda belgilanadi.

IV. Olimpiya zaxiralari kollejlariga oʻquvchilar qabul qilish, oʻquv-tarbiya jarayonini tashkil etish va uning mazmuni

18. Olimpiya zaxiralari kollejiga oʻqishga qabul qilish respublika hududida yashayotgan, qoidaga koʻra, sportga ixtisoslashgan maktab-internatlarda, bolalar-yoshlar sport maktablarida va olimpiya zaxiralari ixtisoslashtirilgan bolalar-yoshlar sport maktablarida va ixtisoslashtirilgan bolalar va oʻsmirlar sport maktablarida dastlabki tayyorgarlikdan oʻtgan sportga qobiliyati eng iqtidorli oʻquvchilar orasidan tanlab olish asosida amalga oshiriladi.

19. Olimpiya zaxiralari kollejiga oʻquvchilar belgilangan tartibda umumtaʼlim boʻgʻinining 7-sinfiga va oʻrta maxsus, kasb-hunar taʼlimi boʻgʻinining 1-kursiga qabul qilinadi.

Olimpiya zaxiralari kolleji umumtaʼlim boʻgʻinining 7-sinfiga oʻquvchilar tanlov shartlari boʻyicha va 6-sinfdagi oʻzlashtirish tabeli asosida qabul qilinadi.

Olimpiya zaxiralari kolleji oʻrta maxsus, kasb-hunar taʼlimining 1-kursiga oʻquvchilar oʻrta maʼlumot toʻgʻrisidagi attestat asosida;

olimpiya zaxiralari kolleji umumtaʼlim boʻgʻini 9-sinflari bitiruvchilari orasidan kollej attestatsiya komissiyasi qaroriga koʻra;

umumtaʼlim maktablari va maktab-internatlarning 9-sinflari bitiruvchilari orasidan tanlab olish shartlari boʻyicha qabul qilinadi.

20. Olimpiya zaxiralari kollejiga yigit va qizlar jinsi, tili, irqi, millati, diniy mansubligi, ijtimoiy kelib chiqishi, mashgʻuloti turi, ijtimoiy mavqei, yashash joyi, Oʻzbekiston Respublikasi hududida qancha vaqt yashaganligidan qatʼi nazar, qabul qilinadi.

Xorijiy fuqarolar Oʻzbekiston Respublikasining xalqaro shartnomalariga muvofiq tanlab olish tartibida qabul qilinadi.

21. Olimpiya zaxiralari kollejiga oʻquvchilar qabul qilish qonun hujjatlarida belgilangan tartibda amalga oshiriladi.

22. Olimpiya zaxiralari kollejiga qabul qilingan oʻquvchilar:

umumtaʼlim va maxsus sport fanlari boʻyicha oʻqish;

oʻquv-mashq jarayonida va sport musobaqalarida ishtirok etish;

olimpiya zaxiralari kolleji oʻquvchilari uchun sutkalik oziq-ovqat normasiga muvofiq oziq-ovqat bilan taʼminlanish;

olimpiya zaxiralari kollejining moddiy-texnika bazasi va mol-mulkidan bepul foydalanish;

oʻquvchilar va talabalar yashaydigan uyda bepul yashash;

oʻqishni boshqa taʼlim muassasasiga koʻchirish huquqiga egadir.

23. Olimpiya zaxiralari kollejining oʻquv sinflari va guruhlari 30 kishidan iborat boʻladi. Oʻquvchilar oʻqitish kurslari boʻyicha guruhlarga, shuningdek umumtaʼlim boʻgʻinlari sinflariga, sport tayyorgarligi yoʻnalishlari boʻyicha esa — boʻlinmalarga birlashadi.

24. Oʻqitish kursi va umumtaʼlim boʻgʻini sinfini tugallash yakunlari boʻyicha reyting nazorati natijalari asosida oʻquvchilarni navbatdagi kursga va umumtaʼlim boʻgʻinining navbatdagi sinfiga oʻtkazish toʻgʻrisida qaror qabul qilinadi. Oʻquvchilarni kursdan kursga va umumtaʼlim boʻgʻini sinfidan sinfiga oʻtkazish taʼlim muassasasi direktorining buyrugʻi bilan amalga oshiriladi. Shartli ravishda oʻtkazishlarga yoʻl qoʻyilmaydi.

25. Oʻquvchilarni olimpiya zaxiralari kollejidan boshqa taʼlim muassasasiga oʻtkazish Oʻzbekiston Respublikasi Xalq taʼlimi vazirligi va Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi tomonidan belgilanadigan tartibda amalga oshiriladi.

26. Oʻquvchi-sportchilarni olimpiya zaxiralari kollejidan chetlatish:

boshqa taʼlim muassasasiga koʻchirishda, shu jumladan oʻquvchilarning oʻz tashabbusi bilan koʻchirishda (ularning ota-onalari yoki ularning oʻrnini bosuvchi shaxslarning arizasi asosida);

akademik oʻzlashtirmaslikda va tegishli normativ talablar topshirilmaganda, sport natijasi pasayganda va tibbiy nomuvofiqlik holatlarida qonun hujjatlarida belgilangan tartibda amalga oshiriladi. Koʻrsatib oʻtilgan hollarda oʻquvchilarni kollejdan chetlatish olimpiya zaxiralari kolleji attestatsiya komissiyasining qaroriga koʻra bir yilda ikki marta amalga oshiriladi;

oʻquv intizomi va olimpiya zaxiralari kollejining ichki tartibi qoidalari buzilganda, shu jumladan axloqsizlik, sport odobi, sport tayyorgarligi rejimi buzilgan, shu jumladan taqiqlangan farmokologik, alkogolli va giyohvand vositalar qoʻllanilgan taqdirda qonun hujjatlarida belgilangan tartibda amalga oshiriladi.

27. Oʻquv yili 2-sentabrda boshlanadi va oʻquv rejasiga muvofiq tugallanadi.

28. Olimpiya zaxiralari kollejida oʻqish kunduzgi shaklda amalga oshiriladi. Oʻquv mashgʻulotlarining qancha davom etishi, oʻquvchilarning oʻquv yuklamasi va oʻquv-tarbiya jarayonining boshqa masalalari Umumiy va oʻrta maxsus, kasb-hunar taʼlimi davlat standartlariga muvofiq belgilanadi.

29. Olimpiya zaxiralari kollejining oʻquv rejasi Davlat taʼlim standartlariga muvofiq amalga oshiriladigan umumtaʼlim fanlarini, maxsus va sport tayyorgarligi fanlarini oʻz ichiga oladi.

30. Oʻquv rejalari va dasturlari Oʻzbekiston Respublikasi Jismoniy tarbiya va sport vazirligi tomonidan Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda Xalq taʼlimi vazirligi bilan kelishgan holda tasdiqlanadi.

31. Olimpiya zaxiralari kolleji oʻquv rejasiga muvofiq oʻquv, oʻquv-mashq va tarbiyaviy ishlarni tashkil etish shakllari va usullarini belgilaydi.

Oʻquv dasturlari quyidagi shakllarda oʻquv rejasiga muvofiq amalga oshiriladi: oʻquv darsi, maʼruza, seminar, laboratoriya ishi, amaliy mashgʻulotlar, kurs ishi, mustaqil tayyorgarlik.

Guruhda va yakka tartibdagi oʻquv-mashq mashgʻulotlarida, oʻquv-mashq yigʻinlarida, sport musobaqalarida qatnashish oʻquv-tarbiya jarayonining asosiy shakllari hisoblanadi.

32. Olimpiya zaxiralari kolleji oʻquvchilarning sport mahorati darajasini qoʻllab-quvvatlash va oshirish maqsadida taʼtil vaqtida oʻquv yilida 60 kungacha davom etadigan oʻquv-mashq yigʻinlari oʻtkazgan holda oʻquvchilarning faol dam olishini tashkil etishi mumkin.

33. Taʼlim sifati va sport tayyorgarligini nazorat qilish Umumiy va oʻrta maxsus, kasb-hunar taʼlimi davlat taʼlim standarti talablariga muvofiq amalga oshiriladi.

V. Olimpiya zaxiralari kollejini boshqarish

34. Olimpiya zaxiralari kollejini boshqarish yakka boshchilik, demokratiya, oʻzini oʻzi boshqarish va oshkoralik prinsiplarini birga qoʻshib olib borish asosida Oʻzbekiston Respublikasi qonun hujjatlariga muvofiq amalga oshiriladi.

35. Taʼlim dasturlarini ishlab chiqish va birxillashtirish, pedagog kadrlar bilan taʼminlash, mutaxassislarni tayyorlash va qayta tayyorlash Oʻzbekiston Respublikasi Jismoniy tarbiya va sport vazirligi tomonidan Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda Xalq taʼlimi vazirligi bilan birgalikda amalga oshiriladi.

36. Olimpiya zaxiralari kollejiga sport sohasida tegishli oliy maʼlumotga va sport-taʼlim muassasalarida kamida 5 yil amaliy ish tajribasiga ega boʻlgan shaxslar orasidan qonun hujjatlarida belgilangan tartibda Oʻzbekiston Respublikasi Jismoniy tarbiya va sport vazirligi tomonidan lavozimga tayinlanadigan va lavozimdan ozod qilinadigan direktor boshchilik qiladi.

37. Direktor olimpiya zaxiralari kolleji faoliyatiga umumiy rahbarlik qiladi, oʻquvchilarning oʻqishi va tarbiyalanishi, oʻquv rejalari va dasturlari bajarilishi, moliya-xoʻjalik faoliyati amalga oshirilishi uchun javob beradi, qonun hujjatlarida belgilangan tartibda xodimlarning belgilangan soni va mehnatga haq toʻlash fondi doirasida xodimlarning shtat jadvalini hamda trenerlar va pedagoglar tarkibining tarif roʻyxatlarini tasdiqlaydi.

Direktor:

olimpiya zaxiralari kolleji nomidan ish koʻradi, uning manfaatlarini ifodalaydi, qonun hujjatlarida belgilangan tartibda uning mol-mulkini tasarruf etadi va shartnomalar tuzadi;

olimpiya zaxiralari kolleji vakolatiga kiradigan masalalar boʻyicha qarorlar qabul qiladi va taʼlim muassasasiga yuklangan vazifalar va funksiyalar bajarilishi uchun shaxsan javob beradi;

oʻz oʻrinbosarlari vakolatlarini belgilaydi, ular oʻrtasida vazifalarni taqsimlaydi;

oʻz vakolatlari doirasida olimpiya zaxiralari kollejining oʻquvchilari va barcha xodimlari uchun majburiy boʻlgan buyruqlar chiqaradi va koʻrsatmalar beradi;

olimpiya zaxiralari kollejining oʻquv-moddiy bazasini mustahkamlash, oʻquv-mashq va oʻquv-tarbiyaviy ishlarni takomillashtirish, malakali pedagog kadrlar, trenerlar bilan butlash hamda olimpiya zaxiralari kolleji faoliyatining boshqa masalalari boʻyicha ayrim masalalarni koʻrib chiqish uchun davlat boshqaruvi tegishli organlariga kiritadi;

pedagoglar va boshqa xodimlar bilan mehnat shartnomalari tuzadi va ularni toʻxtatadi;

qonun hujjatlariga muvofiq boshqa vakolatlarni amalga oshiradi.

38. Olimpiya zaxiralari kollejida direktor huzuridagi kollegial organ hisoblanadigan pedagogika kengashi, shuningdek Direktor jamgʻarmasidan xodimlarni ragʻbatlantirish masalalari boʻyicha maxsus komissiya tashkil etiladi.

Pedagogika kengashining asosiy vazifalari va funksiyalari olimpiya zaxiralari kollejining ustavida belgilanadi.

39. Olimpiya zaxiralari kollejida vasiylar, davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlarning vakillarida iborat boʻladigan vasiylik kengashi tuziladi.

40. Olimpiya zaxiralari kollejini attestatsiyadan oʻtkazish va akkreditatsiya qilish qonun hujjatlarida belgilangan tartibda amalga oshiriladi.

VI. Taʼlim jarayoni qatnashchilari

41. Oʻquvchilar, oʻqituvchilar va trenerlar tarkibi, tarbiyachilar va tibbiyot xodimlari, oʻquvchilarning ota-onalari (ularning oʻrnini bosuvchi shaxslar) olimpiya zaxiralari kolleji taʼlim jarayonining qatnashchilari hisoblanadilar.

42. Olimpiya zaxiralari kolleji oʻquvchilariga oʻqishga qabul qilinganlaridan keyin oʻquvchi bileti va belgilangan namunadagi reyting daftarchasi (olimpiya zaxiralari kollejining 1 — 3-kurslari oʻquvchilari uchun) beriladi.

Olimpiya zaxiralari kolleji oʻquvchilari Davlat taʼlim standartlariga muvofiq bepul umumiy va oʻrta maxsus, kasb-hunar taʼlimi olish, qoʻshimcha taʼlim xizmatlaridan foydalanish, taʼlim muassasasining ustavida belgilangan shaklda taʼlim muassasasini boshqarishda ishtirok etish huquqiga egadir.

Olimpiya zaxiralari kolleji oʻquvchilari olimpiya zaxiralari kolleji ustaviga rioya qilishi shart.

43. Tegishli kasb taʼlimiga, kasbiy tayyorgarlikka ega boʻlgan va yuksak axloqiy fazilatli shaxslar olimpiya zaxiralari kollejida pedagogik faoliyat bilan shugʻullanish huquqiga egadir. Sud qarori bilan pedagogik faoliyat bilan shugʻullanishi taqiqlangan shaxslar hamda sudlanganligi olib tashlanmagan yoki sudlanganligi qoplanmagan shaxslar pedagogik faoliyat bilan shugʻullanishga qoʻyilmaydi.

44. Oʻqituvchilar va trener-oʻqituvchilar tarkibini, tarbiyachilar va tibbiyot xodimlarini olimpiya zaxiralari kollejiga ishga qabul qilish qonun hujjatlarida belgilangan tartibda amalga oshiriladi.

45. Olimpiya zaxiralari kollejining oʻqituvchilar va trener-oʻqituvchilar tarkibini, tarbiyachilari va tibbiyot xodimlarini attestatsiyadan oʻtkazish qonun hujjatlarida belgilangan tartibda vakolatli davlat organi tomonidan amalga oshiriladi.

46. Oʻqituvchilar va trenerlarning oʻquv-pedagogik yuklamasi qonun hujjatlarida belgilangan normativlarga muvofiq aniqlanadi.

47. Oʻqituvchilar va trener-oʻqituvchilar tarkibini tayyorlash, qayta tayyorlash va ularning malakasini oshirish qonun hujjatlarida belgilangan tartibda amalga oshiriladi.

48. Pedagog xodimlar va trener-oʻqituvchilarning huquqlari va vazifalari qonun hujjatlariga va olimpiya zaxiralari kolleji ustaviga muvofiq belgilanadi.

49. Oʻquvchilarning ota-onalari (ularning oʻrnini bosuvchi shaxslar) olimpiya zaxiralari kollejining taʼlim faoliyati bilan tanishish huquqiga egadirlar.

VII. Tibbiy-biologik taʼminlash

50. Tibbiyot xodimlari sport boʻyicha trener-oʻqituvchilar bilan birgalikda trenirovka mashgʻulotlari, oʻquv-trenirovka yigʻinlari, sport musobaqalari, dam olish davrida oʻquvchilarni tibbiy nazoratdan oʻtkazadilar. Sport boʻyicha oʻqituvchilar tibbiy kuzatuvlar natijalaridan sportchilar tayyorlashning yakka tartibdagi rejalariga tuzatishlar kiritish uchun foydalanadilar.

51. Olimpiya zaxiralari kolleji oʻquvchilarni tibbiy taʼminlash maqsadida funksional tashxis va salomatlikni tiklash tadbirlari uchun salomatlikni tiklash markaziga, zarur bino va asbob-uskunalarga ega boʻladi.

52. Oʻzbekiston Respublikasi Jismoniy tarbiya va sport vazirligi sportchilarni tanlab olish va ularning funksional tayyorgarligi holati yuzasidan tashxis qoʻyish, davolash-profilaktika tadbirlari va sportchilarning salomatligini tiklash jarayonlarini maqbullashtirish uchun olimpiya zaxiralari kollejini Oʻzbekiston Respublikasi Davlat budjetidan har yili ajratiladigan mablagʻlar doirasida tegishli apparatlar, zarur reaktivlar va dori-darmonlar bilan taʼminlaydi.

VIII. Olimpiya zaxiralari kolleji faoliyatini moliyaviy va moddiy taʼminlash

53. Olimpiya zaxiralari kollejini moliyaviy taʼminlash qonun hujjatlarida belgilangan tartibda:

Oʻzbekiston Respublikasi Davlat budjetidan ajratiladigan mablagʻlar;

taʼlim xizmatlarini amalga oshirishdan, pedagogika, ishlab chiqarish va olimpiya zaxiralari kollejining ustavdagi vazifalariga muvofiq boʻlgan boshqa faoliyat turlaridan olingan daromadlar;

olimpiya zaxiralari kolleji oʻquvchilarini tekin (imtiyozli) ovqatlantirish xarajatlarini qisman qoplash uchun ota-onalar toʻlovi;

yuridik va jismoniy shaxslarning ixtiyoriy ehsonlari va maqsadli badallari;

qonun hujjatlarida taqiqlanmagan boshqa manbalar hisobiga amalga oshiriladi.

54. Olimpiya zaxiralari kolleji qonun hujjatlarida belgilangan tartibda tasdiqlangan va tegishli moliya organlarida roʻyxatdan oʻtkazilgan xarajatlar smetasi asosida moliyalashtiriladi.

55. Olimpiya zaxiralari kolleji xodimlarining ish haqi qonun hujjatlariga muvofiq belgilanadi.

56. Olimpiya zaxiralari kolleji oʻzining moliya-xoʻjalik faoliyatini budjet va budjetdan tashqari mablagʻlar doirasida amalga oshiradi.

Olimpiya zaxiralari kollejining moliyaviy mablagʻlari gʻaznachilik shaxsiy hisob raqamlarida turadi va ulardan qonun hujjatlariga hamda olimpiya zaxiralari kolleji ustaviga muvofiq foydalaniladi.

57. Olimpiya zaxiralari kollejining moddiy mablagʻlari, binolari, sport inshootlari va asbob-uskunalari uning xoʻjalik tasarrufida boʻladi va ulardan ustavdagi vazifalarni hal etish uchun foydalaniladi.

Olimpiya zaxiralari kollejining ustaxonalar, laboratoriyalar va boshqa obyektlar bilan taʼminlanganligi Davlat taʼlim standarti talablariga muvofiq oʻrta maxsus, kasb-hunar taʼlimi taʼlim jarayonini moddiy-texnik taʼminlash normativlari bilan belgilanadi.

58. Olimpiya zaxiralari kolleji belgilangan tartibda oʻz ishlari natijalarining tezkor va buxgalteriya hisobini amalga oshiradi, statistik va buxgalteriya hisobotlarini yuritadi.

59. Olimpiya zaxiralari kollejida xoʻjalik va moliya intizomiga rioya etilishini nazorat qilish qonun hujjatlariga muvofiq amalga oshiriladi.

IX. Xalqaro faoliyat

60. Olimpiya zaxiralari kolleji quyidagi huquqlarga ega:

qonun hujjatlariga muvofiq taʼlim hamda jismoniy tarbiya va sport masalalari boʻyicha xalqaro faoliyatni amalga oshirish;

Oʻzbekiston Respublikasi Jismoniy tarbiya va sport vazirligi hamda boshqa tashkilotlar liniyasi boʻyicha xalqaro sport musobaqalarida qatnashish, Oʻzbekiston Respublikasi Vazirlar Mahkamasining tegishli yoki mutasaddilik qiladigan Kompleksi rahbari tomonidan tasdiqlangan Oʻzbekiston Respublikasi Jismoniy tarbiya va sport vazirligining Sport va ommaviy jismoniy tarbiya tadbirlarining kalendar rejasiga muvofiq chet mamlakatlarda oʻquv-trenirovka yigʻinlarini oʻtkazish;

olimpiya zaxiralari kollejining trener-pedagoglar tarkibi xodimlarini va sportchilarini almashish, qoʻshma sport tadbirlari, bayramlar, koʻriklar, seminarlar va shu kabilarni oʻtkazish boʻyicha xorijiy sport tashkilotlari bilan belgilangan tartibda bitimlar tuzish.

61. Olimpiya zaxiralari kolleji qonun hujjatlarida belgilangan tartibda xorijiy mamlakatlar uchun mutaxassislar tayyorlashni amalga oshirishi mumkin.

62. Olimpiya zaxiralari kolleji Oʻzbekiston Respublikasi Vazirlar Mahkamasining tegishli yoki mutasaddilik qiladigan Kompleksi rahbari tomonidan tasdiqlangan Oʻzbekiston Respublikasi Jismoniy tarbiya va sport vazirligining Sport va ommaviy jismoniy tarbiya tadbirlarining kalendar rejasiga muvofiq xorijga (tajriba almashish, tajriba orttirish, turli tadbirlar, sport musobaqalari, olimpiadalar va shu kabilarda qatnashish maqsadida) yuborish uchun sportchilar va trenerlar tanlashni amalga oshirishi mumkin.

X. Yakuniy qoida

63. Olimpiya zaxiralari kollejini qayta tashkil etish va tugatish qonun hujjatlarida belgilangan tartibda amalga oshiriladi.

Vazirlar Mahkamasining 2010-yil 30-iyuldagi 163-son qaroriga 2-ILOVA

Olimpiya zaxiralari kollejlarida tekin (imtiyozli) ovqatlantirish xarajatlarini qisman qoplash uchun ota-onalar toʻlovini toʻlash tartibi toʻgʻrisida

NIZOM

Ushbu Nizom Olimpiya zaxiralari kollejlarida tekin (imtiyozli) ovqatlantirish xarajatlarini qisman qoplash uchun ota-onalar toʻlovi miqdorini hamda toʻlash va undan foydalanish tartibini belgilaydi.

I. Umumiy qoidalar

1. Olimpiya zaxiralari kollejlari oʻquvchilari, shu jumladan umumtaʼlim boʻgʻini oʻquvchilari olimpiya zaxiralari kollejlari oʻquvchilari uchun sutkalik oziq-ovqat normasiga muvofiq, ota-onalar toʻlovi hisobiga xarajatlarni qisman qoplagan holda, tekin (imtiyozli) oziq-ovqat bilan taʼminlanadilar.

2. Olimpiya zaxiralari kollejida ota-onalar toʻlovi eng kam oylik ish haqining bir baravari miqdorida undiriladi.

3. Olimpiya zaxiralari kollejlarining boshqa joydan kelgan, oʻquvchilar va talabalar yotoqxonalarida yashaydigan oʻquvchilarini oziq-ovqat bilan taʼminlash olimpiya zaxiralari kollejlari oʻquvchilari uchun — sutkalik oziq-ovqat normasining 100 foizidan, qolgan oʻquvchilar uchun esa — olimpiya zaxiralari kollejlari oʻquvchilari sutkalik oziq-ovqat normasining 50 foizi miqdoridan kelib chiqqan holda amalga oshiriladi.

Oʻquvchilarni oziq-ovqat bilan taʼminlash xarajatlarini moliyalashtirish, ota-onalar toʻlovidan tushadigan summani hisobga olgan holda, olimpiya zaxiralari kollejida oʻqitishning tegishli boʻgʻini oʻquvchilari uchun sutkalik oziq-ovqat normasining hosil boʻladigan qiymatining 75 foizi miqdorida amalga oshiriladi.

4. Qishki va yozgi taʼtillar davrida (60 kungacha) olimpiya zaxiralari kollejlarida oʻtkaziladigan oʻquv-trenirovka yigʻinlari vaqtida olimpiya zaxiralari kollejlari oʻquvchilari oziq-ovqat bilan ushbu Nizomning 3-bandida koʻrsatilgan shartlarda taʼminlanadilar.

II. Ota-onalar toʻlovini toʻlash tartibi

5. Olimpiya zaxiralari kollejlariga ota-onalar toʻlovi ota-onalar (ularning oʻrnini bosuvchi shaxslar) va olimpiya zaxiralari kollejlari maʼmuriyati oʻrtasida tuziladigan shartnoma asosida toʻlanadi.

6. Olimpiya zaxiralari kollejiga ota-onalar toʻlovi har oyda, toʻlanadigan joriy oyning oʻninchi kunidan kechikmay toʻlanadi. Ota-onalar (ularning oʻrnini bosuvchi shaxslar) xohishiga koʻra ota-onalar toʻlovi yanada uzoq muddatlar uchun toʻlanishi mumkin.

Ota-onalar toʻlovi ushbu bandning birinchi xat boshida koʻrsatilgan muddatdan keyin bir hafta mobaynida toʻlanmagan taqdirda olimpiya zaxiralari kollejlari oʻquvchisiga tekin (imtiyozli) oziq-ovqat berish toʻlov toʻlanadigan vaqtgacha toʻxtatiladi.

7. Ota-onalar toʻlovi bankka toʻlanadi, keyinchalik olimpiya zaxiralari kollejiga toʻlov toʻlanganligini tasdiqlovchi toʻlov hujjatining nusxasi (kvitansiyasi) taqdim etiladi.

Ota-onalar toʻlovi naqd pulsiz shaklda toʻlangan taqdirda olimpiya zaxiralari kollejiga toʻlov topshiriqnomasining nusxasi (toʻlov toʻlanganligi toʻgʻrisidagi bank belgisi bilan) taqdim etiladi.

8. Olimpiya zaxiralari kolleji boʻyicha ota-onalar toʻlovi hududiy tegishli gʻaznachilik hisob raqamlariga, keyinchalik ulardan foydalanish uchun olimpiya zaxiralari kollejining gʻaznachilik boʻlinmalaridagi hisob raqamlariga oʻtkaziladi.

III. Olimpiya zaxiralari kollejida ota-onalar toʻlovini hisoblash

9. Olimpiya zaxiralari kollejiga ota-onalar toʻlovining bir kunlik miqdorini hisoblash ota-onalar (ularning oʻrnini bosuvchi shaxslarning) bir oylik toʻlovi miqdorini qonun hujjatlariga muvofiq olimpiya zaxiralari kollejining oylik ish jadvali boʻyicha ish kunlari soniga taqsimlash yoʻli bilan amalga oshiriladi.

10. Olimpiya zaxiralari kolleji oʻquvchisi oʻzining yoki oila aʼzolarining (u parvarish qilishga majbur boʻlgan) kasalligi sababli kollejga ketma-ket uch kundan ortiq kelmagan davr uchun toʻlov ota-onalar toʻlovini keyingi toʻlash chogʻida oʻquvchi kollejga kelmagan davr uchun hisoblab yozilgan tegishli summani ushbu nizomning 9-bandiga muvofiq chegirish yoʻli bilan hisoblab chiqariladi.

Oʻquvchining yoki uning oila aʼzolarining kasalligi (karantin) sababli olimpiya zaxirasi kollejiga kelmaganligi tegishli davolash muassasasi bergan maʼlumotnoma bilan yoki uchastka vrachi tomonidan tasdiqlanishi kerak.

Oʻquvchi olimpiya zaxiralari kollejiga kelmagan boshqa barcha hollarda ota-onalar toʻlovi umumiy asoslar boʻyicha undiriladi.

11. Ota-onalar (ularning oʻrnini bosuvchi shaxslar) oʻquvchi olimpiya zaxiralari kollejiga kelishi boshqa taʼlim muassasasiga oʻtishi munosabati bilan toʻxtashidan kamida bir hafta oldin bu toʻgʻrida olimpiya zaxiralari kolleji maʼmuriyatini yozma ravishda xabardor qilishi kerak. Olimpiya zaxiralari kolleji xabardor qilinmagan taqdirda ota-onalar toʻlovi sifatida toʻlangan toʻlov qayta hisob-kitob qilinmaydi va qaytarib berilmaydi.

12. Pul mablagʻlarini ota-onalarga (ularning oʻrnini bosuvchi shaxslarga) qaytarib berish tegishli summani ota-onalardan (ularning oʻrnini bosuvchi shaxslardan) birining bankdagi hisob raqamiga oʻtkazish yoʻli bilan amalga oshiriladi.

13. Oʻquvchi Olimpiya zaxiralari kollejlari toʻgʻrisidagi Nizomning 26-bandida koʻrsatilgan sabablarga koʻra olimpiya zaxiralari kollejidan chetlatilgan taqdirda ota-onalar toʻlovi sifatida ilgari toʻlangan toʻlov qayta hisob-kitob qilinmaydi va qaytarib berilmaydi, oʻquvchi oʻz xohishiga koʻra boshqa taʼlim muassasasiga oʻtgan hollar bundan mustasno.

IV. Kam taʼminlangan oilalardagi oʻquvchilarni ota-onalar toʻlovidan ozod qilish tartibi

14. Oʻzbekiston Respublikasi Prezidentining “Oʻzbekiston Respublikasining 2010-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida” 2009-yil 22-dekabrdagi PQ-1245-son qaroriga muvofiq kam taʼminlangan oilalar oʻquvchilari ota-onalar toʻlovini toʻlashdan har qaysi olimpiya zaxiralari kollejidagi jami oʻquvchilarning koʻpi bilan 30 foizi ozod qilinadi.

Bunda kam taʼminlangan oilalarning ota-onasi (ulardan biri yoki ikkalasi ham) I yoki II guruh nogironlari boʻlgan oʻquvchilari ota-onalar toʻlovidan birinchi navbatda ozod qilinadilar.

15. Fuqarolarning mahalliy oʻzini oʻzi boshqarish organlari tomonidan berilgan kam taʼminlangan oila toʻgʻrisidagi maʼlumotnoma oʻquvchilarni ota-onalar toʻlovidan ozod qilish uchun asos hisoblanadi.

Ushbu hujjat belgilangan tartibda koʻrib chiqish uchun olimpiya zaxiralari kollejiga taqdim etiladi.

16. Kam taʼminlangan oilalarning ota-onalar toʻlovidan (rejalashtirilayotgan oʻquvchilar umumiy sonining 30 foizi doirasida) ozod qilinayotgan oʻquvchilari roʻyxati moliya yili boshlangungacha, ota-onalar kengashi yigʻilishi protokoli asosida olimpiya zaxiralari kolleji direktorining buyrugʻi bilan tasdiqlanadi.

17. Roʻyxatdagi tarkib oʻquvchilar olimpiya zaxiralari kollejidan batamom ketishi sababli oʻzgargan taqdirda roʻyxat roʻyxatga kirmagan kam taʼminlangan oilalarning oʻquvchilaridan shakllantiriladigan zaxira hisobiga toʻldiriladi. Roʻyxat unga birinchi navbatda oilaning har bir aʼzosi hisobiga umumiy oylik daromad darajasi eng past boʻlgan kam taʼminlangan oilalar oʻquvchilarini kiritish qoidasiga rioya etilgan holda toʻldiriladi.

Kam taʼminlangan oilalar oʻquvchilarini oziq-ovqat bilan taʼminlash xarajatlarini moliyalashtirish olimpiya zaxiralari kolleji oʻquvchilari uchun sutkalik oziq-ovqat normasi hosil boʻladigan qiymatining 75 foizi miqdorida amalga oshiriladi.

V. Buxgalteriya hisobi va hisobot

18. Olimpiya zaxiralari kollejiga ota-onalar toʻlovi boʻyicha mablagʻlarni hisoblash va tushishining buxgalteriya hisobi tegishli olimpiya zaxiralari kollejining buxgalteriyasi tomonidan, belgilangan tartibda amalga oshiriladi.

VI. Yakuniy qoidalar

19. Olimpiya zaxiralari kollejlarining rahbarlari va bosh buxgalterlari ota-onalar toʻlovidan tushadigan mablagʻlardan maqsadli foydalanilishi uchun javob beradilar.

20. Ota-onalar toʻlovidan tushgan mablagʻlardan maqsadli foydalanilishini nazorat qilish belgilangan tartibda amalga oshiriladi.

21. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradilar.

Vazirlar Mahkamasining 2010-yil 30-iyuldagi 163-son qaroriga 3-ILOVA

Olimpiya zaxiralari kollejlari oʻquvchilari uchun sutkalik oziq-ovqat normasi*

Izoh. * Ushbu norma — eng yuqori norma. Olimpiya zaxiralari kollejlari oʻquvchilari uchun aniq normalar sport turi, oʻquvchilarning yoshi va jinsiga, shuningdek oʻquv boʻgʻiniga qarab amaldagi sanitariya normalari va qoidalariga muvofiq belgilanadi.

Vazirlar Mahkamasining 2010-yil 30-iyuldagi 163-son qaroriga 4-ILOVA

Hududiy jismoniy tarbiya va sport boshqarmalari tasarrufiga berilayotgan olimpiya zaxiralari kollejlari

ROʻYXATI

T/r Kollej nomi Hududiy boshqarma 1. Nukus olimpiya zaxiralari kolleji — Qoraqalpogʻiston Respublikasi Jismoniy tarbiya va sport vazirligi 2. Andijon olimpiya zaxiralari kolleji — Andijon viloyati jismoniy tarbiya va sport boshqarmasi 3. Buxoro olimpiya zaxiralari kolleji — Buxoro viloyati jismoniy tarbiya va sport boshqarmasi 4. Jizzax olimpiya zaxiralari kolleji — Jizzax viloyati jismoniy tarbiya va sport boshqarmasi 5. Qarshi olimpiya zaxiralari kolleji — Qashqadaryo viloyati jismoniy tarbiya va sport boshqarmasi 6. Navoiy olimpiya zaxiralari kolleji — Navoiy viloyati jismoniy tarbiya va sport boshqarmasi 7. Namangan olimpiya zaxiralari kolleji — Namangan viloyati jismoniy tarbiya va sport boshqarmasi 8. Samarqand olimpiya zaxiralari kolleji — Samarqand viloyati jismoniy tarbiya va sport boshqarmasi 9. Guliston olimpiya zaxiralari kolleji — Sirdaryo viloyati jismoniy tarbiya va sport boshqarmasi 10. Tayloq olimpiya zaxiralari kolleji — Samarqand viloyati jismoniy tarbiya va sport boshqarmasi 11. Termiz olimpiya zaxiralari kolleji — Surxondaryo viloyati jismoniy tarbiya va sport boshqarmasi 12. Chirchiq olimpiya zaxiralari kolleji — Toshkent viloyati jismoniy tarbiya va sport boshqarmasi 13. Fargʻona olimpiya zaxiralari kolleji — Fargʻona viloyati jismoniy tarbiya va sport boshqarmasi 14. Urganch olimpiya zaxiralari kolleji — Xorazm viloyati jismoniy tarbiya va sport boshqarmasi 15. Toshkent shahar* Respublika olimpiya zaxiralari kolleji — Oʻzbekiston Respublikasi Jismoniy tarbiya va sport vazirligi

Izoh. *Tashkil etilgan kundan buyon (1961-yil) Oʻzbekiston Respublikasi Jismoniy tarbiya va sport vazirligi tasarrufidadir.