11-modda. Arxiv hujjatlarini Milliy arxiv fondi tarkibidan chiqarish

Milliy arxiv fondining davlatga tegishli qismi tarkibiga kiritilgan arxiv hujjatlari faqat yoʻqolgan yoki yemirilgan hollarda Milliy arxiv fondining davlatga tegishli qismi tarkibidan chiqarilishi mumkin.

Yoʻqolgan arxiv hujjatlarini Milliy arxiv fondi tarkibidan chiqarish tegishli huquqni muhofaza qiluvchi organlarning yoki sudning qarori olinganidan keyin amalga oshiriladi.

“Oʻzarxiv” agentligi arxiv hujjatlarini Milliy arxiv fondi tarkibidan chiqarish yoki chiqarmaslik toʻgʻrisida “Oʻzarxiv” agentligining Markaziy ekspert tekshiruv komissiyasi xulosasiga asosan qaror qabul qiladi.

Arxiv hujjatlarini Milliy arxiv fondining davlatga tegishli boʻlmagan qismi tarkibiga oʻtkazish yoki undan chiqarish “Oʻzarxiv” agentligining organlari va muassasalari tomonidan nodavlat yuridik shaxslar va jismoniy shaxslar bilan birgalikda hujjatlarning qimmatliligini aniqlash ekspertizasi oʻtkazilganidan keyin amalga oshiriladi.