Mustaqillik bayramiga tayyorgarlik koʻrish va uni oʻtkazish toʻgʻrisida (PQ-102-son)

15.06.2005

Oʻzbekiston Respublikasi Prezidentining

Qarori

Eng ulugʻ, eng aziz umummilliy bayramimiz — Mustaqillik kunini keng nishonlash istiqlol yillarida muhim ijtimoiy-siyosiy voqeaga, qutlugʻ anʼanaga aylanib qoldi. Ayniqsa, keyingi yillarda bu bayramni mamlakatimiz poytaxti Toshkent shahrida, Qoraqalpogʻiston Respublikasi va viloyatlar markazlarida, barcha shahar, tuman va qishloqlarda uyushqoqlik bilan, yuksak saviyada oʻtkazishga katta eʼtibor berilayotganini qayd etish zarur.

Bugungi kunda xalqimiz mustaqillikning mohiyati va ahamiyatini avvalo oʻzligimizni anglash, biz kimlarning, qanday buyuk zotlarning avlodi ekanimizni chuqur idrok etish, milliy va umuminsoniy qadriyatlar uygʻunligi ruhida yashash, istiqlol gʻoyalarini yurtdoshlarimiz, xususan, yosh avlod qalbi va ongiga yanada teran singdirish, jahon hamjamiyatidan munosib oʻrin egallash, demokratik davlat, fuqarolik jamiyati barpo etishning eng asosiy va muhim sharti, milliy taraqqiyotimiz kafolati sifatida qabul qilayotgani alohida eʼtiborga sazovor.

Mustaqillik bayramining katta tarixiy-siyosiy ahamiyatini nazarda tutib hamda bu ulugʻ sananing 14 yilligini munosib nishonlash maqsadida:

1. Mustaqillik bayramiga tayyorgarlik koʻrish va uni oʻtkazish boʻyicha respublika komissiyasining tarkibi 1-ilovaga, Toshkent shahrida oʻtkaziladigan asosiy bayram tomoshasi dasturini tayyorlash boʻyicha ijodiy guruh tarkibi 2-ilovaga, bayramning badiiy dasturi uchun gʻoyaviy tavsiyalar 3-ilovaga muvofiq tasdiqlansin.

2. Respublika va hududiy komissiyalar Mustaqillik bayramini poytaxt Toshkent shahrida, Qoraqalpogʻiston Respublikasi va viloyatlar markazlarida, yurtimizdagi barcha shahar, tuman va qishloqlarda yuqori saviyada uyushqoqlik bilan oʻtkazishga qaratilgan tashkiliy-amaliy tadbirlar ishlab chiqsin va amalga oshirsin.

3. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, tegishli vazirlik va idoralar oʻn kun muddatda:

— Mustaqillik bayramini oʻtkazish boʻyicha takliflar ishlab chiqib, respublika komissiyasiga taqdim etsin;

— joylarda oʻtkaziladigan bayram dasturlarini ishlab chiqish va tayyorlash uchun yangi ijodiy kuchlarni, yosh isteʼdod egalarini keng jalb qilsin;

— bayramga tayyorgarlik koʻrish va uni oʻtkazish boʻyicha hududiy komissiyalarning tarkibini xavfsizlik va jamoat tartibini saqlash nuqtai nazaridan qayta koʻrib chiqsin.

4. Mustaqillik bayramiga tayyorgarlik koʻrish va uni oʻtkazish boʻyicha respublika komissiyasi, ommaviy tadbirlar, badiiy dastur va tomoshalarning maʼno-mazmuniga oid taklif va mulohazalarni umumlashtirgan holda, Toshkent shahri, Qoraqalpogʻiston Respublikasi va barcha viloyatlarda oʻtkaziladigan bayram tadbirlarining umumiy gʻoyaviy-badiiy konsepsiyasini ishlab chiqsin (3-ilovada bayon etilgan gʻoyalar, tushuncha va qarashlar asosida).

5. Mustaqillik bayramini oʻtkazish bilan bogʻliq xarajatlarni moliyalashtirish Vazirlar Mahkamasining 2004-yil 23-iyuldagi 357-son qarorining 3-bandida belgilangan tartibda amalga oshirilishi maʼlumot uchun qabul qilinsin.

6. Oʻzbekiston Respublikasi Adliya vazirligi manfaatdor vazirliklar va idoralar bilan birgalikda bir oy muddatda qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

Oʻzbekiston Respublikasi Prezidenti I. KARIMOV

Toshkent sh.,

2005-yil 15-iyunya,

PQ-102-son

Oʻzbekiston Respublikasi Prezidentining 2005-yil 15-iyundagi PQ-102-son qaroriga 1-ILOVA

Mustaqillik kuni bayramiga tayyorgarlik koʻrish va uni oʻtkazish boʻyicha respublika komissiyasining

TARKIBI

Oʻzbekiston Respublikasi Prezidentining 2005-yil 15-iyundagi PQ-102-son qaroriga 2-ILOVA

Toshkent shahrida oʻtkaziladigan mustaqillik bayrami dasturini yaratish boʻyicha ijodiy guruh

TARKIBI

Oʻzbekiston Respublikasi Prezidentining 2005-yil 15-iyundagi PQ-102-son qaroriga 3-ILOVA

Mustaqillik bayramining badiiy dasturi uchun gʻoyaviy

TAVSIYALAR

Mustaqillik bayramiga tayyorgarlik koʻrish va uni oʻtkazish boʻyicha tadbirlarga maʼnaviy-maʼrifiy ishlarning maʼno-mohiyatini, ularning siyosiy ahamiyati va oʻziga xos jihatlarini chuqur tushunadigan yangi ijodiy kuchlarni — taniqli adabiyot va sanʼat namoyandalarini, ijrochi va xonanda, bastakor va rejissorlarni jalb etish zarur.

Mustaqillik kuniga bagʻishlab Toshkent shahri, Qoraqalpogʻiston Respublikasi va barcha viloyat markazlarida oʻtkaziladigan bayram dasturlarining mazmuni, asosiy yoʻnalishlari, falsafasi, umuman, gʻoyaviy-badiiy konsepsiyasini ishlab chiqishda quyidagilarga alohida eʼtibor qaratish maqsadga muvofiqdir.

1. Avvalo, Andijon voqealarini hisobga olgan holda, bu yilgi bayramning badiiy dasturini tayyorlashga butunlay yangicha asosda yondashish, bu sana bilan bogʻliq ommaviy-maʼrifiy tadbirlarni koʻtarinki ruhda tashkil etish.

“Oʻzbek xalqi hech qachon, hech kimga qaram boʻlmaydi!” degan daʼvatni dasturning bosh gʻoyasi sifatida mujassam etish.

Mustaqillikning mohiyati va ahamiyatini, xalqimizning istiqlol yillarida bosib oʻtgan murakkab va tarixiy yoʻlini, erishgan ulkan marra va yutuqlarini, Vatanga muhabbat va sadoqat tuygʻusini badiiy-falsafiy yoʻsinda ifodalash.

2. “Mustaqillik — bu huquq” ekanini har tomonlama chuqur aks ettirish.

Faqat mustaqillik orqaligina shaxs oʻz qadr-qimmati, or-nomusi va gʻururini anglashi, “Men — odamman, men — erkin insonman” degan tuygʻu-tushunchani his etib yashashi mumkinligini, istiqlol — inson huquq va erkinliklarini taʼminlashning asosiy omili ekanini ochib berish.

3. “Bu muqaddas zamin — mening Vatanim, ajdodlarimning tabarruk xoki yotgan bu tuproqni himoya qilish uchun soʻnggi tomchi qonim qolguncha kurashishga tayyorman” degan azmu qaror bilan yashayotgan ming-minglab asl insonlarning koʻnglidagi hissiyotni taʼsirchan lavhalarda koʻrsatish, Oʻzbekistonning azal-azaldan hech kimga bosh egmagan haqiqiy mardlar yurti, er yigitlar vatani boʻlib kelganini badiiy shakllarda tasvirlash.

Xalqimizning ozodligi va mustaqilligini, ezgu orzu-intilishlarini, yuksak insoniy tuygʻularini toptashga urinadigan, ularga mensimay qaraydigan kuchlarga munosib javob berishga el-yurtimiz hamisha qodir ekanini aks ettirish.

Xalqaro terrorizm va ekstremizmga qarshi keskin kurash borayotgan bugungi kunda, ayrim kuchlar tomonidan Oʻzbekistonga nohaq taʼna va malomat toshlari otilayotgan bir paytda oʻzini shu zamin farzandi degan har qaysi insonning bu kurashdan chetda turishga, beparvo va loqayd boʻlishga haqqi yoʻq ekanini koʻrsatib berish.

4. “Men — oʻzbek farzandiman” degan gʻoyani taʼsirchan shaklda ifodalash. Bunda istiqlol tufayli hayotimizdan oʻzining munosib oʻrnini topgan, ming yillar davomida qon-qonimizga singib ketgan, ayni vaqtda hozirgi zamon bilan uygʻun boʻlgan milliy urf-odat va qadriyatlarimiz, muqaddas dinimizni asrab-avaylash va himoya qilish mavzusini keng yoritish.

5. Bugungi kunda “Biz hech kimdan kam boʻlmaganmiz va hech qachon kam boʻlmaymiz” degan daʼvat xalqimiz qalbidan chuqur joy olgani, uning ruhiy-maʼnaviy intilishlarining oʻziga xos ifodasiga aylanganini tasvirlash.

6. Oʻzbek xalqi oʻz hayotining maʼno-mazmunini farzandlarining baxti va kamoli bilan bogʻliq holda koʻrishini badiiy lavhalar orqali ifodalash. Istiqlol yillarida barkamol avlod tarbiyasi yoʻlida qanday katta ufqlar ochilayotgani, mustaqillik ana shunday beqiyos imkoniyatlar manbai ekanini badiiy gavdalantirish. Mustaqillik davrida voyaga yetgan bolalar va yoshlar hayotini, ular erishayotgan yutuq va marralarni koʻrsatish.

7. “Shuhrating porlasin toki bor jahon”. Oʻzbekistonning jahondagi obroʻ-eʼtibori yuksalib, oʻzbek nomi butun dunyoda tanilib borayotganini aks ettirish.

8. Bayram dasturlarini tayyorlashda jamiyatimizning barcha qatlam va toifalariga mansub kishilarning kayfiyati, xohish-istaklarini inobatga olish, badiiy nomer va ijrolarni, sahna bezaklarini shu mezon asosida tanlash.