Sellyuloza va yuqori sifatli qogʻoz ishlab chiqarish quvvatlarini barpo etish toʻgʻrisida (144-son)

11.04.1996

Oʻzbekiston Respublikasi Vazirlar Mahkamasining

qarori

Respublika xalq xoʻjaligining sellyuloza va yuqori sifatli qogʻozga boʻlgan talabini qondirish, ularning import qilinishini qisqartirish va mahalliy xomashyo manbalaridan oqilona foydalanish maqsadida Vazirlar Mahkamasi qaror qiladi:

1. “Oʻzbekmebel” davlat-aksionerlik birlashmasining Angrendagi “Promkartontorg” ochiq turdagi aksionerlik jamiyatida poxoldan 10 ming tonna sellyuloza ishlab chiqaruvchi quvvatlar ishga tushirilganligi va ushbu korxonada shunga oʻxshash qoʻshimcha quvvatlar joriy yilning uchinchi choragida ishga tushirilishi maʼlumot uchun qabul qilinsin.

2. Toshkent viloyati hokimligi va “Oʻzbekmebel” DABning 1996-1997-yillarda quvvatlarni “Yangiyoʻlmebel” ishlab chiqarish-tijorat shirkatining mavjud maydonlariga joylashtirgan holda Yangiyoʻl tumanida paxta lintidan yiliga 25 ming tonna sellyuloza va 12 ming tonna qogʻoz ishlab chiqarish quvvatiga ega boʻlgan sellyuloza-qogʻoz fabrikasini barpo etish toʻgʻrisidagi takliflariga rozilik berilsin.

3. “Oʻzbekmebel” DAB, “Oʻzogʻirsanoat” instituti “Bummash Xolding” (Rossiya) aksionerlik birlashmasi bilan birgalikda uch oy muddatda sellyuloza va qogʻoz ishlab chiqarish quvvatlarini barpo etish uchun texnik-iqtisodiy asoslashni, 1996-yilning 31-dekabrigacha esa loyiha-smeta hujjatlarini ishlab chiqsinlar.

“Oʻzsanoatxoʻjalikqurilish” davlat korporatsiyasi Yangiyoʻl sellyuloza-qogʻoz fabrikasi qurilishi boʻyicha bosh pudratchi etib belgilansin.

Ishchi chizmalari boʻyicha obyektlarni bir yoʻla loyihalashga, qurishga va mablagʻ bilan taʼminlashga (loyiha-smeta hujjatlari tasdiqlangunga qadar), istisno tariqasida, ruxsat etilsin.

4. Pul-kredit siyosati boʻyicha respublika komissiyasi (Hamidov) mazkur ishlab chiqarishning xalq xoʻjaligidagi muhim ahamiyatini hisobga olib “Oʻzbekmebel” DAB “Sellyulozaqurilish” direksiyasiga qurilish va asbob-uskunalar bilan butlash uchun 590 mln soʻm, keyinchalik konvertatsiya qilish sharti bilan qogʻoz tayyorlash mashinasi olish, loyihalashtirish va mazkur mablagʻlar hisobiga butlash uchun 128 mln soʻm miqdorida kredit ajratish haqidagi masalani koʻrib chiqsin.

5. Yangiyoʻl sellyuloza-qogʻoz fabrikasiga, istisno tariqasida, banklarning kreditlari uchun hisob-kitob tugaguniga qadar qoʻshimcha qiymat soligʻini toʻla hajmda ushbu kreditlarni uzish uchun yoʻnaltirishga ruxsat berilsin.

6. “Oʻzbekmebel” DAB (Maqsudov)ning sellyuloza va qogʻoz ishlab chiqarish fabrikasi quvvati kredit ajratilgan kundan eʼtiboran bir yil-u uch oy mobaynida ishga tushirilishi haqidagi axboroti maʼlumot uchun qabul qilinsin.

7. “Oʻzistiqbolstat” davlat qoʻmitasi (Gʻafurov) 1997-yildan boshlab paxta linti ishlab chiqarish va undan foydalanish umumiy balansidan “Oʻzbekmebel” DABga fabrikaning ishga tushirilish muddati va barpo etilayotgan quvvatlarning oʻzlashtirilishiga qarab sellyuloza ishlab chiqarish uchun zarur boʻlgan hajmda lint ajratishni nazarda tutsin.

8. Oʻzbekiston Respublikasi Davlat tabiatni muhofaza qilish qoʻmitasi loyihani belgilangan tartibda davlat ekologiya ekspertizasidan oʻtkazsin.

9. Mazkur qarorning bajarilishini nazorat qilish Bosh vazir oʻrinbosarlari M. 3. Usmonov va R. R. Yunusovlar zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 11-aprel,

144-son