2010 - 2015-yillarda bolalar va oʻsmirlarni maʼnaviy kamol toptirishga yoʻnaltirilgan noshirlik mahsulotlarini nashr etish dasturi toʻgʻrisida (75-son)

23.04.2010

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Barkamol avlod yili”“ Davlat dasturi toʻgʻrisida” 2010-yil 27-yanvardagi PQ-1271-son qarori ijrosini taʼminlash hamda Davlat dasturida belgilangan 2010—2015-yillarda bolalar va oʻsmirlarni ulugʻ ajdodlarimiz maʼnaviy merosi, umuminsoniy qadriyatlar asosida maʼnaviy kamol toptirish, ular orasida sogʻlom turmush tarzini keng targʻib etish, yosh avlodni “ommaviy madaniyat” taʼsiridan muhofaza qilish, ularni vatanparvarlik ruhida tarbiyalash, ijodiy - intellektual salohiyatlarini roʻyobga chiqarishga yoʻnaltirilgan adabiyotlar va boshqa noshirlik mahsulotlarini nashr etish maqsadida Vazirlar Mahkamasi qaror qiladi:

1. 2010 — 2015-yillarda bolalar va oʻsmirlarni maʼnaviy kamol toptirishga yoʻnaltirilgan jahon va oʻzbek adabiyoti klassiklarining asarlari, oʻzbek xalqining buyuk mutafakkirlari, ajdodlarimizning maʼnaviy jasorati, qahramonliklari toʻgʻrisidagi noshirlik mahsulotlarini lotin yozuviga asoslangan oʻzbek alifbosida kitob va elektron shakllarda nashr etish dasturi (keyingi oʻrinlarda Dastur deb yuritiladi) 1-ilovaga muvofiq tasdiqlansin.

2. Dastur ijrosini muvofiqlashtirish boʻyicha Ishchi guruh 2-ilovaga* asosan tarkibda tashkil etilsin va unga quyidagi vazifalar yuklansin:

* 2-ilova berilmaydi

Dastur bajarilishining doimiy monitoringini olib borish, noshirlar va matbaa korxonalarining ushbu yoʻnalishdagi faoliyatini muvofiqlashtirish;

kitobxonlar, ota-onalar, noshirlar va taʼlim muassasalari mutaxassislarining taklif-mulohazalarini umumlashtirish, kitob mahsulotlari milliy bozori ehtiyojlarini muntazam oʻrganib, zarur hollarda Dasturga oʻzgartirish va qoʻshimchalar kiritish.

3. Oʻzbekiston matbuot va axborot agentligi hamda nashriyotlarning Dasturga kiritilgan kitoblarni noshirlar va homiylar mablagʻlari hisobidan nashr etish toʻgʻrisidagi takliflari maʼqullansin.

4. Oʻzbekiston Respublikasi Xalq taʼlimi vazirligi, Oliy va oʻrta maxsus taʼlim vazirligi, Madaniyat va sport ishlari vazirligi, Aloqa va axborotlashtirish agentligi hamda boshqa vazirliklar, idoralar, xoʻjalik boshqaruvi organlari oʻz tasarruflaridagi taʼlim, maʼnaviy-maʼrifiy, ilmiy-madaniy muassasalar hamda axborot-kutubxona, axborot-resurs markazlarining mavjud fondlarini ushbu Dasturga kiritilgan kitoblar bilan toʻldirib borish rejalarini bir oy muddatda ishlab chiqsinlar.

5. Oʻzbekiston matbuot va axborot agentligi, Oʻzbekiston Milliy axborot agentligi, “Kamolot” yoshlar ijtimoiy harakati, Respublika Maʼnaviyat targʻibot markazi, Xotin-qizlar qoʻmitasi, “Nuroniy” va “Mahalla” jamgʻarmalari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Dastur doirasida nashr etiladigan noshirlik mahsulotlarini mahalliy oʻzini-oʻzi boshqarish organlari, ommaviy axborot vositalari orqali aholi oʻrtasida keng targʻib qilishni, joylarda kitob savdosi tashkilotlari bilan hamkorlikda kitob savdosining keng koʻlamda tashkil etilishini taʼminlasinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Aripov zimmasiga yuklansin.

Oʻzbekiston Respublikasi Bosh vaziri Sh. MIRZIYOYEV

Toshkent sh.,

2010-yil 23-aprel,

75-son

Vazirlar Mahkamasining 2010-yil 23-apreldagi 75-son qaroriga 1-ILOVA

2010 — 2015-yillarda bolalar va oʻsmirlarni maʼnaviy kamol toptirishga yoʻnaltirilgan jahon va oʻzbek adabiyoti klassiklarining asarlari, oʻzbek xalqining buyuk mutafakkirlari, ajdodlarimizning maʼnaviy jasorati, qahramonliklari toʻgʻrisidagi noshirlik mahsulotlarini lotin yozuviga asoslangan oʻzbek alifbosida kitob va elektron shakllarda nashr etish dasturi

(Oʻzbekiston Respublikasi qonun hujjatlari toʻplami, 2010-y., 16-son, 125-modda)