“Oʻzbekneftgaz” mxk korxonalari tizim ichida mahsulot yetkazib berish boʻyicha tabiiy gazni pirovard isteʼmolchiga sotishdan davlat maqsadli jamgʻarmalariga majburiy ajratmalar toʻlash tartibi haqida nizomni tasdiqlash toʻgʻrisida (2088-son)

19.03.2010

Oʻzbekiston Respublikasi Moliya vazirligi Oʻzbekiston Respublikasi Davlat soliq qoʻmitasining

Qarori

[Oʻzbekiston Respublikasi Adliya vazirligi tomonidan 2010-yil 19-martda 2088-son bilan davlat roʻyxatidan oʻtkazildi]

Oʻzbekiston Respublikasi Soliq kodeksi, Oʻzbekiston Respublikasi “Davlat soliq xizmati toʻgʻrisida”gi Qonunining 7-moddasi, Oʻzbekiston Respublikasi Prezidentining 2009-yil 22-dekabrdagi PQ-1245-son “Oʻzbekiston Respublikasining 2010-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qaroriga muvofiq Oʻzbekiston Respublikasi Moliya vazirligi va Davlat soliq qoʻmitasi qaror qiladi:

1. “Oʻzbekneftgaz” MXK korxonalari tizim ichida mahsulot yetkazib berish boʻyicha tabiiy gazni pirovard isteʼmolchiga sotishdan davlat maqsadli jamgʻarmalariga majburiy ajratmalar toʻlash tartibi haqidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kundan keyin kuchga kiradi.

Moliya vaziri R. AZIMOV

Toshkent sh.,

2010-yil 19-fevral,

14-son

Davlat soliq qoʻmitasi raisi B. PARPIYEV

Toshkent sh.,

2010-yil 19-fevral,

2010-5-son

Oʻzbekiston Respublikasi Moliya vazirligi va Davlat soliq qoʻmitasining 2010-yil 19-fevraldagi 14, 2010-5-sonli qaroriga ILOVA

“Oʻzbekneftgaz” MXK korxonalari tizim ichida mahsulot yetkazib berish boʻyicha tabiiy gazni pirovard isteʼmolchiga sotishdan davlat maqsadli jamgʻarmalariga majburiy ajratmalar toʻlash tartibi toʻgʻrisida

Nizom

Ushbu Nizom Oʻzbekiston Respublikasi Soliq kodeksi, Oʻzbekiston Respublikasi “Davlat soliq xizmati toʻgʻrisida”gi Qonunining 7-moddasi, Oʻzbekiston Respublikasi Prezidentining 2009-yil 22-dekabrdagi PQ-1245-son “Oʻzbekiston Respublikasining 2010-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qaroriga muvofiq “Oʻzbekneftgaz” MXK korxonalari tizim ichida mahsulot yetkazib berish boʻyicha tabiiy gazni pirovard isteʼmolchiga sotishdan davlat maqsadli jamgʻarmalariga majburiy ajratmalar toʻlash tartibini belgilaydi.

I. Umumiy qoidalar

1. Oʻzbekiston Respublikasi Prezidentining 2009-yil 22-dekabrdagi PQ-1245-son “Oʻzbekiston Respublikasining 2010-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qarorining 5-bandiga muvofiq 2010-yil 1-yanvardan boshlab “Oʻzbekneftgaz” MXK korxonalari uchun tizim ichida mahsulot yetkazib berish boʻyicha tabiiy gazni pirovard isteʼmolchiga sotishdan davlat maqsadli jamgʻarmalariga majburiy ajratmalar toʻlash tartibi joriy etilgan.

2. Mazkur Nizom tizim ichida tabiiy gazni yetkazib berishni amalga oshiruvchi mazkur Nizomning ilovasida koʻrsatilgan “Oʻzbekneftgaz” MXK korxonalariga tatbiq etiladi.

3. Mazkur Nizomning ilovasida koʻrsatilgan korxonalar oʻrtasida tabiiy gazni yetkazib berish tizim ichida hisoblanadi, shu jumladan neft va gazni qazib oluvchi korxonalardan gazni qayta ishlovchi va gaz transporti korxonalarigacha, shuningdek gazni qayta ishlovchi korxonalardan gaz transporti korxonalarigacha yetkazish.

II. Tabiiy gazni sotishdan maqsadli jamgʻarmalarga majburiy ajratmalarni hisoblash, toʻlash va hisobot topshirish tartibi

4. “Oʻzbekneftgaz” MXK korxonalari maqsadli jamgʻarmalarga majburiy ajratmalarni pirovard isteʼmolchiga yetkazib berilgan tabiiy gaz hajmidan, qoʻshilgan qiymat soligʻi va aksiz soligʻini chegirib tashlagan holda hisoblaydi va toʻlaydi. Bunda pirovard isteʼmolchi boʻlib mazkur Nizomning ilovasida koʻrsatib oʻtilmagan shaxs hisoblanadi.

5. “Oʻztransgaz” AK orqali tabiiy gaz transportirovkasi boʻyicha xizmat koʻrsatish shartnomalariga asosan tabiiy gaz transportirovkasini amalga oshiradigan korxonalar ushbu tabiiy gazni sotish hajmidan majburiy ajratmalarni davlat maqsadli jamgʻarmalariga qonunchilikda belgilangan tartibda toʻlaydi.

6. “Oʻzbekneftgaz” MXK korxonalari soliq hisoboti shakllarida davlat maqsadli jamgʻarmalariga majburiy ajratmalar boʻyicha soliq solish bazasidan chiqariladigan tizim ichida yetkazib berilgan tabiiy gaz hajmini alohida satrda koʻrsatadi.

III. Yakuniy qoidalar

7. Mazkur Nizom talablariga rioya etish boʻyicha javobgarlik “Oʻzbekneftgaz” MXK korxonalari rahbarlari va bosh buxgalterlari zimmasiga yuklatiladi.

8. Mazkur Nizomga rioya etish ustidan nazorat Davlat soliq xizmati organlari tomonidan amalga oshiriladi.

9. Mazkur Nizom “Oʻzbekneftgaz” MXK bilan kelishilgan.

“Oʻzbekneftgaz” MXK Boshqaruvi raisi U. NAZAROV

2010-yil 18-fevral

“Oʻzbekneftgaz” MXK korxonalari tizim ichida mahsulot yetkazib berish boʻyicha tabiiy gazni pirovard isteʼmolchiga sotishdan davlat maqsadli jamgʻarmalariga majburiy ajratmalar toʻlash tartibi haqidagi nizomga ILOVA

Tabiiy gazni tizim ichida mahsulot yetkazib berish boʻyicha “Oʻzbekneftgaz” MXK KORXONALARI

1. “Muborakneftgaz” MChJ 2. “Shoʻrtanneftgaz” MChJ 3. “Gazlineftgazqazibchiqarish” MChJ 4. “Ustyurtgaz” MChJ 5. “Andijonneft” AJ 6. “Gissarneftgaz” MChJ * 7. “Koʻkdumaloqgaz” MChJ * 8. “Muborak gazni qayta ishlash zavodi” MChJ 9. “Shoʻrtan gaz kimyo majmuasi” MChJ 10. “Oʻztransgaz” AK 11. “Uz-Kor Gas Chemical” MChJ QK

Izoh:

* “Oʻztransgaz” aksiyadorlik kompaniyasiga yetkazib berilgan tabiiy gaz hajmi boʻyicha.