OʻzSSJ Fanlar akademiyasining suv muammolari institutini tashkil etish toʻgʻrisida (195-son)
20.07.1991
Oʻzbekiston SSJ Prezidenti huzuridagi Vazirlar Mahkamasining
qarori
Orol dengizi havzasida ekologik muammolar keskinlashgan sharoitda suv muammolariga doir koʻlamdor tadqiqotlarni rivojlantirish, suv resurslaridan oqilona foydalanishning, ularni muhofaza etishning ilmiy asoslarini yaratish maqsadida Vazirlar Mahkamasi qaror qiladi:
1. OʻzSSJ Fanlar akademiyasining SSJI Fan va texnika davlat qoʻmitasi, SSJI Fanlar akademiyasi, OʻzSSJ Iqtisodiyot qoʻmitasi, OʻzSSJ Melioratsiya va suv xoʻjaligi vazirligi, Oʻzbekiston SSJ Davlat suv xoʻjaligi qurilishi qoʻmitasi, “SANIIRI” ilmiy-ishlab chiqarish birlashmasi bilan kelishilgan OʻzSSJ Fanlar akademiyasining Suv muammolari institutini tashkil etish toʻgʻrisidagi taklifi qabul qilinsin.
2. OʻzSSJ Fanlar akademiyasi Suv muammolari institutining jumhuriyat tarmoq ilmiy-tadqiqot institutlari va oliy oʻquv yurtlari kafedralari ishtirokida amalga oshiriladigan ilmiy faoliyatining bosh yoʻnalishlari quyidagilardan iborat deb hisoblansin:
quruqlik gidrologiyasini va antropogen taʼsir sharoitlarida suv resurslari rejimi kattaligi va sifatining shakllanish jarayonlari gidrogeologiyasini hamda qonuniyatlarini atroflicha oʻrganish;
suv manbalarini muhofaza qilish yuzasidan ekologik talablarni, ularning holatini baholashning mezonlarini hamda yer usti va yer osti suvlari rejimi va sifatini boshqarishning iqtisodiy usullarini ishlab chiqish;
cheklangan suv manbalaridan kompleks foydalanishning ilmiy asoslarini ishlab chiqish, irrigatsiya-gidroenergetika va boshqa xalq xoʻjaligi komplekslari muammolari shunga kiradi;
yer usti va yer osti suvlari gidrodinamikasi, suv xoʻjaligi tizimlarini boshqarish va kompyuterlashtirish muammolarini nazariy oʻrganish (gidrodinamika jarayonlarini va nam koʻchishini matematik va raqamli modellashtirish, oʻzan jarayonlari va daryo gidravlikasining oʻzgarishi, tuproqning suv va shamol eroziyasi);
bozor iqtisodiyotiga oʻtish sharoitida suv manbalaridan oqilona foydalanish bilan bogʻliq boʻlgan tashkiliy va iqtisodiy muammolarni tadqiq etish;
yangi yerlarni sugʻorish va qishloq xoʻjaligi mahsuloti yetishtirish uchun atmosfera yogʻinlaridan foydalanish muammolarini oʻrganish;
sugʻoriladigan dehqonchilikda, sanoatda, kommunal xoʻjaligida suvdan foydalanishning suvni tejaydigan texnologiyalarini qoʻllash, mintaqada ekologik muvozanatni tiklash va saqlashning ilmiy asoslarini ishlab chiqish;
foydalanib boʻlingan va minerallashgan suvlardan tizim ichida foydalanishning nazariy-tajriba hamda ekologik asoslarini, suv manbalarining bir qismini mintaqalararo qayta burish muammolarini oʻrganish.
3. OʻzSSJ Fanlar akademiyasining Suv muammolari instituti mehnatga haq toʻlash shartlari boʻyicha 1-toifaga kiritilsin.
OʻzSSJ Fanlar akademiyasi Rayosati Suv muammolari institutining Ustavini, apparatning tuzilishini va OʻzSSJ Moliya vazirligi bilan kelishgan holda xodimlarning chegaraviy sonini tasdiqlasin.
4. Tadqiqotlarni rivojlantirishga bir yoʻla davlat yordami koʻrsatish tartibida Suv muammolari instituti uchun 1991-yilda jumhuriyat Hukumatining rezerv fondidan 400 ming soʻm budjet mablagʻi ajratilsin, OʻzSSJ Fanlar akademiyasi esa koʻrsatilgan maqsadlar uchun 200 ming soʻm mablagʻ topsin.
OʻzSSJ Iqtisodiyot qoʻmitasi, OʻzSSJ Moliya vazirligi mazkur qarorning 2-bandida belgilangan vazifalardan kelib chiqqan holda 1992-yildan boshlab OʻzSSJ Fanlar akademiyasining Suv muammolari instituti uchun mablagʻ ajratishni nazarda tutsinlar.
5. “SANIIRI” ilmiy-ishlab chiqarish birlashmasi, Toshkent shahar ijroiya qoʻmitasi Yakub Kolas va Mayakovskiy koʻchalari chegaralaridagi hududni, shuningdek, u yerda joylashgan binolar va inshootlarni, Toshkent viloyatidagi Kalinin tajriba-ishlab chiqarish xoʻjaligini 1992-yilning 1-iyuligacha OʻzSSJ Fanlar akademiyasiga belgilangan tartibda bosqichma-bosqich berishni amalga oshirsinlar.
6. OʻzSSJ Iqtisodiyot qoʻmitasi, OʻzSSJ Moddiy-texnika taʼminoti davlat-kooperativ qoʻmitasi, “Oʻzselxozsnabremont”, OʻzSSJ Savdo vazirligi OʻzSSJ Fanlar akademiyasining buyurtmasi boʻyicha Suv muammolari instituti uchun limitlar ajratishni va birkitilgan nomenklatura boʻyicha mebellar, asbob-uskunalar yetkazib berishni taʼminlasinlar.
7. OʻzSSJ Aloqa vazirligi belgilangan tartibda OʻzSSJ Fanlar akademiyasining Suv muammolari institutini telefonlashtirish masalalarini hal qilsin.
8. OʻzSSJ Melioratsiya va suv xoʻjaligi vazirligi, OʻzSSJ Qishloq xoʻjaligi vazirligi, Oʻzbekiston SSJ Davlat suv xoʻjaligi qurilishi qoʻmitasi, “SANIIRI” ilmiy-ishlab chiqarish birlashmasi, VASXNIL Oʻrta Osiyo boʻlimi shartnomaga koʻra OʻzSSJ Fanlar akademiyasining Suv muammolari instituti tomonidan mavjud bazalarda tajriba-sinov ishlarini oʻtkazish imkoniyatini bersinlar.
9. Koʻlamdor va amaliy tadqiqotlarning oʻzaro aloqadorligini, kompleksliligini taʼminlash maqsadlarida OʻzSSJ Fanlar akademiyasi Suv muammolari institutining tematik rejalarini qarab chiqish va shakllantirishni jumhuriyat qishloq xoʻjaligi va suv xoʻjaligi organlarining ishtirokida amalga oshirish maqsadga muvofiq deb hisoblansin.
10. OʻzSSJ Qishloq xoʻjaligi vazirligi, OʻzSSJ Melioratsiya va suv xoʻjaligi vazirligi, Oʻzbekiston SSJ Davlat suv xoʻjaligi qurilishi qoʻmitasi, jumhuriyatning boshqa vazirliklari va idoralari xalq xoʻjaligi obyektlarini qayta tiklashni loyihalashtirishda OʻzSSJ Fanlar akademiyasi Suv muammolari institutining takliflarini hisobga olsinlar, mavjud ishlanmalarni joriy qilish uchun imkoniyat yaratsinlar va bunda zarur yordam koʻrsatsinlar.
Vazirlar Mahkamasining Raisi I. KARIMOV
Toshkent sh.,
1991-yil 20-iyul,
195-son