“Navoiy viloyatida ammiak va karbamid ishlab chiqarishlari kompleksini qurish” investitsiya loyihasini amalga oshirish chora-tadbirlari toʻgʻrisida (46-son)

16.03.2010

Oʻzbekiston Respublikasi Vazirlar Mahkamasining

qarori

[Koʻchirma]

Ilgʻor, energiyani tejaydigan texnologiyalarni joriy etish hisobiga mineral oʻgʻitlar ishlab chiqarish quvvatlarini yanada rivojlantirish va modernizatsiya qilish, shuningdek respublika kimyo tarmogʻining eksport salohiyatini oshirish maqsadida Vazirlar Mahkamasi qaror qiladi:

1. Quyidagilar:

“Oʻzkimyosanoat” davlat-aksiyadorlik kompaniyasi bilan “International Petroleum Investment Company” kompaniyasi (BAA) oʻrtasida yiliga 900 ming tonna ammiak va 1 mln tonna karbamid ishlab chiqarish quvvatiga ega boʻlgan “Navoiy viloyatida ammiak va karbamid ishlab chiqarishlari kompleksini qurish” investitsiya loyihasini amalga oshirish toʻgʻrisida ahdlashuvga erishilganligi;

koʻrsatib oʻtilgan loyihani amalga oshirish doirasida ustav jamgʻarmasida Oʻzbekiston va xorijiy tomonning ulushlari teng boʻlgan xorijiy investitsiyalar ishtirokidagi korxona tashkil etish nazarda tutilayotganligi maʼlumot uchun qabul qilinsin.

2. Oʻzbekiston Respublikasi Hukumati nomidan Oʻzbekiston Respublikasi Tashqi iqtisodiy aloqalar, investitsiyalar va savdo vazirligi bilan “International Petroleum Investment Company” kompaniyasi (BAA) oʻrtasidagi 2010-yil 19-fevralda imzolangan Bazaviy investitsiya bitimi tasdiqlansin.

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, “Oʻzkimyosanoat” davlat-aksiyadorlik kompaniyasi manfaatdor vazirliklar va idoralar bilan birgalikda tasdiqlangan Bazaviy investitsiya bitimiga binoan qabul qilingan majburiyatlarning xorijiy investor tomonidan soʻzsiz bajarilishi yuzasidan nazoratni belgilangan tartibda taʼminlasinlar.

3. Belgilab qoʻyilsinki, “International Petroleum Investment Company” kompaniyasi (BAA) — xorijiy investor Bazaviy investitsiya bitimiga muvofiq oʻz zimmasiga:

Oʻzbekiston Respublikasi Hukumati kafolatini bermasdan, loyihani moliyalashtirish shartlarida loyihaning qarz qismini moliyalashtirish uchun xorijiy banklar va moliyaviy institutlar konsorsiumini tashkil etish;

tashkil etilayotgan qoʻshma korxona tomonidan ishlab chiqariladigan karbamidning kamida 70 foizi jahon narxlarida eksport qilinishini taʼminlash;

obyekt joylashtiriladigan joyda tibbiyot, sport-sogʻlomlashtirish va taʼlim muassasalari bepul qurilishini nazarda tutuvchi ijtimoiy infratuzilmani rivojlantirish dasturini amalga oshirish;

Oʻzbekiston Respublikasi qonun hujjatlarida va Bazaviy investitsiya bitimida nazarda tutilgan boshqa shartlarni bajarish boʻyicha majburiyatlar olgan.

Oʻzbekiston tomoni ammiak va karbamid ishlab chiqarishlari kompleksining faoliyat koʻrsatishi uchun zarur boʻlgan tashqi infratuzilma, shu jumladan energiya taʼminoti, ulanishning kelishilgan punktlarigacha avtomobil yoʻllari va temir yoʻllar qurilishini taʼminlaydi.

4. Koʻrsatib oʻtilgan loyihani amalga oshirish doirasida vazirliklar va idoralar faoliyati muvofiqlashtirilishini taʼminlash uchun ilovaga muvofiq tarkibda “Navoiy viloyatida ammiak va karbamid ishlab chiqarishlari kompleksini qurish” investitsiya loyihasini amalga oshirish masalalari boʻyicha ishchi komissiya tuzilsin.

5. Quyidagilar hisoblab chiqilgan qiymati 1340 mln AQSH dollari boʻlgan “Navoiy viloyatida ammiak va karbamid ishlab chiqarishlari kompleksini qurish” investitsiya loyihasini moliyalashtirish manbalari etib belgilansin:

loyiha umumiy qiymatining 20 foizi (hisoblab chiqilgan 268 mln AQSH dollari) — Oʻzbekiston tomonining qoʻshma korxona ustav jamgʻarmasidagi oʻz mablagʻlari va jalb etilgan mablagʻlar hisobiga shakllantiriladigan ulushi;

loyiha umumiy qiymatining 20 foizi (hisoblab chiqilgan 268 mln AQSH dollari) — xorijiy tomonning qoʻshma korxona ustav jamgʻarmasidagi oʻz mablagʻlari va “International Petroleum Investment Company” kompaniyasi (BAA) va uning shuʼba kompaniyalarining oʻz mablagʻlari hisobiga shakllantiriladigan ulushi;

loyiha umumiy qiymatining 60 foizi (hisoblab chiqilgan 804 mln AQSH dollari) — Oʻzbekiston Respublikasi Hukumati kafolatini bermasdan, loyihani moliyalashtirish shartlarida xorijiy investor tomonidan tashkil etiladigan xorijiy banklar va moliyaviy institutlar konsorsiumi krediti.

6. Belgilab qoʻyilsinki, koʻrsatib oʻtilgan loyihani amalga oshirish doirasida tashkil etiladigan qoʻshma korxonaning ustav jamgʻarmasi muassislar tomonidan 2010 — 2014-yillar mobaynida uning hisoblab chiqilgan miqdorini 536 mln AQSH dollarigacha bosqichma-bosqich koʻpaytirgan holda, belgilangan tartibda shakllantiriladi.

9. Ammiak va karbamid ishlab chiqarishlari kompleksi loyihasini tayyorlash va qurilish davrida loyiha doirasida import qilinadigan texnologik asbob-uskunalar, ehtiyot qismlar va ular uchun texnologik jihozlar, transport vositalari, texnik hujjatlar, tovarlar (ishlar va xizmatlar), shuningdek Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar boʻyicha vaqtinchalik keltirish rejimi boʻyicha olib kelinadigan asbob-uskunalar va texnika bojxona toʻlovlaridan (bojxona rasmiylashtiruvi uchun yigʻimlardan tashqari) ozod qilinsin.

10. Quyidagilar loyihaning loyihaoldi va loyiha hujjatlarini tayyorlash boʻyicha bosh loyihalash tashkilotlari etib belgilansin:

“MAN Ferrostaal AG” injiniring kompaniyasi (Germaniya) — asosiy texnologik ishlab chiqarish obyektlarini loyihalash boʻyicha;

“Oʻzkimyosanoatloyiha” OAJ — yordamchi ishlab chiqarish obyektlarini va infratuzilma obyektlarini loyihalash boʻyicha.

“Oʻzkimyosanoat” davlat-aksiyadorlik kompaniyasiga “MAN Ferrostaal AG” injiniring kompaniyasi va loyihani amalga oshirish doirasida jalb qilinadigan maslahatchilar bilan, tanlov (tender) savdolari oʻtkazmasdan, xarajatlarni xorijiy investor bilan teng ulushlarda moliyalashtirgan holda, kontraktlar tuzishga ruxsat berilsin.

11. “Oʻzkimyosanoat” davlat-aksiyadorlik kompaniyasi koʻrsatib oʻtilgan loyihani birgalikda ishlab chiqish toʻgʻrisidagi bitimni manfaatdor vazirliklar va idoralar bilan birgalikda, belgilangan tartibda tuzsin hamda bir oy muddatda “International Petroleum Investment Company” kompaniyasi (BAA) bilan imzolasin.

12. Oʻzbekiston Respublikasi Tashqi ishlar vazirligi “Oʻzkimyosanoat” davlat-aksiyadorlik kompaniyasi va qoʻshma korxona buyurtmanomalariga binoan loyihani amalga oshirish doirasida jalb qilinadigan xorijiy mutaxassislar va ularning oila aʼzolari uchun kirish vizalari konsullik yigʻimlari va boshqa yigʻimlar undirmasdan belgilangan tartibda rasmiylashtirilishini taʼminlasin.

13. Oʻzbekiston Respublikasi Ichki ishlar vazirligi “Oʻzkimyosanoat” davlat-aksiyadorlik kompaniyasi va qoʻshma korxona buyurtmanomalariga binoan loyihani amalga oshirish doirasida jalb qilinadigan xorijiy mutaxassislar va ularning oila aʼzolari uchun koʻp martalik vizalar davlat boji undirmasdan belgilangan tartibda rasmiylashtirilishini, berilishini va ularning muddati uzaytirilishini, shuningdek ularning vaqtinchalik yashash joyida vaqtinchalik roʻyxatdan oʻtkazilishini va vaqtinchalik roʻyxatdan oʻtkazish muddati uzaytirilishini taʼminlasin.

14. Oʻzbekiston Respublikasi Mehnat va aholini ijtimoiy muhofaza qilish vazirligi “Oʻzkimyosanoat” davlat-aksiyadorlik kompaniyasi va qoʻshma korxona buyurtmanomalariga binoan qoʻshma korxonaga Oʻzbekiston Respublikasiga loyihani amalga oshirish doirasida ixtisosliklar boʻyicha mutaxassislar jalb qilish uchun belgilangan tartibda ruxsatnomalar berilishini taʼminlasin.

15. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari E.R. Shaismatov va E.M. Gʻaniyev zimmasiga yuklansin.

Oʻzbekiston Respublikasi Prezidenti I.KARIMOV

Toshkent sh.,

2010-yil 16-mart,

46-son

Vazirlar Mahkamasining 2010-yil 16-martdagi 46-son qaroriga ILOVA

“Navoiy viloyatida ammiak i karbamid ishlab chiqarishlari kompleksini qurish” investitsiya loyihasini amalga oshirish masalalari boʻyicha ishchi komissiya

TARKIBI

Izoh. Ishchi komissiya aʼzolari boshqa ishga oʻtgan taqdirda uning tarkibiga ushbu lavozimga yangidan tayinlangan shaxslar kiritiladi.