Angren shahrida boyitilgan kaolin ishlab chiqarish fabrikasini qurish toʻgʻrisida (385-son)

07.11.1996

Oʻzbekiston Respublikasi Vazirlar Mahkamasining

qarori

[Koʻchirma]

Eksportga moʻljallangan mahsulotlar ishlab chiqarishni yanada rivojlantirish maqsadida Vazirlar Mahkamasi qaror qiladi:

1. “Koʻmir” aksionerlik jamiyati va Germaniyaning “Kulenkampff va Konitski GmbX” kompaniyasining Angren shahrida boyitilgan kaolin ishlab chiqaruvchi va sotuvchi, 1-ilovaga muvofiq ustav sarmoyasi tuzilmasiga ega boʻlgan “Kaolin” qoʻshma korxonasini tashkil etish toʻgʻrisidagi taklifi qabul qilinsin.

2. Maʼlumot uchun qabul qilinsinki:

“Koʻmir” koʻmir qazib olish va sotish aksionerlik jamiyati bilan Germaniyaning “Proyektirung und Anlagen Bau GmbX” kompaniyasi oʻrtasida quvvatlarini 1998-yilning IV choragida ishga tushirgan holda Angren konining dastlabki kaolin xomashyosidan yiliga 200 ming tonna boyitilgan kaolin ishlab chiqarish boʻyicha texnologik asbob-uskunalar yetkazib berish va ularni foydalanishga topshirish yuzasidan 65,5 mln Germaniya markasi summasiga kontrakt tuzilgan,

kontrakt qiymatining 15 foizi miqdoridagi avans toʻlovi (9,83 mln Germaniya markasi) “Kulenkampff va Konitski GmbX” kompaniyasi badali hisobiga amalga oshiriladi,

kontrakt qiymatining 85 foizi (55,7 mln Germaniya markasi) “Germes” (Germaniya) jamiyati sugʻurta qoplamasi ostida “Berliner bank AG” banki tomonidan “Kaolin” qoʻshma korxonasiga beriladigan kreditlar hisobidan mablagʻ bilan taʼminlanadi,

milliy valyutadagi xarajatlar (253,6 mln soʻm) “Oʻzsanoatqurilishbank” tomonidan “Koʻmir” aksionerlik jamiyatiga beriladigan kredit hisobidan amalga oshiriladi;

“Germes” jamiyati sugʻurta qoplamasi ostidagi “Berener bank AG”ning kreditini va ular boʻyicha foizlarni toʻlash 2-ilovaga muvofiq “Kaolin” qoʻshma korxonasining daromadlari hisobidan amalga oshiriladi;

“Oʻzsanoatqurilishbank” kreditlarini va ular boʻyicha foizlarni toʻlash “Koʻmir” aksionerlik jamiyati tomonidan “Kaolin” qoʻshma korxonasi daromadlaridan olingan dividendlar hisobidan amalga oshiriladi.

3. “Koʻmir” aksionerlik jamiyati:

“Kaolin” qoʻshma korxonasi taʼsis hujjatlarini ishlab chiqishda va imzolashda marketing tadqiqotlari oʻtkazilishi va mahsulotlarning tashqi bozorda sotilishi tashkil etilishi masʼuliyati “Kulenkampff va Konitski GmbX” kompaniyasiga yuklanishini nazarda tutsin;

“Kaolin” qoʻshma korxonasining ishlab chiqarish quvvatlarini 3-ilovaga muvofiq ishga tushirishni taʼminlasin.

4. Oʻzbekiston Respublikasi Moliya vaziri:

ushbu loyiha boʻyicha jalb etiladigan kreditlar boʻyicha;

qoʻshma korxona faoliyat koʻrsatishi mumkin boʻlmagan taqdirda qoʻyilgan mablagʻlarning “Kulenkampff va Konitski GmbX” kompaniyasi tomonidan soʻzsiz olinishiga Oʻzbekiston Respublikasi Hukumati kafolatini belgilangan tartibda berishga vakil qilinsin.

5. Oʻzbekiston Respublikasi Adliya vazirligi Oʻzbekiston Respublikasi Hukumati kafolatlari boʻyicha yuridik xulosa belgilangan tartibda bersin.

6. Oʻzbekiston Respublikasi Tashki iqtisodiy faoliyat milliy banki ikki oy muddatda kredit bitimi tuzsin hamda “Berliner bank AG” bankining “Germes” jamiyati sugʻurta qoplamasi ostidagi mablagʻlari “Kaolin” qoʻshma korxonasi uchun qayta moliyalanishini taʼminlasin.

8. Oʻzbekiston Respublikasi Vazirlar Mahkamasining Istiqbolni belgilash va statistika davlat qoʻmitasi kaolinni boyitish fabrikasi qurilishini Respublika investitsiya dasturiga kiritsin.

9. “Kaolin” qoʻshma korxonasi xorijiy kreditni toʻlash davrida qoʻshilgan qiymat soligʻi va foydadan olinadigan soliqni toʻlashdan ozod qilinsin.

10. Oʻzbekiston Respublikasi Tashqi ishlar vazirligi “Koʻmir” aksionerlik jamiyatining buyurtmanomasi boʻyicha “Proyektirung und Anglagen Bau GmbX” va “Kulenkampff va Konitski GmbX” kompaniyalarining loyihani amalga oshirishga jalb etiladigan xodimlariga, viza rasmiylashtirilgani uchun konsullik yigʻimlari toʻlashdan ozod qilgan holda, belgilangan tartibda koʻp martalik kelish vizalari berilishini taʼminlasin.

11. “Koʻmir” aksionerlik jamiyati va “Kaolin” qoʻshma korxonasi kontraktlar boʻyicha mazkur loyihani amalga oshirish uchun olib kelinayotgan materiallar, buyumlar va asbob-uskunalarga boj poshlinalari toʻlashdan ozod qilinsin.

12. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 7-noyabr,

385-son

Vazirlar Mahkamasining 1996-yil 7-noyabrdagi 385-son qaroriga 1-ILOVA

“Kaolin” qoʻshma korxonasi ustav sarmoyasi

TUZILMASI

Vazirlar Mahkamasining 1996-yil 7-noyabrdagi 385-son qaroriga 2-ILOVA

Boyitilgan kaolin ishlab chiqarish loyihasi boʻyicha “Berliner bank AG” kreditini toʻlash

JADVALI

Vazirlar Mahkamasining 1996-yil 7-noyabrdagi 385-son qaroriga 3-ILOVA

“Kaolin” qoʻshma korxonasining ishlab chiqarish quvvatlarini foydalanishga topshirish

JADVALI