Zahiriddin Muhammad Bobur tavalludining 510 yilligiga tayyorgarlik koʻrish va uni oʻtkazish haqida (308-son)

23.06.1993

Oʻzbekiston Respublikasi Vazirlar Mahkamasining

qarori

Oʻzbek klassik adabiyotining ulkan namoyandasi, atoqli davlat arbobi va sarkarda Zahiriddin Muhammad Bobur tavalludiga 510 yil toʻlishi munosabati bilan Bobur ijodiyotining adabiyotimiz va madaniyatimiz tarixida, ijtimoiy fikr taraqqiyotida muhim oʻrin tutishini hisobga olib, Vazirlar Mahkamasi qaror qiladi:

1. 1993-yilda Zahiriddin Muhammad Bobur tavalludining 510 yilligi Oʻzbekiston Respublikasida keng miqyosida nishonlansin. hamda bu sanaga tayyorgarlik koʻrish va uni oʻtkazish respublika yubiley komissiyasi ilovaga muvofiq tuzilsin.

2. Yubiley komissiyasi bir hafta muddat ichida Zahiriddin Muhammad Bobur tavalludining 510 yilligiga tayyorgarlik koʻrish va uni oʻtkazish tadbirlarini ishlab chiqib, bajarishga kirishsin.

3. 1993-yilning noyabr oyida Alisher Navoiy nomidagi Davlat akademik opera va balet Katta teatrida Zahiriddin Muhammad Bobur tavalludining 510 yilligiga bagʻishlangan tantanali yigʻilish oʻtkazilsin.

4. Andijon viloyati hokimligi Oʻzbekiston Respublikasi Madaniyat ishlari vazirligi hamda boshqa manfaatdor vazirliklar va idoralar bilan birgalikda Andijon shahrida Zahiriddin Muhammad Boburga yodgorlik oʻrnatish, Bobur muzeyi va boshqa inshootlarni qoʻrish, shoir nomi bilan bogʻliq qadamjolarni taʼmirlash ishlarini yubileyga qadar tugallash chora-tadbirlarini koʻrsin.

5. Oʻzbekiston Respublikasi Fanlar akademiyasi tegishli viloyatlarning hokimliklari, Yozuvchilar uyushmasi va boshqa tashkilotlar bilan birgalikda Toshkent, Andijon, Samarqand, Shahrisabz shaharlarida ilmiy konferensiyalar oʻtkazsin.

6. Oʻzbekiston Respublikasi Madaniyat ishlari vazirligi, davlat kinokompaniyasi va davlat teleradiokompaniyasi Zahiriddin Muhammad Bobur nomi bilan bogʻliq asarlarni respublika teatrlarida. sahnalashtirish, uning hayoti va ijodiy yoʻli haqida hujjatli va badiiy filmlar yaratish, Bobur gʻazallari bilan aytiluvchi qoʻshiqlardan iborat videokonsert dasturini tayyorlash choralarini koʻrsinlar.

7. Oʻzbekiston Respublikasi Davlat matbuot qoʻmitasi aloqador tashkilotlar bilan birgalikda 1993-1994-yillarda Zahiriddin Muhammad Bobur asarlarini nashr qilsin;

Bobur hayoti va ijodi haqida plakatlar, bukletlar, taqvimlar chiqarsin.

8. Respublika ommaviy axborot vositalariga Bobur hayoti va ijodini, tavalludining 510 yilligiga tayyorgarlikning borishini keng yoritish tavsiya qilinsin.

9. Andijon shahridagi yubiley inshootlarini taʼmirlash, qoʻrish va obodonchilik ishlari uchun sarf-xarajatlar smetasi 280 million soʻm miqdorida tasdiqlansin hamda koʻrsatilgan mablagʻ respublika budjetidan Andijon viloyati hokimligiga oʻtkazilsin. Oʻzbekiston Respublikasi Moliya vazirligi Toshkent shahrida yubiley tantanalarini oʻtkazish xarajatlarini Madaniyat ishlari vazirligi taqdim etgan sarf-xarajatlar hisoboti asosida respublika budjetidan qoplasin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari M. Qoraboyev va K. Toʻlaganov oʻrtoqlar zimmalariga yuklatilsin.

Vazirlar Mahkamasining Raisi I. KARIMOV

Toshkent sh.,

1993-yil 23-iyun,

308-son

Vazirlar Mahkamasining 1993-yil 23-iyundagi 308-son qaroriga ILOVA

Zahiriddin Muhammad Bobur tavalludining 510 yilligiga tayyorgarlik koʻrish va uni oʻtkazish komissiyasining

TARKIBI