“Kor farmsanoat” Oʻzbekiston-Hindiston qoʻshma korxonasining barqaror ishlashini taʼminlash chora-tadbirlari toʻgʻrisida (457-son)

02.11.1998

Oʻzbekiston Respublikasi Vazirlar Mahkamasining

qarori

[Koʻchirma]

Ichki bozorni yuqori sifatli dori-darmon vositalari bilan toʻldirish maqsadida Vazirlar Mahkamasi qaror qiladi:

1. Quyidagilar:

“Oʻzfarmsanoat” davlat-aksiyadorlik konserni ishtirokida yiliga 6,6 mln flakon infuzion eritma hamda 396 mln tabletka va kapsula tayyor dori-darmon vositalari ishlab chiqarish loyiha quvvatiga ega boʻlgan “Kor Farmsanoat” Oʻzbekiston — Hindiston qoʻshma korxonasi tashkil etilganligi;

“Oʻzfarmsanoat” konserni, Oʻzbekiston kimyo-farmatsevtika ilmiy-tadqiqot instituti, “Texnofarm” ochiq turdagi aksiyadorlik jamiyati, Hindistonning “Kor Xelsker Limited” kompaniyasi va Xalqaro moliya korporatsiyasi “Kor Farmsanoat” qoʻshma korxonasining muassislari ekanligi;

korxonaning ustav sarmoyasi 5,5 mln AQSH dollari, shu jumladan, Oʻzbekiston tomoni ulushi — 1,37 mln AQSH dollari (25 foiz), Hindiston tomoni ulushi — 3,63 mln AQSH dollari (66 foiz), Xalqaro moliya korporatsiyasi ulushi — 0,5 mln AQSH dollari (9 foiz) miqdorida belgilanganligi;

“Kor Farmsanoat” qoʻshma korxonasi va Xalqaro moliya korporatsiyasi oʻrtasidagi 6,7 mln AQSH dollari miqdorida kredit berilishi toʻgʻrisidagi qarz bitimiga muvofiq ajratilgan kreditning 3,35 mln AQSH dollari miqdoridagi birinchi qismi toʻliq oʻzlashtirilganligi maʼlumot uchun qabul qilinsin. Kredit “Kor Farmsanoat” qoʻshma korxonasining oʻz mablagʻlari hisobidan qaytariladi.

2. “Kor Farmsanoat” qoʻshma korxonasi ishlab chiqarishni tashkil etish va mahsulot ishlab chiqarish uchun olib kelinadigan moddiy-texnika resurslarining barcha turlariga, shu jumladan, asbob-uskunalarga, priborlar va mexanizmlarga, yordamchi materiallarga, dori-darmon vositalarining substansiyalariga boj va yigʻimlar toʻlashdan (bojxona rasmiylashtiruvi amalga oshirilganligi uchun boj yigʻimlaridan tashqari) 3 yil muddatga ozod qilinsin.

3. “Kor Farmsanoat” qoʻshma korxonasi loyihasi masalalari boʻyicha ishlash uchun kelayotgan chet ellik mutaxassislarga respublika hududida yashashlari va transportning barcha turlarida yurishlari uchun Oʻzbekiston Respublikasi fuqarolari uchun nazarda tutilgan tariflar boʻyicha haq toʻlash huquqi berilsin.

4. Oʻzbekiston Respublikasi Makroiqtisodiyot va statistika vazirligi, Moliya vazirligi 1999-yil va keyingi yillar uchun prognozni shakllantirishda “Kor Farmsanoat” qoʻshma korxonasining ishlab chiqarish ehtiyojlari uchun xom ashyo va materiallar import qilinishini nazarda tutsinlar.

6. Oʻzbekiston Respublikasi Tashqi iqtisodiy aloqalar vazirligi “Kor Farmsanoat” qoʻshma korxonasining ishlab chiqarish ehtiyojlari uchun asbob-uskunalar, xom ashyo va materiallar yetkazib berish yuzasidan import kontraktlarni belgilangan muddatlarda roʻyxatdan oʻtkazsin.

7. “Oʻzbekneftgaz” milliy korporatsiyasi korxonaning ishlab chiqarish ehtiyojlari uchun “Kor Farmsanoat” qoʻshma korxonasiga gaz uchun limit ajratish toʻgʻrisidagi masalani bir oy muddatda koʻrib chiqsin va hal qilsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H. Karamatov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 2-noyabr,

457-son