“Gazmotors” va “Gazkompressor” Oʻzbekiston-Amerika qoʻshma korxonalarini tashkil etish boʻyicha takliflar toʻgʻrisida (210-son)

04.06.1996

Oʻzbekiston Respublikasi Vazirlar Mahkamasining

qarori

Energetika resurslaridan foydalanish samaradorligini oshirish, atrof-muhitni muhofaza qilish, yonilgʻining vatanimizdagi muqobil turlaridan foydalanishni kengaytirish, respublikadagi ekologik vaziyatni yaxshilash maqsadida Vazirlar Mahkamasi qaror qiladi:

1. Quyidagilarning:

Oʻzbekiston Respublikasi Melioratsiya va suv xoʻjaligi vazirligi, “Oʻzavtotrans” korporatsiyasining oʻzlariga qarashli korxonalarda Amerikaning “Amerikan injenering INK” kompaniyasi bilan gaz balloni uskunalari ishlab chiqarish, avtotransport texnikasini suyultirilgan tabiiy gazda ishlash uchun qayta jihozlash boʻyicha, ustav fondida Melioratsiya va suv xoʻjaligi vazirligi ulushi — 3,5 mln AQSH dollari (30,2%), “Oʻzavtotrans” korporatsiyasi ulushi — 1,7 mln AQSH dollari (14,6%), “Amerikan injenering INK” kompaniyasi ulushi — 6,4 mln AQSH dollari (55,2%) boʻlgan (1-ilova) yopiq turdagi aksionerlik jamiyati shaklidagi “Gazmotors” qoʻshma korxonasini tashkil etish;

“Oʻzdavneftmahsulot” birlashmasining ishlab turgan “Oʻzavtogaz” hududiy boshqarmasi bazasida Amerikaning “Amerikan injenering INK” kompaniyasi bilan avtomobillarga gaz yonilgʻisi quyish shoxobchalari infrastrukturasini kompleks rivojlantirish boʻyicha, ustav fondida “Oʻzdavneftmahsulot” birlashmasi ulushi — 36,9 mln AQSH dollari (63,1%), “Amerikan injenering INK” kompaniyasi ulushi — 21,6 mln AQSH dollari (36,9%) boʻlgan (2-ilova) yopiq turdagi aksionerlik jamiyati shaklidagi “Gazkompressor” qoʻshma korxonasini tashkil etish toʻgʻrisidagi takliflariga rozilik bildirilsin.

Oʻzbekiston tomonining taʼsis badallari asosiy fondlar, asbob-uskunalar, aylanma mablagʻlar va yer uchastkalari bilan birgalikda ishlab chiqarish maydonlari koʻrinishida qoʻyiladi.

2. Amerika tomoni qoʻshma korxonalarga 5 yilga AQSHning Eksimbanki sugʻurtasi ostida 75 mln AQSH dollari miqdorida kredit berishi maʼlumot uchun qabul qilinsin.

3. Oʻzbekiston Respublikasi Tashqi iqtisodiy faoliyat milliy banki:

AQSHning mablagʻ bilan taʼminlovchi banklari bilan belgilangan tartibda kredit bitimini rasmiylashtirsin;

olingan kredit resurslari boʻyicha “Gazmotors” va “Gazkompressor” qoʻshma korxonalari oʻz vaqtida qayta moliyalashtirilishini taʼminlasin.

4. Oʻzbekiston Respublikasi Moliya vaziriga Tashqi iqtisodiy faoliyat milliy bankiga “Gazmotors” va “Gazkompressor” qoʻshma korxonalari loyihalari uchun olingan kreditlar boʻyicha belgilangan tartibda Oʻzbekiston Respublikasi Hukumati kafolatini berish vakolati berilsin.

Moliya vazirligi Tashqi iqtisodiy faoliyat milliy banki va qoʻshma korxonalarning muassislari bilan birgalikda zayom mablagʻlarini qaytarish jadvalini ishlab chiqsin va tasdiqlasin.

5. Oʻzbekiston Respublikasi Adliya vazirligi “Gazmotors” va “Gazkompressor” qoʻshma korxonalarining taʼsis hujjatlarini belgilangan tartibda ekspertizadan va davlat roʻyxatidan oʻtkazsin.

6. “Oʻzistiqbolstat” davlat qoʻmitasi “Gazmotors” va “Gazkompressor” qoʻshma korxonalarini Oʻzbekiston Respublikasining investitsiya dasturiga kiritsin.

7. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar qurilish va avtomobil gaz toʻldirish kompressor shoxobchalarini joylashtirish uchun yer uchastkalari ajratishda, ishlab chiqarish maydonlari va xizmat xonalarini ijaraga berishda yordam koʻrsatsinlar.

8. Oʻzbekiston Respublikasi Tashqi ishlar vazirligi qoʻshma korxonalarning chet ellik mutaxassislariga koʻp martalik vizalar berilishini taʼminlasin.

9. Qoʻshma korxonalar masalalari yuzasidan ishga keluvchi chet ellik mutaxassislarga respublika hududida yashash va transportning barcha turlarida yurish uchun Oʻzbekiston Respublikasi fuqarolari uchun nazarda tutilgan tariflar boʻyicha haq toʻlash huquqi berilsin.

10. Mazkur qarorning bajarilishini nazorat qilish Bosh vazirning oʻrinbosarlari K.R. Rahimov va Q.J. Haqqulov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 4-iyun,

210-son

Vazirlar Mahkamasining 1996-yil 4-iyundagi 210-son qaroriga 1-ILOVA

“Gazmotors” qoʻshma korxonasini tashkil etish va uning faoliyat koʻrsatishi

SXEMASI

Vazirlar Mahkamasining 1996-yil 4-iyundagi 210-son qaroriga 2-ILOVA

“Gazkompressor” Oʻzbekiston—Amerika qoʻshma korxonasini tashkil etish va uning faoliyat koʻrsatishi

SXEMASI