Oʻzbekiston Respublikasi Prezidentining “Oʻzbekiston Respublikasida notariat institutini yanada takomillashtirish choralari toʻgʻrisida” 2010-yil 5-maydagi PF-4216-son Farmonini amalga oshirish chora-tadbirlari haqida (104-son)

02.06.2010

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasida notariat institutini yanada takomillashtirish choralari toʻgʻrisida” 2010-yil 5-maydagi PF-4216-son Farmonini bajarish yuzasidan Vazirlar Mahkamasi qaror qiladi:

1. 2010-yil 15-maydan boshlab Oʻzbekiston Respublikasi hududida notarial harakatlar davlat notarial idoralarida ishlaydigan notariuslar tomonidan amalga oshirilishi maʼlumot uchun qabul qilinsin.

2. Belgilansinki, notarial harakatlarni amalga oshirganlik uchun undiriladigan davlat boji summasi quyidagi tartibda taqsimlanadi:

75 foizi — tumanlar va shaharlar budjetlari daromadiga;

15 foizi — budjetdan tashqari Adliya organlari va muassasalarini rivojlantirish jamgʻarmasini shakllantirishga;

10 foizi — mablagʻlarni adliya organlarining shaxsiy gʻazna hisobvaraqlarida jamlash yoʻli bilan davlat notarial idoralari va notarial arxivlarni moliyalashtirishga. Bunda, mazkur mablagʻlar Oʻzbekiston Respublikasi adliya vaziri tomonidan Oʻzbekiston Respublikasi Moliya vazirligi bilan kelishilgan holda budjetdan tashqari Adliya organlari va muassasalarini rivojlantirish jamgʻarmasining daromad va xarajatlari oʻrtasidagi salbiy tafovutni qoplash uchun ham yoʻnaltirilishi mumkin.

3. Notarial okrugda notariuslar sonini belgilash tartibi toʻgʻrisidagi nizom 1-ilovaga muvofiq tasdiqlansin.

4. Oʻzbekiston Respublikasi Adliya vazirligi:

xususiy amaliyot bilan shugʻullanuvchi notariuslar idoralari faoliyati belgilangan tartibda tugatilishini va ulardan tegishli materiallar va arxivlar qabul qilib olinishini taʼminlasin;

respublikaning barcha mintaqalarini qamrab oladigan va fuqarolarning foydalanishi uchun qulaylikni taʼminlaydigan davlat notarial idoralarining samarali tarmogʻini shakllantirish chora-tadbirlarini koʻrsin;

Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzurida notarial ish yuritish materiallari saqlanishini hamda yuridik va jismoniy shaxslarga maʼlumotnomalar va arxiv hujjatlari nusxalari berilishini taʼminlaydigan notarial arxivlar (keyingi oʻrinlarda notarial arxivlar deb yuritiladi) tashkil etsin;

2010-yil oxirigacha respublika mintaqalarida qoʻshimcha ravishda 2-ilovaga muvofiq 220 ta davlat notarial idorasi tashkil etilishini va ular ishlarining yoʻlga qoʻyilishini taʼminlasin;

yangidan ochilayotgan notarial idoralarni markazlashtirilgan tanlov asosida yuqori malakali mutaxassislar bilan taʼminlasin;

Oʻzbekiston Respublikasi Markaziy banki va tijorat banklari bilan birgalikda ikki oy muddatda davlat notarial idoralarining toʻlovlarni bank plastik kartochkalaridan qabul qilish uchun hisob-kitob terminallari va nazorat-kassa mashinalari bilan jihozlanishini taʼminlasin;

jismoniy va yuridik shaxslarning malakali yuridik yordam olishi uchun qulay sharoitlar yaratishni, shuningdek notarial harakatlar maxfiyligini, hujjatlar va arxiv materiallari saqlanishini taʼminlashni nazarda tutadigan davlat notarial idoralari va notarial arxivlarning moddiy-texnika bazasini mustahkamlash chora-tadbirlari dasturi loyihasini ikki oy muddatda ishlab chiqsin va Vazirlar Mahkamasiga kiritsin.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston Respublikasi Davlat mulki qoʻmitasi huzuridagi davlat mulkini ijaraga berish markazlari bir oy muddatda yangidan tashkil etilayotgan notarial idoralar va notarial arxivlarni belgilangan talablarga javob beradigan, fuqarolarga xizmat koʻrsatish uchun qulay joyda joylashgan xonalar bilan taʼminlasinlar.

6. Toʻgʻridan-toʻgʻri budjetdan moliyalashtirish oʻrniga quyidagilar davlat notarial idoralarini, notarial arxivlarni hamda ushbu qarorda nazarda tutilgan tadbirlarni amalga oshirish xarajatlarini moliyalashtirish manbalari etib belgilansin:

notarial harakatlarni amalga oshirganlik uchun notariuslar tomonidan undiriladigan davlat boji summasidan ajratmalar;

davlat notarial idoralari notariuslari tomonidan amalga oshiriladigan huquqiy va texnik tusdagi qoʻshimcha harakatlar uchun tushumlar;

notarial arxivlar tomonidan yuridik va jismoniy shaxslarga notarial tasdiqlangan hujjatlar dublikatlarini, roʻyxatlardan koʻchirmalarni, shuningdek maʼlumotnomalarni va arxiv hujjatlarining nusxalarini berganlik uchun toʻlovlar summasi;

gerb yigʻimidan tushadigan mablagʻlarning bir qismi;

budjetdan tashqari Adliya organlari va muassasalarini rivojlantirish jamgʻarmasi mablagʻlari.

Davlat notarial idoralari va notarial arxivlar xarajatlarining Oʻzbekiston Respublikasi Moliya vazirligining Gʻaznachiligi orqali amalga oshirilishi maʼlumot uchun qabul qilinsin.

7. Oʻzbekiston Respublikasi Adliya vazirida:

davlat notarial idoralari notariuslari tomonidan amalga oshiriladigan huquqiy va texnik tusdagi qoʻshimcha harakatlar uchun bundan buyon Oʻzbekiston Respublikasi Moliya vazirligi bilan kelishiladigan haq miqdorlarini tasdiqlash;

notarial harakatlarni amalga oshirganlik uchun undiriladigan davlat bojlari summasining adliya organlarining shaxsiy gʻazna hisobvaragʻiga tushadigan 10 foizi miqdoridagi bir qismini notarial idoralar va notarial arxivlar faoliyatini takomillashtirish tadbirlarini moliyalashtirishga, shuningdek notarial idoralar va notarial arxivlar taʼminoti uchun ayrim mintaqalar oʻz mablagʻlarining yetishmagan qismini qoplashga maqsadli yoʻnaltirgan holda Adliya vazirligida jamlash huquqi saqlab qolinsin.

8. Oʻzbekiston Respublikasi Adliya vazirligi:

ommaviy axborot vositalari orqali notarial faoliyatni takomillashtirish yuzasidan koʻrilayotgan chora-tadbirlar, shuningdek xususiy amaliyot bilan shugʻullangan notariuslar tomonidan rasmiylashtirilgan hujjatlarni olish tartibi va joyi toʻgʻrisida aholi oʻrtasida keng tushuntirish ishlari olib borsin;

Oʻzbekiston Respublikasi Mehnat va aholini ijtimoiy muhofaza qilish vazirligi hamda Moliya vazirligi bilan birgalikda ikki hafta muddatda Davlat notarial idoralari faoliyatini moliyalashtirishning yangilangan tartibini ishlab chiqsin va tasdiqlasin, unda davlat notarial idoralari va notarial arxivlar xodimlarini mutaxassislar malakasiga, ularning oʻz vazifalarini sifatli bajarishiga, amalga oshirilayotgan notarial harakatlar, huquqiy va texnik tusdagi qoʻshimcha harakatlar hajmiga va undiriladigan davlat bojlari summasiga bogʻliq ravishda moddiy ragʻbatlantirishning samarali mexanizmini nazarda tutsin;

Oʻzbekiston Respublikasi Moliya vazirligi bilan kelishgan holda tashkil etilayotgan notarial arxivlarning shtat birliklari sonini hamda yuridik va jismoniy shaxslarga maʼlumotnomalar va arxiv hujjatlari nusxalari berilganligi uchun ular tomonidan undiriladigan haq miqdorlarini bir oy muddatda tasdiqlasin;

Oʻzbekiston Respublikasi Ichki ishlar vazirligi hamda boshqa manfaatdor vazirliklar va idoralar bilan birgalikda uch oy muddatda Vazirlar Mahkamasiga koʻchmas mulk va avtomototransport vositalarini boshqa shaxsga oʻtkazishni taqiqlash, xatlash, fuqarolarning muomala layoqati boʻyicha notariuslar foydalanishi ochiqligini taʼminlovchi avtomatlashtirilgan maʼlumotlar bazasini yaratish boʻyicha takliflar kiritsin.

9. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirishlar kiritilsin.

10. Oʻzbekiston Respublikasi Hukumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi adliya vaziri R.A. Muhitdinov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2010-yil 2-iyun,

104-son

Vazirlar Mahkamasining 2010-yil 2-iyundagi 104-son qaroriga 1-ILOVA

Notarial okrugda notariuslar lavozimlari sonini belgilash tartibi toʻgʻrisida

NIZOM

I. Umumiy qoidalar

1. Ushbu Nizom notarial okrugda notariuslar lavozimlari sonini belgilash tartibini belgilaydi.

2. Oʻzbekiston Respublikasi Adliya vazirligi ushbu Nizomga muvofiq belgilanadigan tegishli notarial okrugdagi notariuslar lavozimlari sonidan kelib chiqqan holda notarius lavozimini taʼsis etadi va tugatadi.

Notarial okrugda notariuslar lavozimlari soni Oʻzbekiston Respublikasi Adliya vazirligi tomonidan bir yilda koʻpi bilan bir marta belgilanadi.

II. Notarial okrugda notariuslar lavozimlari sonini belgilash mezonlari

3. Har bir notarial okrugda kamida bitta notarius lavozimi taʼsis etiladi. Ikkinchi va undan keyingi notariuslar lavozimlarini belgilashda quyidagi mezonlarning hammasi hisobga olinadi:

a) notarial okrug notariuslari tomonidan, qoidaga koʻra, oxirgi uch yilda amalga oshirilgan notarial harakatlarning oʻrtacha oylik soni. Bunda notariuslar lavozimlari soni bir notariusga bir oyda 300 — 400 notarial harakatlar hisobidan kelib chiqqan holda belgilanadi;

b) notarial okrugdagi aholi soni. Bunda notariuslar lavozimlari soni quyidagi tarzda belgilanadi:

Toshkent shahri, Nukus shahri va viloyat markazlari chegaralarida belgilangan notarial okruglarda — 10 mingdan koʻp boʻlmagan aholiga bir notarius;

viloyat boʻysunishidagi shaharlar chegaralarida belgilangan notarial okruglarda — 25 mingdan koʻp boʻlmagan aholiga bir notarius;

qishloq tumanlari chegaralarida belgilangan notarial okruglarda — 30 mingdan koʻp boʻlmagan aholiga bir notarius.

4. Ushbu Nizomning 3-bandida nazarda tutilgan mezonlarga qoʻshimcha ravishda, notariuslar lavozimlari sonini belgilashda muayyan holatlardan kelib chiqib, shuningdek bir notarial okrug chegaralarida aholi punktlarining bir-biridan olisligi va ular oʻrtasidagi mavjud transport aloqasi hisobga olinishi mumkin.

III. Notarial okrugda notariuslar lavozimlari soni toʻgʻrisidagi takliflarni koʻrib chiqish

5. Notarial okrugda notariuslar lavozimlari soni toʻgʻrisidagi takliflar Oʻzbekiston Respublikasi Adliya vazirligiga Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari tomonidan kiritiladi.

Takliflarga notarial okrug boʻyicha quyidagi maʼlumotlar mavjud boʻlgan materiallar ilova qilinadi:

oxirgi uch yilda amalga oshirilgan notarial harakatlar soni;

aholi soni;

davlat notarial idorasi taʼminoti xarajatlarini qoplash imkoniyati;

notarial okrugda notariuslar lavozimlari soni toʻgʻrisidagi taklifni asoslaydigan boshqa maʼlumotlar.

6. Notarial okrugda notariuslar lavozimlari soni toʻgʻrisidagi takliflar Oʻzbekiston Respublikasi Adliya vazirligi tomonidan ushbu Nizomning 2-bandida nazarda tutilgan muddatlarda koʻrib chiqiladi.

IV. Davlat notarial idoralarida boshqa lavozimlarni joriy etish normativlari

7. Davlat notarial idoralarida Oʻzbekiston Respublikasi Adliya vazirligi qarori bilan notariusning yordamchisi, notariusning stajori, notariusning kotibi va arxivarius lavozimlari joriy etilishi mumkin.

Adliya vaziri Oʻzbekiston Respublikasi Moliya vazirligi bilan kelishgan holda notarial harakatlarni amalga oshirganlik uchun notariuslar tomonidan undiriladigan davlat boji summalaridan ajratmalar va notariuslar tomonidan amalga oshiriladigan huquqiy va texnik tusdagi qoʻshimcha harakatlar uchun tushumlar hisobidan notarial idoralarda qoʻshimcha tarjimon, operator, kuryer va aholiga notarial va u bilan bogʻliq kompleks xizmatlarni koʻrsatish uchun boshqa ishchilar shtat birligini kiritishi mumkin.

8. Har bir notarius lavozimiga kamida 1 birlik notarius yordamchisi lavozimi va kamida 1 birlik notarius kotibi lavozimi joriy etiladi

9. Stajorlar va arxivariuslar soni har bir lavozim boʻyicha respublikadagi notariuslar umumiy sonining 25 foizidan oshmasligi kerak.

10. Yordamchi xodim lavozimlari soni (ushbu Nizomning 7-bandida koʻrsatilganlardan tashqari) Oʻzbekiston Respublikasi Adliya vazirligi tomonidan, davlat boshqaruvi organlari uchun belgilangan normativlarga muvofiq belgilanadi.

Kassir vazifasi, qoidaga koʻra, notariusning kotibiga yuklanadi, zaruriyat boʻlganda esa, Adliya vazirligining qarori bilan kassir lavozimi joriy etilishi mumkin.

11. Ushbu Nizomning 7 va 10-bandlarida koʻrsatilgan lavozimlar ularning taʼminotiga mablagʻlar mavjud boʻlgan taqdirda joriy etiladi.

Vazirlar Mahkamasining 2010-yil 2-iyundagi 104-son qaroriga 2-ILOVA

Respublika mintaqalarida 2010-yilda qoʻshimcha tashkil etiladigan davlat notarial idoralari

SONI

Izoh. “Notariat toʻgʻrisida”gi Oʻzbekiston Respublikasi Qonunining 8-moddasiga muvofiq Oʻzbekiston Respublikasi Adliya vazirligi keyinchalik amaldagi yuklama va ishlar hajmidan, shuningdek aholi uchun tegishli shart-sharoitlar yaratish zaruriyatidan kelib chiqqan holda davlat notarial idoralarini tashkil etish va tugatish huquqiga ega.

Vazirlar Mahkamasining 2010-yil 2-iyundagi 104-son qaroriga 3-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirishlar

1. Vazirlar Mahkamasining 1994-yil 3-noyabrdagi 533-son qarori (Oʻzbekiston Respublikasi QT, 1994-y., 11-son, 49-modda) bilan tasdiqlangan Davlat boji stavkalarining 4-bandida:

a) birinchi xatboshi quyidagi tahrirda bayon qilinsin:

“Notariuslar notarial harakatlarni amalga oshirganliklari uchun”;

b) “k” kichik bandiga izohning beshinchi xatboshidagi “davlat notariusining” soʻzlari “notariusning” soʻzi bilan almashtirilsin.

2. Vazirlar Mahkamasining “Davlat hokimiyati va boshqaruvi organlari, sud organlari va notarial idoralar xodimlari mehnatiga haq toʻlashning tarif setkasini joriy etish toʻgʻrisida” 1996-yil 12-apreldagi 147-son qaroriga 24-ilova matni quyidagi tahrirda bayon qilinsin:

“Davlat notarial idoralari xodimlarining yagona tarif setkasi boʻyicha mehnatga haq toʻlash razryadlari va tarif koeffitsiyentlari

3. Vazirlar Mahkamasining “Davlat xizmatchilarining lavozim maoshlariga yigirma foizli ustama haq belgilash toʻgʻrisida” 1997-yil 3-iyuldagi 339-son qaroriga ilovaning “Notarial idoralar” boʻlimi quyidagi tahrirda bayon qilinsin:

“Davlat notarial idoralari

Katta notarius

Notarius

Notarius yordamchisi”.

6. Vazirlar Mahkamasining 2006-yil 20-fevraldagi 27-son qarori (Oʻzbekiston Respublikasi QT, 2006-y., 2-son, 11-modda) bilan tasdiqlangan Davlat axborot resurslari hamda ularni shakllantirish, ulardan foydalanish va ularni qoʻllab-quvvatlash uchun masʼul boʻlgan davlat organlari roʻyxatining “Davlat axborot resurslari nomi” ustuni 3-3 pozitsiyasidagi “va xususiy amaliyot bilan shugʻullanadigan notariuslar idoralari” soʻzlari chiqarib tashlansin.

8. Vazirlar Mahkamasining “Internet tarmogʻida Oʻzbekiston Respublikasining Hukumat portaliga axborotlarni taqdim etish va joylashtirish tartibi toʻgʻrisida” 2009-yil 21-apreldagi 116-son qaroriga 1-ilovaning “Axborotning turi” ustuni 90-pozitsiyasining ikkinchi qatoridagi “va xususiy amaliyot bilan shugʻullanadigan notariuslar idoralari” soʻzlari chiqarib tashlansin.

9. Vazirlar Mahkamasining 2009-yil 25-maydagi 148-son qarori (Oʻzbekiston Respublikasi QT, 2009-y., 5-son, 40-modda) bilan tasdiqlangan Tasdiqlangan namunaviy loyihalar boʻyicha yakka tartibda uy-joy qurilishiga “Qishloq qurilish bank” aksiyadorlik tijorat banki tomonidan imtiyozli ipoteka krediti berish tartibi toʻgʻrisidagi nizomga 3-ilovaning tasdiqlovchi yozuv namunasidagi “davlat notariusi” va “Davlat notariusi” soʻzlari tegishli ravishda “notarius” va “Notarius” soʻzlari bilan almashtirilsin.

10. Vazirlar Mahkamasining 2009-yil 26-oktabrdagi 280-son qarori (Oʻzbekiston Respublikasi QT, 2009-y., 9-10-son, 68-modda) bilan tasdiqlangan “Qishloq qurilish invest” injiniring kompaniyasi ishtirokida yakka tartibda uy-joy qurilishini amalga oshirish tartibi toʻgʻrisida nizomga 2-ilovadagi tasdiqlovchi yozuv namunasidagi “davlat notariusi” va “Davlat notariusi” soʻzlari tegishli ravishda “notarius” va “Notarius” soʻzlari bilan almashtirilsin.

11. Vazirlar Mahkamasining “Vazirliklar va idoralarning budjetdan tashqari jamgʻarmalariga mablagʻlar ajratishni tartibga solish chora-tadbirlari toʻgʻrisida” 2010-yil 2-apreldagi 62-son qaroriga (Oʻzbekiston Respublikasi qonun hujjatlari toʻplami, 2010-y., 4-son, 14-modda) 1-ilova “Shakllantirish manbai” ustuni 12-pozitsiyasining beshinchi qatoridagi “xususiy notarial idoralar” soʻzlari chiqarib tashlansin.

Vazirlar Mahkamasining 2010-yil 2-iyundagi 104-son qaroriga 4-ILOVA

Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan ayrim qarorlari

1. Vazirlar Mahkamasining “Notariat faoliyatini mablagʻ bilan taʼminlashni takomillashtirishga doir qoʻshimcha chora-tadbirlar toʻgʻrisida” 2003-yil 7-yanvardagi 4-son qarori (Oʻzbekiston Respublikasi QT, 2003-y., 1-son, 1-modda).

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2003-yil 30-apreldagi 197-son qaroriga ilovaning 14-bandi (Oʻzbekiston Respublikasi QT, 2003-y., 4-son, 34-modda).