Aholiga sotiladigan avtomobil benzinining chakana narxlarini oʻzgartirish toʻgʻrisida (354-son)

14.07.1997

Oʻzbekiston Respublikasi Vazirlar Mahkamasining

qarori

Vazirlar Mahkamasi qaror qiladi:

1. 1997-yil 15-iyuldan boshlab aholiga sotiladigan avtomobil benzinining chakana narxi 1 litri uchun 20 soʻm miqdorida belgilansin.

2. Belgilab qoʻyilsinki, Oʻzbekiston Respublikasi Ijtimoiy taʼminot vazirligi belgilagan roʻyxatlar boʻyicha urush qatnashchilari va faxriylari, urush va mehnat nogironlari oyiga umumiy summasi 400 soʻm doirasida avtomobil benzinining 1 litrini 10 soʻmdan imtiyozli narxda sotib olish huquqiga ega boʻladilar. Shaxslarning koʻrsatib oʻtilgan toifalariga koʻrsatib oʻtilgan summadan ortiqcha avtobenzinning 1 litri 20 soʻmdan sotiladi.

3. Oʻzbekiston Respublikasi Moliya vazirligi bozor va bozordan tashqari fondlar boʻyicha narxlar darajasini muvofiqlashtirgan holda avtomobil benzinining yangi chakana narxlari preyskurantlarini tasdiqlasin hamda barcha manfaatdor vazirliklar, idoralar, korxonalar va tashkilotlarga yetkazsin.

4. “Oʻzdavneftmahsulot” davlat-aksionerlik birlashmasi, uning joylardagi organlari avtomobil benzinini naqd pulga sotuvchi avtomobil yonilgʻisi quyish shoxobchalaridagi avtomobil benzini qoldiqlarini 1997-yil 15-iyuldagi holatiga koʻra qayta baholasinlar. Qayta baholashdan olingan summa toʻlaligicha korxonalarning yalpi daromadida hisobga olinadi va unga belgilangan tartibda soliq solinadi.

5. Oʻzbekiston Respublikasi Vazirlar Mahkamasining 1996-yil 29-noyabrdagi 423-son qarori oʻz kuchini yoʻqotgan deb hisoblansin.

Oʻzbekiston Respublikasi Bosh vaziri Oʻ. SULTONOV

Toshkent sh.,

1997-yil 14-iyul,

354-son