Qishloq xoʻjaligi ishlab chiqarishini zamonaviy texnika bilan taʼminlash yuzasidan birinchi navbatdagi chora-tadbirlar toʻgʻrisida (263-son)

25.07.1996

Oʻzbekiston Respublikasi Vazirlar Mahkamasining

qarori

[Koʻchirma]

Qishloq xoʻjaligi ishlab chiqarishini yuqori unumli mexanizatsiya vositalari bilan taʼminlash uchun zarur shart-sharoitlar yaratish maqsadida Vazirlar Mahkamasi qaror qiladi:

1. 1996 — 2000-yillarda quyidagi birinchi navbatdagi vazifalar amalga oshirilishini nazarda tutadigan Qishloq xoʻjaligi ishlab chiqarishini zamonaviy texnika bilan taʼminlash dasturining asosiy yoʻnalishlariga rozilik berilsin:

dvigatellar, boshoqli don ekinlari va paxta yetishtirish va ularni yigʻishtirib olish uchun yuqori unumli traktorlar, mashinalar va asbob-uskunalar ishlab chiqarishni tashkil etish;

ilgʻor xorijiy firmalar bilan birgalikda qoʻshma korxonalar tashkil etish;

vatanimizda ishlab chiqarilayotgan mashinalarni ularning konstruksiyasida ana shunday xorijiy mashinalarning ilgʻor elementlaridan foydalangan holda modernizatsiya qilish;

xarid qilinadigan murakkab texnikani yigʻishni Oʻzbekistonda tugallagan holda ayrim uzellar va yigʻuv birliklari ishlab chiqarilishini tashkil etish.

2. “Oʻzistiqbolstat” davlat qoʻmitasi, Oʻzbekiston Respublikasi Moliya vazirligi Qishloq xoʻjaligi ishlab chiqarishini zamonaviy texnika bilan taʼminlash dasturini Oʻzbekiston Respublikasining Investitsiya dasturiga kiritsinlar, bunda markazlashtirilgan tartibda nazarda tutilgan mablagʻlardan mablagʻ ajratilishini taʼminlasinlar.

3. “Oʻzqishloqxoʻjalikmash-xolding” kompaniyasining:

ilmiy-tadqiqot, tajriba-konstruktorlik ishlarini, ishlab chiqarishni texnika bilan jihozlash va tayyorlashni amalga oshirish haqidagi 1-ilovaga* muvofiq taklifi;

* 1-ilova berilmaydi.

jahon traktor va qishloq hoʻjaligi mashinasozligining ilgʻor yetakchi xorijiy firmalari bilan 2-ilovaga* muvofiq qoʻshma korxonalar tashkil etish haqidagi taklifi qabul qilinsin.

* 2-ilova berilmaydi.

Oʻzbekiston Respublikasi Moliya vazirligi 1997-yil budjetida mablagʻ bilan taʼminlashning markazlashtirilgan manbalari hisobidan zarur mablagʻlar ajratilishini nazarda tutsin.

4. “Oʻzqishloqxoʻjalikmash-xolding” kompaniyasi 2-ilovada koʻrsatilgan xorijiy sheriklar bilan birgalikda qoʻshma korxonalarning texnik-iqtisodiy asoslanishi va taʼsis hujjatlarini ishlab chiqsin, ularni belgilangan tartibda ekspertizadan oʻtkazsin va Vazirlar Mahkamasiga taklif kiritsin.

6. Oʻzbekiston Qishloq xoʻjaligi fanlari akademiyasi, Qishloq xoʻjaligi vazirligi, “Oʻzqishloqxoʻjaliktaʼminottuzatish” davlat-kooperativ qoʻmitasi manfaatdor tashkilotlarni jalb qilgan holda:

Oʻzbekistonda qishloq xoʻjalik ekinlari yetishtirish xususiyatlarini hisobga olgan holda yangi texnika namunalarini sinab koʻrish va ularga baho berish;

koʻrsatib oʻtilgan texnikadan foydalanish, ularga xizmat koʻrsatish va saqlashning samarali shakllarini tashkil etish;

yangi texnikada ishlash uchun mexanizator kadrlarni bosqichma-bosqich tayyorlash yuzasidan chora-tadbirlar majmuini ishlab chiqsinlar va amalga oshirsinlar.

7. “Oʻzqishloqxoʻjalikmash-xolding” kompaniyasi har yarim yillik yakunlari boʻyicha Vazirlar Mahkamasiga ushbu Dasturning qanday bajarilayotganligi toʻgʻrisida axborot taqdim etsin.

8. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 25-iyul,

263-son