Oʻzbekiston Respublikasi Prezidenti huzuridagi Vazirlar Mahkamasining tuzilmasidagi oʻzgartishlar haqida (PF-333-son)

06.02.1992

Oʻzbekiston Respublikasi Prezidentining

Farmoni

“Oʻzbekiston Respublikasining Vitse-Prezidenti lavozimini tugatish hamda Oʻzbekiston Respublikasi Bosh vaziri lavozimini taʼsis etish va Oʻzbekiston Respublikasining Konstitutsiyasi (Asosiy Qonuni)ga oʻzgartishlar kiritish toʻgʻrisida” Oʻzbekiston Respublikasining 1992-yil 4-yanvardagi Qonuniga muvofiq va Oʻzbekiston Respublikasi Bosh Vaziri oʻrtoq A. M. Mutalovning xalq xoʻjaligini boshqarish tuzilmasini yanada takomillashtirish toʻgʻrisidagi takliflarini eʼtiborga olib:

1. “Oʻzbekiston SSR Prezidenti huzuridagi Vazirlar Mahkamasining tuzilmasi toʻgʻrisida” Oʻzbekiston SSR Prezidentining 1990-yil 15-noyabrdagi 97-son Farmoni bilan taʼsis etilgan Vazirlar Mahkamasi Raisining oʻrinbosarlari — tegishli majmualarning rahbarlari lavozimlari tugatilsin;

2. Oʻrtoq T. Y. Sharipov Vazirlar Mahkamasi Raisining oʻrinbosari — Zaxiralar, moddiy-texnika taʼminoti va shartnomalar majmuining rahbari lavozimidan ozod qilinib, Oʻzbekiston Respublikasi Moddiy-texnika taʼminoti davlat-kooperativ komitetining Raisi etib tayinlansin.

3. Oʻzbekiston SSR Prezidentining Vazirlar Mahkamasi Raisining oʻrinbosari — Oʻzbekiston SSR mehnat vaziri lavozimlarini qoʻshish toʻgʻrisida 1991-yil 8-may 205-son Farmonining Oʻzbekiston SSR Prezidenti huzuridagi Vazirlar Mahkamasi Raisining oʻrinbosariga taalluqli qismi;

— Oʻzbekiston SSR Prezidentining Vazirlar Mahkamasi Raisining oʻrinbosari — yengil sanoat mollari ishlab chiqarish boʻyicha Oʻzbekiston davlat uyushmasi boshqaruvining Raisi lavozimlarini qoʻshish toʻgʻrisida 1991-yil 15-maydagi 208-son Farmonining Oʻzbekiston SSR Prezidenti huzuridagi Vazirlar Mahkamasi Raisining oʻrinbosariga taalluqli qism oʻz kuchini yoʻqotgan deb hisoblansin.

Oʻzbekiston Respublikasining Prezidenti I. KARIMOV

Toshkent sh.,

1992-yil 6-fevral,

PF-333-son