“Bolalar sanʼati-2000” Xalqaro festivalida Oʻzbekiston Respublikasining qatnashishiga tayyorgarlik koʻrish toʻgʻrisida (514-son)

09.12.1998

Oʻzbekiston Respublikasi Vazirlar Mahkamasining

qarori

Oʻzbekiston Respublikasining 1999-yil iyul oyida Vashington shahri (AQSh)da oʻtkaziladigan “Bolalar sanʼati — 2000” xalqaro festivalida qatnashishi munosabati bilan, shuningdek bolalar sanʼatini qoʻllab-quvvatlash, jahonning turli mamlakatlari bolalari oʻrtasida oʻzaro fikrdoshlikni va madaniy aloqalarni qaror toptirishga koʻmaklashish, sanʼat sohasida bilim olish uchun shart-sharoitlar yaratish, maktab oʻquvchilarining kasb-hunar malakalarini rivojlantirish va umumakademik darajasini takomillashtirish maqsadida Vazirlar Mahkamasi qaror qiladi:

1. Badiiy akademiya, Xalq taʼlimi vazirligi, Madaniyat ishlari vazirligi, “Sogʻlom avlod uchun” va “Kamolot” jamgʻarmalari Oʻzbekiston Respublikasining “Bolalar sanʼati — 2000” xalqaro festivaliga tayyorgarlik koʻrishi va qatnashishi uchun masʼul etib belgilansin.

Oʻzbekiston Respublikasining Xalqaro festivalga tayyorgarlik koʻrish va qatnashishiga doir tadbirlarni muvofiqlashtirish Oʻzbekiston Badiiy akademiyasi va Oʻzbekiston Respublikasi Madaniyat ishlari vazirligiga yuklansin.

2. Oʻzbekiston Respublikasining “Bolalar sanʼati — 2000” xalqaro festivalida qatnashishiga tayyorgarlik koʻrish boʻyicha 1-ilovaga muvofiq tashkiliy qoʻmita tashkil etilsin hamda festivalda qatnashish uchun bolalar ijodiyoti asarlarini tanlash boʻyicha hakamlik tarkibi 2-ilovaga muvofiq tasdiqlansin.

3. Tashkiliy qoʻmita:

Oʻzbekiston Respublikasining Bolalar sanʼati xalqaro festivalida qatnashishiga tayyorgarlik koʻrish boʻyicha tadbirlar rejasini bir hafta muddatda ishlab chiqsin va tasdiqlasin;

“Bolalar sanʼati — 2000” xalqaro festivalining milliy bosqichini oʻtkazish toʻgʻrisidagi Nizomni ikki hafta muddatda ishlab chiqsin;

Oʻzbekiston Badiiy akademiyasi bilan birgalikda milliy stend ramzini va logotipini ishlab chiqsin va tasdiqlasin.

4. Oʻzbekiston Badiiy akademiyasi Tashqi iqtisodiy aloqalar vazirligi bilan birgalikda “Bolalar sanʼati — 2000” festivalida bolalar asarlari koʻrgazmasi tashkil qilinishini taʼminlasin.

5. Xalq taʼlimi vazirligi, Madaniyat ishlari vazirligi, “Kamolot”, “Sogʻlom avlod uchun” jamgʻarmalari 1999-yil 20-iyungacha Qoraqalpogʻiston Respublikasida hamda barcha viloyatlarda va Toshkent shahrida bolalar sanʼati festivallarining bosqichma-bosqich oʻtkazilishini taʼminlasinlar.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bolalar sanʼati festivallarining yuqori tashkiliy darajada, homiy tashkilotlar jalb etilgan va gʻoliblar taqdirlangan holda oʻtkazilishini taʼminlasinlar.

7. Oʻzbekiston Respublikasining “Bolalar sanʼati — 2000” xalqaro festivalida qatnashishiga tayyorgarlik koʻrish va ishtirok etishi boʻyicha xarajatlar Oʻzbekiston Respublikasining homiylik tashkilotlari mablagʻlari hisobiga qoplanishi maʼlumot uchun qabul qilinsin.

Homiylik tashkilotlari roʻyxatiga 3-ilovaga muvofiq rozilik berilsin.

Belgilab qoʻyilsinki, koʻrgazma maydonchalari homiylik mablagʻlari hisobiga ijaraga olinadi.

8. Oʻzbekiston Badiiy akademiyasi “Bolalar sanʼati — 2000” xalqaro festivaliga tayyorgarlik koʻrish va qatnashish boʻyicha xarajatlarni qoplash uchun:

homiylik tashkilotlari mablagʻlarini jamlash uchun maxsus bank schyoti ochsin;

Oʻzbekiston Respublikasining “Bolalar sanʼati — 2000” xalqaro festivalida qatnashishiga tayyorgarlik koʻrish boʻyicha erkin almashtiriladigan valyutada amalga oshiriladigan xarajatlar smetasini, festival tashkilotchilari tomonidan beriladigan imtiyozlarni hisobga olgan holda, Moliya vazirligi bilan kelishib olsin.

9. Oʻzbekiston Respublikasi hududidan olib chiqib ketiladigan eksponatlarga Oʻzbekiston Respublikasi Madaniy ishlari vazirligining badiiy ekspertiza boshqarmasi tomonidan beriladigan guvohnoma taqdim etilishi kerakligi maʼlumot uchun qabul qilinsin.

10. Oʻzbekiston Respublikasi Davlat bojxona qoʻmitasi Vashington shahriga “Bolalar sanʼati — 2000” xalqaro festivaliga yuborilayotgan koʻrgazmaga qoʻyiladigan yuklar tashkiliy qoʻmita tomonidan tasdiqlangan roʻyxatlar boʻyicha bojxona tartibotlari oʻtkazilganligi uchun bojxona yigʻimlari undirilmasdan tezlikda rasmiylashtirilishini taʼminlasin.

11. “Oʻzbekiston havo yoʻllari” milliy aviakompaniyasi Vashington shahriga bolalar asarlari koʻrgazmasi hamda “Bolalar sanʼati — 2000” xalqaro festivalida ishlash uchun AQShga boradigan mutaxassislar aeroport yigʻimlari undirilmasdan oʻz vaqtida yetkazilishini taʼminlasin.

12. Davlat matbuot qoʻmitasi, Oʻzbekiston Teleradiokompaniyasi, Oʻzbekiston Milliy axborot agentligi, ommaviy axborot vositalari Qoraqalpogʻiston Respublikasi, viloyatlar va Toshkent shahrida oʻtkaziladigan bolalar sanʼati festivallari hamda Oʻzbekiston Respublikasining AQShda “Bolalar sanʼati — 2000” xalqaro festivalida qatnashishi keng yoritilishini taʼminlasinlar.

13. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari D.M. Gʻulomova zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 9-dekabr,

514-son

Vazirlar Mahkamasining 1998-yil 9-dekabrdagi 514-son qaroriga 1-ILOVA

Oʻzbekiston Respublikasining “Bolalar sanʼati — 2000” xalqaro festivalida qatnashishiga tayyorgarlik koʻrish boʻyicha tashkiliy qoʻmita

TARKIBI

Vazirlar Mahkamasining 1998-yil 9-dekabrdagi 514-son qaroriga 2-ILOVA

“Bolalar sanʼati — 2000” xalqaro festivalida qatnashish uchun bolalar ijodiyoti asarlarini tanlash boʻyicha hakamlar hayʼati

TARKIBI

Vazirlar Mahkamasining 1998-yil 9-dekabrdagi 514-son qaroriga 3-ILOVA

Oʻzbekiston Respublikasining “Bolalar sanʼati — 2000” xalqaro festivalida qatnashishiga tayyorgarlik koʻrishga doir xarajatlarni qoplash uchun mablagʻ ajratuvchi homiylik tashkilotlari

ROʻYXATI