Xiva shahrining 2500 yilligi yubileyiga tayyorgarlik koʻrish va uni oʻtkazish toʻgʻrisida (5-son)

03.01.1996

Oʻzbekiston Respublikasi Vazirlar Mahkamasining

qarori

Xiva shahrining jahon madaniyati taraqqiyotida tutgan alohida oʻrnini hisobga olgan holda, YUNESKO Bosh konferensiyasining 1995-yil oktyabr-noyabr oylarida Parijda oʻtgan 28-sessiyasi Xiva shahrining 2500 yilligini dunyo miqyosida keng nishonlash haqidagi qarordan kelib chiqib, Vazirlar Mahkamasi qaror qiladi:

1. YUNESKO Bosh konferensiyasi 28-sessiyasining Xiva shahrining 2500 yilligi yubileyini 1997-yilda YUNESKO rahnomaligida jahon miqyosida keng nishonlash haqidagi qarori toʻla qoʻllab-quvvatlansin va asos uchun qabul qilinsin.

2. Xiva shahrining 2500 yilligi yubileyiga tayyorgarlik koʻrish va uni oʻtkazish respublika tashkiliy qoʻmitasining tarkibi ilovaga muvofiq tasdiqlansin.

Tashkiliy qoʻmita bir oy muddatda Xiva shahri yubileyiga tayyorgarlik koʻrish va uni oʻtkazish yuzasidan asosiy tadbirlar rejasini ishlab chiqsin va amalga oshirishga kirishsin.

3. Oʻzbekiston Respublikasi Madaniyat ishlari vazirligi, Moliya vazirligi, Xorazm viloyati hokimligi va “Oʻzbekturizm” milliy kompaniyasi YUNESKO ekspert mutaxassislari bilan birgalikda bir oy muddatda Xiva shahrining tarixiy markazida va asosiy turistik marshrutida joylashgan noyob tarixiy-madaniy obidalarini 1996—2000-yillarda taʼmirlash va obodonlashtirish dasturini ishlab chiqsinlar va Tashkiliy qoʻmita tasdigʻiga kiritsinlar.

Shu jumladan 1996-1997-yillarda bajariladigan ishlar alohida belgilab qoʻyilsin va tegishli mablagʻ ajratilsin.

4. Oʻzbekiston Respublikasi Kommunal xizmat koʻrsatish vazirligi, melioratsiya va suv xoʻjaligi vazirligi Xorazm viloyati hokimligining buyurtmasiga muvofiq “Oʻzsuvqurilish” konserni hamda Davlat geologiya va mineral resurslar qoʻmitasi bilan birgalikda 1996-1997-yillarda shahar akvatoriyasida yer osti suvlari sathini belgilangan normativlarda boʻlishini taʼminlovchi chora-tadbirlarni ishlab chiqib, amalga oshirsinlar.

5. “Oʻzbekturizm” milliy kompaniyasi xorijiy va mahalliy turizm infrastrukturasini rivojlantirish, sayyohlarga xizmat koʻrsatishni yaxshilash choralarini koʻrsin, xorijiy sayyohlarni mamlakatimizning, jumladan Xorazm vohasining tarixiy-madaniy merosi bilan tanishtirish uchun keng jalb qilishni taʼminlasin.

6. Oʻzbekiston Respublikasi Davlat matbuot qoʻmitasi Fanlar akademiyasi bilan birgalikda Xiva shahrining milliy madaniyatimiz tarixida tutgan oʻrni haqida ilmiy, ilmiy-ommabop nashrlarni, turli taqvim va bukletlarni chop etishni oʻz rejalariga kiritsin.

7. Oʻzbekiston Respublikasi Fanlar akademiyasi Tashqi ishlar vazirligi, Madaniyat ishlari vazirligi bilan birgalikda 1997-yilda Xiva shahrida shaharning 2500 yilligi yubileyiga bagʻishlangan xalqaro ilmiy konferensiya oʻtkazsin.

8. Oʻzbekiston Respublikasi Madaniyat ishlari vazirligi YUNESKO boʻyicha Oʻzbekiston Respublikasi milliy komissiyasi va Xorazm viloyati hokimligi bilan birgalikda 1997-yilda Xiva shahrining yubileyini YUNESKOning Parijdagi qarorgohida yuksak darajada nishonlash boʻyicha Vazirlar Mahkamasiga takliflar kiritsin.

9. Xorazm viloyati hokimligi manfaatdor vazirliklar va idoralar bilan birgalikda 3 oy muddatda Xiva shahrini obodonlashtirish, aholini ichimlik suvi bilan taʼminlash, aloqa-transport, maishiy va sogʻliqni saqlash infrastrukturasini rivojlantirish dasturini ishlab chiqsin va amalga oshirishga kirishsin.

10. Oʻzbekiston Respublikasi Moliya vazirligi Xiva shahrining yubileyini oʻtkazish uchun 1996-1997-yillarda tayyorgarlik ishlarini bajarishga har yili belgilangan tartibda moliyaviy mablagʻlar ajratsin, ushbu xarajatlarning 50 foizidan teng ulushlarda respublika budjeti hamda Xorazm viloyati mahalliy budjeti, shuningdek, viloyat tashkilotlari va korxonalarining ixtiyoriy badallari hisobiga qoplanishini nazarda tutsin.

11. “Oʻzdavteleradio” kompaniyasi, “Oʻzdavkinokompaniya” va ommaviy axborot vositalari Xiva shahrining qadimiy tarixi va madaniyati, oʻziga xos sanʼatini targʻib etuvchi video, telefilmlar yaratishni, ommabop materiallar berib borilishini taʼminlasinlar.

12. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. Joʻrabekov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 3-yanvar,

5-son

Vazirlar Mahkamasining 1996-yil 3-yanvardagi 5-son qaroriga ILOVA

Xiva shahrining 2500 yilligi yubileyiga tayyorgarlik koʻrish va uni oʻtkazish Respublika tashkiliy qoʻmitasining

TARKIBI