Imom al-Buxoriy tavalludining hijriy-qamariy taqvim boʻyicha 1225 yilligini nishonlash toʻgʻrisida (217-son)
29.04.1997
Oʻzbekiston Respublikasi Vazirlar Mahkamasining
qarori
Hadis ilmining ravnaqiga ulkan hissa qoʻshgan yirik alloma, buyuk vatandoshimiz Imom al-Buxoriy ilmiy-diniy merosining xalqimiz maʼnaviy-ruhiy hayotidagi beqiyos oʻrnini va mamlakat keng jamoatchiligining takliflarini hisobga olib hamda ushbu merosni asrab-avaylash, qadrlash va jamiyatning barkamol kishilarini tarbiyalashda undan oqilona foydalanishga shart-sharoit yaratish maqsadida Vazirlar Mahkamasi qaror qiladi:
1. 1998-yilda Imom al-Buxoriy tavalludining hijriy-qamariy taqvim boʻyicha 1225 yilligi mamlakatimizda keng nishonlansin.
Ushbu sanaga tayyorgarlik koʻrish va uni oʻtkazish boʻyicha respublika tashkiliy qoʻmitasi 1-ilovaga muvofiq tarkibda tuzilsin.
Tashkiliy qoʻmita oʻn besh kun muddatda tegishli vazirliklar va idoralar, Samarqand va Buxoro viloyatlari hokimliklarining takliflari asosida oʻz tadbirlarini ishlab chiqsin va ularni bajarishga kirishsin.
2. Samarqand viloyatidagi Imom al-Buxoriy maqbarasi va masjidini taʼmirlash hamda bu yerda qadimiy milliy meʼmorchilik anʼanalari bilan uygʻunlashgan zamonaviy inshootlardan iborat betakror muhtasham yodgorlik majmuini barpo etish uchun loyihaviy takliflarni tayyorlovchi komissiya 2-ilovaga muvofiq tashkil etilsin.
Komissiya ikki oy muddat ichida YUNESKO ekspertlarini va xalqaro tashkilotlarning, jumladan, shahzoda Charlz Uelskiyning Meʼmorlik instituti va Oksford islom tadqiqotlari markazi (Buyuk Britaniya) mutaxassislarini jalb qilgan holda tegishli takliflarni tayyorlasin va tasdiqlashga kiritsin.
3. Oʻzbekiston Respublikasi Madaniyat ishlari vazirligi Fanlar akademiyasi, Oʻzbekiston musulmonlari idorasi, Samarqand va Buxoro viloyatlari hokimliklari bilan birgalikda mamlakat hududidagi Imom al-Buxoriy nomi va davri bilan bogʻliq qadamjolar, obidalar roʻyxatini aniqlasin va ularni taʼmirlash-konservatsiyalash boʻyicha belgilangan tartibda taklif tayyorlasin.
4. Samarqand viloyati hokimligi va Oʻzbekiston Respublikasi Madaniyat ishlari vazirligi Imom al-Buxoriy maqbarasi majmuidagi taʼmirlash-qurilish ishlarini 1998-yilning avgust oyigacha tugallashni taʼminlasin.
“Oʻzistiqbolstat” davlat qoʻmitasi Imom al-Buxoriy maqbarasi majmuidagi yangi inshootlar qurilishini 1998-yilgi investitsiya dasturida belgilangan tartibda inobatga olsin.
5. Oʻzbekiston Respublikasi Fanlar akademiyasi Tashqi ishlar vazirligi, Madaniyat ishlari vazirligi, YUNESKO ishlari boʻyicha Oʻzbekiston Respublikasi milliy komissiyasi, Din ishlari boʻyicha qoʻmita, Oʻzbekiston musulmonlari idorasi va Samarqand viloyati hokimligi bilan birgalikda va YUNESKOning xalqaro tadbirlari doirasida 1998-yil sentyabr oyida Samarqand shahrida “Imom al-Buxoriy va uning dunyo madaniyatida tutgan oʻrni” mavzuida xalqaro ilmiy-amaliy anjuman oʻtkazsin.
6. Oʻzbekiston Respublikasi Davlat matbuot qoʻmitasi 1997-1998-yillarda Imom al-Buxoriy asarlari hamda uning hayoti va ijodiga oid nashrlarni oʻzbek, arab, rus va ingliz tillarida chop etishni nashriyotlarning rejasiga kiritsin.
7. “Oʻzbekkino” davlat-aksionerlik kompaniyasi 1998-yilda Imom al-Buxoriy merosining mohiyatini va bugungi kundagi ahamiyatini ochib beruvchi 2 qismli hujjatli ilmiy-ommabop film yaratsin va uning xorijiy tillarga dublyaj qilinishini taʼminlasin.
8. Oʻzbekiston Respublikasi Aloqa vazirligi Imom al-Buxoriy tavalludining 1225 yilligiga bagʻishlangan pochta markalari, otkritkalar, xatjildlar chiqarsin.
9. Oʻzbekiston Teleradiokompaniyasi va boshqa ommaviy axborot vositalari Imom al-Buxoriy hayoti va ilmiy faoliyatini, yubileyga tayyorgarlikning borishini keng yoritsinlar.
10. Ushbu qarorda koʻrsatilgan tadbirlarni va tashkiliy qoʻmita tasdiqlaydigan ishlarni amalga oshirish xarajatlari teng ulushlarda respublika budjeti va mahalliy budjetlar hisobidan qoplanishi belgilab qoʻyilsin.
Bu ishga Oʻzbekiston musulmonlari idorasi, homiylar, shu jumladan, xorijiy homiylarning oʻz ulushlarini qoʻshish haqidagi taklif-istaklari qoʻllab-quvvatlansin.
11. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.Joʻrabekov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1997-yil 29-aprel,
217-son
Vazirlar Mahkamasining 1997-yil 29-apreldagi 217-son qaroriga 2-ILOVA
Imom al-Buxoriy maqbarasi majmuini taʼmirlash va barpo etish boʻyicha taklif tayyorlovchi komissiya
TARKIBI