Oʻzbekiston Respublikasi mintaqaviy oliy oʻquv yurtlarini yanada rivojlantirish chora-tadbirlari toʻgʻrisida (196-son)

31.05.1995

Oʻzbekiston Respublikasi Vazirlar Mahkamasining

qarori

Viloyatlar markazlarida tashkil etilgan oliy oʻquv yurtlarida mutaxassislar tayyorlash sifatini oshirish, ularning ilmiy-intellektual potensialini va moddiy-texnika bazasini mustahkamlash maqsadida Vazirlar Mahkamasi qaror qiladi:

1. Oliy va oʻrta maxsus taʼlim vazirligi, Xalq taʼlimi vazirligi, tasarrufida oliy oʻquv yurtlari boʻlgan vazirliklar va idoralar:

Oʻzbekiston Respublikasi Fanlar akademiyasi va Qishloq xoʻjaligi fanlari akademiyasi bilan birgalikda yuqorida qayd etilgan oliy oʻquv yurtlarining hamda akademik institutlarning taniqli olimlarini hamda yuqori malakali oʻqituvchilarini pedagogik va ilmiy faoliyatni olib borish uchun, doimiy ishdagi besh yil mobaynida ularning lavozim maoshlariga 50 foizgacha miqdorda ustamalar belgilashni nazarda tutgan holda yoʻllasinlar;

oʻquv semestrlari davrida Toshkent shahridagi oʻquv yurtlarining tajribali professor hamda oʻqituvchilarini leksiyalar kurslarini oʻqish va fan, texnika hamda texnologiya yangiliklari bilan tanishtirish maqsadida mintaqaviy yoʻllashni amalda qoʻllasinlar;

oliy oʻquv yurtlarining ilmiy-pedagogik potensialidan va moddiy-texnika resurslaridan samarali foydalanish maqsadida 1995-yil 1-iyulgacha oliy oʻquv yurtlarining viloyatlardagi filiallari tarmogʻi qayta koʻrib chiqilsin va ularni viloyatlar oʻquv yurtlariga fakultetlar, oʻquv boʻlinmalari sifatida berishning maqsadga muvofiqligi toʻgʻrisida Vazirlar Mahkamasiga takliflar kiritsinlar;

har yili Toshkent shahar oliy oʻquv yurtlarida viloyatlar oliy oʻquv yurtlaridan yuqori malakali mutaxassislar tayyorlash maqsadida aspirantura va doktoranturaga yoʻllayotganlar uchun oʻrinlar ajratsinlar;

oliy oʻquv yurtlari huzurida, ularning oʻqituvchi-professorlarini jalb qilib, ularga oliy oʻquv yurtlari, gimnaziyalar, litseylar tashkil etsinlar;

oliy oʻquv yurtlarini ijtimoiy rivojlantirishni yaxshilash maqsadida band boʻlmagan xonalarni, taʼlim va tarbiya ishlariga zarar yetkazmay, shartnoma asosida vaqtincha ijaraga berishga ruxsat etsinlar.

oliy oʻquv yurtlariga budjetdan tashqari mablagʻlarni oʻqituvchilar va xodimlarni moddiy ragʻbatlantirishga yoʻllashiga ruxsat etsinlar;

oliy oʻquv yurtlari xodimlarini budjetdan tashqari oʻz mablagʻlari hisobiga moddiy ragʻbatlantirish tartibi toʻgʻrisidagi Nizomni Oʻzbekiston Respublikasi Moliya vazirligi bilan birgalikda ishlab chiqsinlar va tasdiqlasinlar.

2. Viloyatlar hokimliklari respublikaning yetakchi oʻquv yurtlaridan vazirliklar va idoralar yoʻllanmalari boʻyicha kelayotgan oʻqituvchilar va mutaxassislarga turarjoyni navbatdan tashqari berish tartibini belgilasinlar.

3. Mazkur qarorning bajarilishini nazorat qilish Vazirlar Mahkamasining Taʼlim va fan boʻlimiga yuklansin.

Vazirlar Mahkamasining Raisi I. KARIMOV

Toshkent sh.,

1995-yil 31-may,

196-son