Sanoat xavfsizligi sohasidagi ekspert tashkilotlarini akkreditatsiya qilish va ular faoliyati ustidan inspeksiya nazoratini oʻtkazish uchun toʻlovlarni amalga oshirish tartibi toʻgʻrisidagi nizomni tasdiqlash toʻgʻrisida (2105-son)

25.05.2010

“SANOATKONTEXNAZORAT” DAVLAT INSPEKSIYASI BOSHLIGʻINING

buyrugʻi

[Oʻzbekiston Respublikasi Adliya vazirligi tomonidan 2010-yil 25-mayda roʻyxatdan oʻtkazildi, roʻyxat raqami 2105]

Oʻzbekiston Respublikasi Vazirlar Mahkamasining 2008-yil 10-dekabrdagi 271-son “Xavfli ishlab chiqarish obyektlarining sanoat xavfsizligi toʻgʻrisida”gi Oʻzbekiston Respublikasi Qonunini amalga oshirishga doir qoʻshimcha chora-tadbirlar haqida”gi qarorining (Oʻzbekiston Respublikasi qonun hujjatlari toʻplami 2008-y., 50-son, 496-modda ) 3-bandi ijrosini taʼminlash maqsadida buyuraman:

1. Sanoat xavfsizligi sohasidagi ekspert tashkilotlarini akkreditatsiya qilish va ular faoliyati ustidan inspeksiya nazoratini oʻtkazish uchun toʻlovlarni amalga oshirish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Boshliq I. HOLMATOV

Toshkent sh.,

2010-yil 15-aprel,

126-son

“Sanoatkontexnazorat” davlat inspeksiyasi boshligʻining 2010-yil 15-apreldagi 126-sonli buyrugʻiga ILOVA

Sanoat xavfsizligi sohasidagi ekspert tashkilotlarini akkreditatsiya qilish va ular faoliyati ustidan inspeksiya nazoratini oʻtkazish uchun toʻlovlarni amalga oshirish tartibi toʻgʻrisidagi

NIZOM

Mazkur Nizom Oʻzbekiston Respublikasi Vazirlar Mahkamasining 2008-yil 10-dekabrdagi 271-son “Xavfli ishlab chiqarish obyektlarining sanoat xavfsizligi toʻgʻrisida”gi Oʻzbekiston Respublikasi Qonunini amalga oshirishga doir qoʻshimcha chora-tadbirlar haqida”gi qaroriga (Oʻzbekiston Respublikasi qonun hujjatlari toʻplami, 2008-yil, 50-son, 496-modda) muvofiq sanoat xavfsizligi sohasidagi ekspert tashkilotlarini (keyingi oʻrinlarda ekspert tashkilotlari deb yuritiladi) akkreditatsiya qilish va ular faoliyati ustidan inspeksiya nazoratini oʻtkazish uchun toʻlovlarni amalga oshirish tartibini belgilaydi.

I. Umumiy qoidalar

1. Ekspert tashkilotlarini akkreditatsiya qilish va ular faoliyati ustidan inspeksiya nazoratini oʻtkazish “Sanoat xavfsizligi sohasidagi ekspert tashkilotlarini akkreditatsiya qilish va ular faoliyati ustidan inspeksiya nazorati oʻtkazish qoidalari”da (roʻyxat raqami 2022, 2009-yil 20-oktabr) (Oʻzbekiston Respublikasi qonun hujjatlari toʻplami, 2009-yil, 43-son, 463-modda) belgilangan tartibda amalga oshiriladi.

2. Ekspert tashkilotlarini akkreditatsiya qilish va ular faoliyati ustidan inspeksiya nazoratini oʻtkazish uchun toʻlovlar mazkur Nizom asosida amalga oshiriladi.

II. Ekspert tashkilotlarini akkreditatsiya qilish va ular faoliyati ustidan inspeksiya nazoratini oʻtkazish uchun toʻlovlarni amalga oshirish

3. Ekspert tashkilotlarini akkreditatsiya qilish (qayta akkreditatsiya qilish, akkreditatsiya sohasini kengaytirish) uchun qonunchilik hujjatlarida belgilangan bazaviy hisoblash miqdorining besh barobari miqdorida toʻlov undiriladi.

4. Buyurtmachi topshirgan arizasidan voz kechgan taqdirda akkreditatsiya qilish uchun toʻlangan toʻlov summasi qaytarilmaydi.

5. Akkreditatsiya attestati dublikati berilgani uchun qonunchilik hujjatlarida belgilangan bazaviy hisoblash miqdorining besh barobari miqdorida toʻlov undiriladi.

6. Akkreditatsiya attestatida koʻrsatilgan ekspert tashkiloti haqidagi maʼlumotlar oʻzgarganligi natijasida akkreditatsiya attestati qayta rasmiylashtirilganligi uchun qonunchilik hujjatlarida belgilangan bazaviy hisoblash miqdorining besh barobari miqdorida toʻlov undiriladi.

7. Akkreditatsiya qilingan ekspert tashkiloti faoliyati ustidan rejali inspeksiya nazoratini oʻtkazish uchun qonunchilik hujjatlarida belgilangan bazaviy hisoblash miqdorining uch barobari miqdorida toʻlov undiriladi.

8. Ekspert tashkilotlarini akkreditatsiya qilish va ular faoliyati ustidan rejali inspeksiya nazoratini oʻtkazish boʻyicha tushgan mablagʻlar Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi hisobvaragʻiga oʻtkaziladi.

9. Ekspert tashkilotlarini akkreditatsiya qilish va ular faoliyati ustidan rejali inspeksiya nazoratini oʻtkazish maqsadida joyiga borib baholash bilan bogʻliq xarajatlar buyurtmachi tomonidan qoplanadi.

10. Ekspert tashkilotlarini akkreditatsiya qilish va ular faoliyati ustidan rejali inspeksiya nazoratini oʻtkazish boʻyicha tushgan mablagʻlar akkreditatsiya qilish va inspeksiya nazoratini oʻtkazish bilan bogʻliq xarajatlarni qoplash hamda sanoat xavfsizligi ekspertizasi tizimini tashkil qilish va rivojlantirish uchun sarflanadi.

III. Yakuniy qoida

11. Mazkur Nizom Oʻzbekiston Respublikasi Moliya vazirligi bilan kelishilgan.

Moliya vaziri R. AZIMOV

2010-yil 12-aprel