2000-yilgacha boʻlgan davrda Respublikaning magistral avtomobil yoʻllarida avtoservis infrastrukturasini rivojlantirish dasturi toʻgʻrisida (450-son)

19.12.1996

Oʻzbekiston Respublikasi Vazirlar Mahkamasining

qarori

Yoʻl harakati qatnashchilariga xizmat koʻrsatishni tubdan yaxshilash va respublikaning magistral avtomobil yoʻllarida avtoservisning zamonaviy xalqaro talablarga javob beradigan kompleks infrastrukturasini yaratish maqsadida Vazirlar Mahkamasi qaror qiladi:

1. 2010-yilgacha Oʻzbekiston Respublikasining avtomobil yoʻllarini rivojlantirish Bosh sxemasiga muvofiq “Oʻzistiqbolstat” davlat qoʻmitasi tomonidan manfaatdor vazirliklar va idoralar bilan birgalikda ishlab chiqilgan 2000-yilgacha boʻlgan davrda respublikaning magistral avtomobil yoʻllarida avtoservis infrastrukturasini rivojlantirish dasturi 1-3-ilovalarga muvofiq tasdiqlansin.

2. “Oʻzavtosanoat” uyushmasi, “Oʻzavtotrans” korporatsiyasi, “Oʻzdavneftmahsulot” birlashmasi, “Oʻzbekturizm” milliy kompaniyasi, Qoraqalpogʻiston Respublikasi Vazirlar Kengashi va viloyatlar hokimliklari avtoservis kompleks punktlari qurilishining buyurtmachilari etib belgilansin.

“Oʻzavtosanoat” uyushmasiga “Oʻzavtosanoatservis” kompaniyasini tashkil etish, unga avtoservis kompleks punktlarini qurish boʻyicha buyurtmachi va undan foydalanish funksiyasini yuklash tavsiya qilinsin.

3. “Oʻzavtosanoat” uyushmasi, “Oʻzavtotrans” korporatsiyasi, “Oʻzdavneftmahsulot” birlashmasi va “Oʻzbekturizm” milliy kompaniyasi avtoservis kompleks punktlarini 1-ilovaga muvofiq oʻz vaqtida foydalanishga topshirishni taʼminlash maqsadida:

bir oy muddatda “Oʻzinvestloyiha” kompaniyasini jalb qilgan holda 1997-yilda foydalanishga topshiriladigan ushbu komplekslar qurilishining texnik-iqtisodiy asoslanishini ishlab chiqsinlar;

uch oy muddatda respublika mashinasozlik korxonalari quvvatlaridan eng koʻp darajada foydalanishni hisobga olgan holda avtoservis kompleks punktlari uchun texnologik asbob-uskunalar olish masalasini ishlab chiqsinlar.

4. Davlat arxitektura va qurilish qoʻmitasi bir oy muddatda avtoservis kompleks punkti namunaviy loyihasini ishlab chiqish yuzasidan tender oʻtkazsin.

Tender natijalari boʻyicha avtoservis kompleks punktlarini loyihalash boʻyicha bosh loyihalovchi belgilansin.

5. “Oʻzavtosanoat” uyushmasi, “Oʻzdavneftmahsulot” birlashmasi, “Oʻzavtotrans” korporatsiyasi va “Oʻzbekturizm” milliy kompaniyasiga, istisno tariqasida, loyiha-smeta hujjatlari tayyor boʻlgunga qadar kompleks punktlar qurilishini ishchi chizmalar boʻyicha amalga oshirishga ruxsat berilsin.

Belgilab qoʻyilsinki, avtoservis kompleks punktlari qurilishi, 1998-yildan boshlab, asosan tender asosida amalga oshirilishi kerak.

6. “Asaka” banki va boshqa tijorat banklari avtoservis kompleks punktlari qurilishi texnik-iqtisodiy asoslanishini koʻrib chiqish natijalari boʻyicha ularni loyihalash va qurish uchun belgilangan tartibda kredit bilan taʼminlasinlar. Shu maqsadlarda buyurtmachilar banklar bilan birgalikda keyinchalik birgalikda foydalanish shartlarida xorijiy investitsiyalarni, yuridik va jismoniy shaxslarning mablagʻlarini jalb etishni hisobga olgan holda mablagʻ bilan taʼminlash manbalarini belgilasinlar.

7. “Oʻzavtoyoʻl” konserni Oʻzbekiston Respublikasi Davlat mulki qoʻmitasi bilan birgalikda magistral avtomobil yoʻllari zonasida xususiylashtirilgan avtomobil yonilgʻisi quyish shoxobchalari bilan birgalikda yer uchastkalarini uzoq muddatli ijaraga berish shartlarini bir oy muddatda ishlab chiqsin.

8. Biznes-fond va “Madad” agentligi avtoservis kompleks punktlari va boshqa punktlari qurilishi (rekonstruksiyasi) yuzasidan buyurtmachilarni Vazirlar Mahkamasining 1996-yil 9-iyuldagi 240-son qarorida nazarda tutilgan shartlarda va tartibda zarur asbob-uskunalar va kreditlar bilan taʼminlashni nazarda tutsinlar.

9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

mazkur qarorda nazarda tutilgan avtoservis kompleks punktlari va boshqa punktlari qurilishi uchun yer uchastkalari oʻz vaqtida ajratilishini taʼminlasinlar;

avtoservis kompleks punktlari qurilishida va birinchi navbatda, qoʻyilgan mablagʻlarni keyinchalik kompleks punktning ustav fondiga ulush sifatida rasmiylashtirgan holda, maydondan tashqari muhandislik kommunikatsiyalari qurilishida ulushli qatnashsinlar;

joylardagi kredit muassasalari bilan birgalikda xususiylashtirilgan avtomobil yonilgʻisi quyish shoxobchalari bazasida mazkur qarorga 3-ilovaga muvofiq avtoservis punktlari tashkil etish uchun ularning egalariga mablagʻlar ajratilishini taʼminlasinlar.

10. Davlat arxitektura va qurilish qoʻmitasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda avtoservis kompleks punktlarini qurish huquqini berishga pudrat savdolari tashkil etilishi va oʻtkazilishida yordam koʻrsatsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.H. Joʻrabekov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 19-dekabr,

450-son

Vazirlar Mahkamasining 1996-yil 19-dekabrdagi 450-son qaroriga 1-ILOVA

1997-2000-yillarda avtoservis kompleks punktlari qurilishi yuzasidan

TOPShIRIQ

Vazirlar Mahkamasining 1996-yil 19-dekabrdagi 450-son qaroriga 2-ILOVA

“Oʻzbekturizm” kompaniyasi buyurtmasi boʻyicha avtoservis obyektlari majmuiga ega boʻlgan turistik obyektlarni qurish va rekonstruksiya qilish

TOPShIRIGʻI

Vazirlar Mahkamasining 1996-yil 19-dekabrdagi 450-son qaroriga 3-ILOVA

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga xususiylashtirilgan avtoyonilgʻi quyish shoxobchalari negizida avtoservis punktlarini tashkil etish boʻyicha

TOPShIRIQ