SSJI pensiya fondining Oʻzbekiston Jumhuriyat boʻlimini tashkil etish toʻgʻrisida (9-son)

14.01.1991

Oʻzbekiston SSJ Prezidenti huzuridagi Vazirlar Mahkamasining

qarori

Vazirlar Mahkamasi qaror qiladi:

1. SSJI Ministrlar Soveti va VSSPSning “SSJI Pensiya fondini tashkil etish toʻgʻrisida” 1990-yil 15-avgustdagi 818-son qarori bilan:

“SSJIda fuqarolarning pensiya taʼminoti toʻgʻrisida” va “Harbiy xizmatchilarning pensiya taʼminoti toʻgʻrisida” SSJI Qonunlariga muvofiq pensiya taʼminotini moliyaviy boshqarishning davlat organi sifatida SSJI Pensiya fondi tashkil etilganligi;

SSJI Pensiya fondi mustaqil moliya bank sistemasi sifatida belgilab qoʻyilganligi (SSJI Pensiya fondining pul mablagʻlari davlat budjeti tarkibiga kirmaydi);

muxtor jumhuriyatlar, oʻlkalar va viloyatlarda filiallari boʻlgan ittifoqdosh jumhuriyatlardagi boʻlimlar SSJI Pensiya fondining boshqaruv organlari sifatida belgilab qoʻyilganligi maʼlumot uchun qabul qilinsin.

2. SSJI Pensiya fondining Oʻzbekiston jumhuriyat boʻlimi tashkil etilsin.

3. SSJI Pensiya fondining Oʻzbekiston jumhuriyat boʻlimiga quyidagilar yuklatilsin:

“SSJIda fuqarolarning pensiya taʼminoti toʻgʻrisida” va “Harbiy xizmatchilarning pensiya taʼminoti toʻgʻrisida” SSJI Qonunlariga muvofiq pensiya toʻlash, shuningdek, bolalarga nafaqa toʻlash sarf-xarajatlarini mablagʻ bilan taʼminlash;

jumhuriyat hududidagi toʻlovchilar tomonidan sugʻurta badallarini SSJI Pensiya fondiga oʻz vaqtida oʻtkazish ishlarini tashkil etish;

soliq organlari bilan birgalikda sugʻurta mablagʻlarining fond hisobiga oʻz vaqtida va toʻla tushishini nazorat qilishni amalga oshirish;

SSJI Pensiya fondi mablagʻlarining jumhuriyat boʻlimining tasdiqlangan budjetiga muvofiq oqilona sarflanishini taʼminlash.

Mazkur qaror qabul qilinishi bilan korxonalar, muassasalar, tashkilotlar va kooperativlar, amal qilayotgan mulkchilik va xoʻjalik yuritish shaklidan qatʼi nazar, shuningdek, ayrim fuqarolarni shartnoma boʻyicha yollovchi shaxslar ijtimoiy sugʻurta fondiga oʻtkaziladigan mablagʻlarni chegirib tashlab, SSJI Pensiya fondiga SSJI Vazirlar Kengashi va VSSPS belgilagan miqdorlarda davlat ijtimoiy sugʻurtasi uchun badallar oʻtkazadilar.

Xodimlari yoshi boʻyicha imtiyozli shartlarda pensiyaga chiqish huquqiga ega boʻlgan korxonalar va tashkilotlar SSJI Pensiya fondiga sugʻurta badallari bilan bir qatorda mehnatga haq toʻlashga moʻljallangan mablagʻlar hisobidan “SSJIda fuqarolarning pensiya taʼminoti toʻgʻrisida” SSJI Qonunining 14-moddasiga muvofiq belgilangan miqdorlarda qoʻshimcha ajratmalarni kiritadilar.

Yakka tartibdagi mehnat faoliyati bilan shugʻullanuvchi, shu jumladan, yakka (guruh boʻlib) ijara shartlari boʻyicha yoki shaxsiy dehqon xoʻjaligida ishlovchi fuqarolar SSJI Pensiya fondiga SSJI Vazirlar Kengashi va VSSPS belgilagan tartibda badal toʻlaydilar.

4. Oʻzbekiston SSJ Davlat televideniye va radio eshittirish qoʻmitasi, gazeta va jurnallar tahririyatlari SSJI Pensiya fondining Oʻzbekiston jumhuriyat boʻlimi bilan birgalikda fondning maqsad va vazifalari toʻgʻrisida keng tushuntirish ishlarini olib borsinlar.

5. OʻzSSJ Iqtisodiyot qoʻmitasi, OʻzSSJ Davlat moddiy-texnika taʼminoti qoʻmitasi 1991-yil rejasida SSJI Pensiya fondining Oʻzbekiston jumhuriyat boʻlimiga, uning Qoraqalpogʻiston MSSJ, viloyatlar va Toshkent shahridagi filiallariga belgilangan tartibda birkitilgan nomenklatura boʻyicha moddiy-texnika resurslari ajratishni nazarda tutsinlar.

6. SSJI Pensiya fondining Oʻzbekiston jumhuriyat boʻlimida Boshqaruvchining ikkita, shu jumladan, bitta birinchi oʻrinbosari hamda yetti kishidan iborat Boshqaruvi boʻlishiga ruxsat berilsin,

Boshqaruvchining oʻrinbosarlarini lavozimga tayinlash va ularni lavozimdan ozod qilish SSJI Pensiya fondi Oʻzbekiston jumhuriyat boʻlimining taqdimnomasiga binoan Oʻzbekiston SSJ Prezidenti huzuridagi Vazirlar Mahkamasi tomonidan amalga oshiriladi.

Vazirlar Mahkamasining Raisi I. KARIMOV

Toshkent sh.,

1991-yil 14-yanvar,

9-son