Toshqin suvlarini, sel oqimlarini xavf-xatarsiz oʻtkazib yuborish va koʻchki hodisalarining oldini olish hamda ularning oqibatlarini tugatish chora-tadbirlari toʻgʻrisida (117-son)

10.03.2004

Oʻzbekiston Respublikasi Vazirlar Mahkamasining

qarori

Oʻtkazilayotgan muhofaza ishlari samaradorligini oshirish, toshqin va sel oqimlarini oʻtkazib yuborishdan qutilishi mumkin boʻlgan zararlarni bartaraf etish, koʻchki hodisalarining oldini olish, shuningdek ularning oqibatlarini tugatish maqsadida Vazirlar Mahkamasi qaror qiladi:

1. Toshqin suvlarini, sel oqimlarini xavf-xatarsiz oʻtkazib yuborish va koʻchki hodisalarining oldini olishni taʼminlash boʻyicha toshqinga qarshi kurash Hukumat komissiyasi tarkibi ilovaga muvofiq tasdiqlansin.

2. Toshqinga qarshi kurash Hukumat komissiyasi Qoraqalpogʻiston Respublikasi Vazirlar Kengashi, viloyatlar hokimliklari va tegishli vazirliklar, idoralar, tashkilotlar bilan birgalikda:

toshqin suvlarini, sel oqimlarini xavf-xatarsiz oʻtkazib yuborish va koʻchki hodisalarining oldini olish hamda ularning oqibatlarini tugatish boʻyicha asosiy tadbirlar dasturini ikki hafta muddatda ishlab chiqsin va uning bajarilishini taʼminlasin;

xavfli geologik va gidrometeorologik hodisalar kuchaygungacha boʻlgan davrda Oʻzbekiston Respublikasi Davlat geologiya va mineral resurslar qoʻmitasi hamda “Oʻzgidromet”ning tegishli xizmatlari maʼlumotlari asosida xavfli zonalardagi ishlarning ahvolini oʻrganib chiqsin, aholisi xavfsiz zonalarga vaqtinchalik va doimiy yashash uchun bosqichma-bosqich koʻchirilishi kerak boʻlgan xoʻjaliklar roʻyxatini aniqlasin;

oʻzboshimchalik bilan qurish, daryolar boʻyida noruda materiallarni ruxsatsiz qazib olish va xoʻjalik faoliyati bilan bogʻliq boshqa ishlarni amalga oshirish hisobiga daryolar va soylarning suv oʻtkazish quvvatini kamaytirishning kutilishi mumkin boʻlgan hollariga qatʼiy barham bersin;

daryolar, soylar va gidroinshootlar boʻyicha zarur himoya tadbirlari va avariya-tiklash ishlarining bajarilishini tashkil etsin.

3. Qoraqalpogʻiston Respublikasi Vazirlar Kengashi va viloyatlar hokimliklari, manfaatdor vazirliklar, idoralar va tashkilotlar:

paydo boʻladigan masalalarni tezkorlik bilan hal etish uchun kecha-doimiy faoliyat koʻrsatuvchi shtablar tashkil etsinlar, shtablar ixtiyoriga zarur miqdorda avtotransport, yonilgʻi-moylash materiallari va aloqa vositalari ajratsinlar;

toshqin suvlari va sel oqimlari oʻtadigan zonalarda xavfli uchastkalarni aniqlasinlar, ularda kecha-kunduz navbatchilik tashkil qilsinlar hamda xoʻjalik obyektlari saqlanishini taʼminlash chora-tadbirlarini koʻrsinlar;

Oʻzbekiston Respublikasi Davlat geologiya va mineral resurslar qoʻmitasi hamda “Oʻzgidromet”ning yozma buyruqlariga muvofiq koʻchki va sel oqimlarining xavfli zonalaridagi barcha xoʻjaliklar aholisini doimiy yoki vaqtinchalik koʻchirishni amalga oshirsinlar. Xavfsiz yashash joylariga koʻchirilayotgan aholi turmushi uchun zarur shart-sharoitlar yaratish nazarda tutilsin.

4. Oʻzbekiston Respublikasi Tashqi ishlar vazirligi 2004-yil 15-maygacha qoʻshni davlatlar hududidagi respublika uchun xavf soluvchi yorib chiqish xavfi boʻlgan koʻllar va sellarni keltirib chiqaruvchi uchastkalarni kuzatish boʻyicha aviatsiya ishlarini olib borishga Qirgʻiziston Respublikasi va Tojikiston Respublikasi hukumatlarining ruxsatnomalarini olish masalasini belgilangan tartibda ishlab chiqsin.

5. Oʻzbekiston Respublikasi Favqulodda vaziyatlar vazirligi:

koʻchki, sel, toshqin xavfi mavjud boʻlgan davrda vazirlikning shaxsiy tarkibini kuchaytirilgan ish tartibiga oʻtkazsin, joylarda kecha-kunduz navbatchilikni tashkil etsin;

2004-yil 15-aprelgacha viloyatlar hokimliklari, Oʻzbekiston Respublikasi Davlat geologiya va mineral resurslar qoʻmitasi hamda “Oʻzgidromet” hududiy xizmatlari bilan birgalikda koʻchki, sel, toshqin xavfi mavjud boʻlgan zonalardagi xoʻjaliklar va obyektlarni tekshiruvdan oʻtkazsin hamda zarur muhofaza tadbirlarining bajarilishi ustidan nazoratni taʼminlasin;

xavfli geologik va gidrometeorologik holatlar toʻgʻrisidagi axborotlarni yigʻish, oʻrganib chiqish va ayirboshlashni tashkil etsin. Oʻzbekiston Respublikasi Vazirlar Mahkamasiga respublika hududida vujudga kelgan favqulodda vaziyatlar va tabiiy ofatlarning kutilishi mumkin boʻlgan oqibatlarini bartaraf etish yuzasidan koʻrilgan chora-tadbirlar toʻgʻrisida axborot taqdim etilsin.

6. Oʻzbekiston Respublikasi Vazirlar Mahkamasining “Toshqin va sel oqimlari, koʻchki hodisalarining oldini olish va ularning oqibatlarini tugatishga doir kechiktirib boʻlmaydigan chora-tadbirlar toʻgʻrisida” 2003-yil 7-martdagi 124-son qarori oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2004-yil 10-mart,

117-son

Vazirlar Mahkamasining 2004-yil 10-martdagi 117-son qaroriga ILOVA

Toshqin suvlarini, sel oqimlarini xavf-xatarsiz oʻtkazib yuborish va koʻchki hodisalarining oldini olishni taʼminlash boʻyicha toshqinga qarshi kurash Hukumat komissiyasi

TARKIBI

Izoh. Komissiya aʼzolari boshqa ishga oʻtgan taqdirda Komissiya tarkibiga ularning lavozimiga yangidan tayinlangan shaxslar kiritiladi.