Xalqaro simfonik musiqa festivalini oʻtkazish toʻgʻrisida (372-son)

29.08.1998

Oʻzbekiston Respublikasi Vazirlar Mahkamasining

qarori

Zamonaviy oʻzbek kompozitorlik ijodiyotining yutuqlarini keng targʻib qilish, anʼanaviy musiqa sanʼati bilan zamonaviy kompozitorlik hamda ijro maktablarining mushtarak rivojlanishini taʼminlash, yosh avlod qalbida milliy va umuminsoniy qadriyatlarga, xususan, musiqa sanʼatiga boʻlgan mehru muhabbat tuygʻularini kamol toptirish, shuningdek ijodiy hamkorlik doirasini yanada kengaytirish maqsadida Vazirlar Mahkamasi qaror qiladi:

1. Oʻzbekiston Bastakorlar uyushmasining Madaniyat ishlari vazirligi, “Oʻzbeknavo” gastrol-konsert birlashmasi va “Oʻzteleradiokompaniya” bilan hamkorlikda 1998-yil 22 — 27-sentabr kunlari Toshkent shahrida xalqaro zamonaviy simfonik musiqa festivalini oʻtkazish toʻgʻrisidagi taklifi qabul qilinsin.

2. Festivalni oʻtkazish tashkiliy qoʻmitasi tarkibi 1-ilovaga, festival Nizomi 2-ilovaga, sarf-xarajatlar smetasi 3-ilovaga muvofiq tasdiqlansin.

3. Tashkiliy qoʻmita bir hafta muddatda:

festivalga tayyorgarlik koʻrish va uni oʻtkazish tadbirlari rejasini;

festival bosh direksiyasi tarkibini;

festival dasturini ishlab chiqsin va tasdiqlasin hamda homiylar roʻyxatini aniqlasin.

4. Homiylarning foydadan toʻlaydigan soliq boʻyicha bazasi qonunchilikda belgilangan miqdorlarda kamaytirilishi nazarda tutilsin.

5. “Oʻzbekturizm” milliy kompaniyasi tashkiliy qoʻmita buyurtmasiga muvofiq festival qatnashchilari uchun mehmonxonalardan joy ajratsin.

6. Oʻzbekiston Respublikasi Tashqi ishlar vazirligi, Davlat bojxona qoʻmitasi va “Oʻzbekiston havo yoʻllari” milliy aviakompaniyasi xorijiy ishtirokchilarni bojxona, viza va aeroport toʻlovlaridan ozod etsinlar.

7. Oʻzbekiston Respublikasi Moliya vazirligi festivalga tayyorgarlik koʻrish va uni oʻtkazish bilan bogʻliq sarf-xarajatlarni qoplash uchun respublika budjetidan 4789,5 ming soʻm ajratsin.

Maʼlumot uchun qabul qilinsinki:

sarf-xarajatlarning 3198,0 ming soʻmi homiylar hisobidan qoplanadi;

50 nafar xorijiy ishtirokchining Oʻzbekistonga kelib-ketish — transport xarajatlari ularning oʻz zimmasida, Oʻzbekiston hududidagi xarajatlari qabul qiluvchi tomon zimmasida boʻladi.

8. “Oʻzteleradiokompaniya”, OʻzA, ommaviy axborot vositalariga festival ishini muntazam yoritib borish tavsiya etilsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.Azizxoʻjayev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1998-yil 29-avgust,

372-son

Vazirlar Mahkamasining 1998-yil 29-avgustdagi 372-son qaroriga 1-ILOVA

Xalqaro simfonik musiqa festivalini oʻtkazish tashkiliy qoʻmitasi

TARKIBI

Vazirlar Mahkamasining 1998-yil 29-avgustdagi 372-son qaroriga 2-ILOVA

Xalqaro simfonik musiqa festivali

NIZOMI

Festival oʻzbek milliy simfonik musiqa sanʼati anʼanalarini va bugungi yutuqlarini, kompozitorlik va ijro maktablari ijodiyotining yorqin namunalarini keng targʻib qilish, zamonaviy simfonik musiqa ijodkorlarining intilishlarini ragʻbatlantirish hamda ijodiy hamkorlik doirasini yanada kengaytirish niyatida taʼsis etilgan.

Festival 1998-yil 22 — 27-sentabr kunlari Toshkent shahrida oʻtkaziladi.

I. FESTIVAL TUZILMASI

Oʻzbekiston Bastakorlar uyushmasi, Madaniyat ishlari vazirligi, “Oʻzbeknavo” gastrol-konsert birlashmasi, “Oʻzteleradio” kompaniyasi, Toshkent davlat konservatoriyasi festivalning asosiy taʼsischilaridir.

II. FESTIVAL TADBIRLARI

Festival doirasida quyidagi tadbirlar oʻtkaziladi:

1. Festivalga taqdim etilgan Oʻzbekiston va chet el kompozitorlarining simfonik, kamer asarlaridan konsertlar;

2. Organ musiqasi konserti;

3. “Milliy anʼanalar va hozirgi zamon kompozitorlik ijodiyoti” mavzusida davra suhbati.

III. FESTIVAL ShARTLARI

Festivalda oʻzbekistonlik va xorijiy musiqa sanʼati namoyandalari, kompozitor, dirijyor, musiqashunos va boshqa ijodkorlar qatnashishi mumkin. Har bir mamlakatdan ikki kishi taklif etiladi. Toshkentga kelib-ketish — transport xarajatlari ishtirokchining oʻz zimmasida boʻladi.

Qatnashuvchilar tashkiliy qoʻmitaga belgilangan muddatda musiqiy asarlarining klavir, partitura va ovozlarini taqdim etadilar. Har bir asarning ijrosi 30 daqiqadan oshmasligi va quyidagi yoʻnalishlardan iborat boʻlishi lozim:

simfonik asarlar (uvertyura, poema, simfoniya, konsert va h.k.);

kamer asarlari (vokal, cholgʻu, orkestr va h.k.).

IV. FESTIVAL OʻTKAZUVChI TOMONNING MAJBURIYATLARI

Festivalga taqdim etilgan musiqiy asarlarning ijro etilishini taʼminlash;

festival qatnashchilarining festivalda ishtirok etishi bilan bogʻliq sarf-xarajatlarni, shu jumladan, mehmonxonada yashash, ovqatlanish, Oʻzbekiston hududida transportda yurish xarajatlarini qoplash.

Vazirlar Mahkamasining 1998-yil 29-avgustdagi 372-son qaroriga 3-ILOVA

Xalqaro musiqa festivalini oʻtkazish xarajatlari

SMETASI