“Keys” korporatsiyasi ishtirokidagi qoʻshma korxonalarni qoʻllab-quvvatlash yuzasidan qoʻshimcha chora-tadbirlar toʻgʻrisida (508-son)

03.12.1998

Oʻzbekiston Respublikasi Vazirlar Mahkamasining

qarori

[Koʻchirma]

“Keys” korporatsiyasi ishtirokidagi qoʻshma korxonalar tomonidan qishloq xoʻjaligiga yetkazib berilayotgan texnika va koʻrsatilayotgan servis va lizing xizmatlari qiymatini pasaytirish maqsadida Vazirlar Mahkamasi qaror qiladi:

1. Belgilansinki, “Keys” korporatsiyasi tomonidan qoʻshma korxonalarning ustav fondiga ulush sifatida olib kelinayotgan asbob-uskunalar, moddiy-texnika resurslari, butlovchi buyumlar, transport vositalari Oʻzbekiston Respublikasi hududida amal qiluvchi soliqlar va bojlarning barcha turlaridan ozod qilinadi.

2. “OʻzKeysmash”, “OʻzKeysTraktor”, “OʻzKeysservis” va “OʻzKeysagrolizing” qoʻshma korxonalari besh yil muddatga:

texnika ishlab chiqarish hamda lizing va servis xizmatlari koʻrsatish uchun import qilinayotgan asbob-uskunalar, butlovchi buyumlar, ehtiyot qismlar va boshqa moddiy-texnika resurslariga Oʻzbekiston Respublikasi hududida amal qiluvchi barcha boj toʻlovlari (qoʻshilgan qiymat soligʻi, aksizlar va bojlar)dan;

Oʻzbekiston Respublikasi hududida ishlab chiqarilayotgan texnikaga hamda koʻrsatilayotgan lizing va servis xizmatlariga qoʻshilgan qiymat soligʻidan ozod qilinsin.

4. Oʻzbekiston Respublikasi Tashqi iqtisodiy aloqalar vazirligi Vazirlar Mahkamasi tomonidan tasdiqlanadigan biznes-rejalar asosida “OʻzKeysmash”, OʻzKeysTraktor”, “OʻzKeysservis” va “OʻzKeysagrolizing” qoʻshma korxonalari tomonidan qishloq xoʻjaligi texnikasi ishlab chiqarish, servis va lizing xizmatlari koʻrsatish uchun asbob-uskunalar, ehtiyot qismlar va materiallarni import qilishga doir kontraktlarni roʻyxatdan oʻtkazsin.

6. Hisob-kitoblar mexanizmini takomillashtirish va budjetga toʻlovlar intizomini mustahkamlash boʻyicha Hukumat komissiyasi “OʻzKeysmash”, “OʻzKeysservis”, OʻzKeysagrolizing” va “OʻzKeysTraktor” qoʻshma korxonalarini yetkazib berilgan texnika, ehtiyot qismlar va koʻrsatilgan servis va lizing xizmatlariga haq toʻlash uchun 23202-maxsus schyot boʻyicha avans toʻlovlari hisobiga maxsus transhlarga kiritishni nazarda tutsin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 3-dekabr,

508-son