XII Toshkent xalqaro kinofestivalini oʻtkazish toʻgʻrisida (70-son)

08.02.1997

Oʻzbekiston Respublikasi Vazirlar Mahkamasining

qarori

Oʻzbek xalqining milliy madaniyatini va maʼnaviy-axloqiy qadriyatlarini targʻib qilish, milliy ong, milliy tafakkurni shakllantirish, istiqlolga sadoqat va Vatanga muhabbat tuygʻularini kamol toptirish hamda bashariyatning maʼnaviyat xazinasini bezagan yuksak insoniy fazilatlarga chuqur ehtiromni barqarorlashtirishda kino sanʼatining rolini oshirish, kinematografchilarning tinchlik va hamjihatlik yoʻlidagi xalqaro aloqalarini rivojlantirish maqsadida Vazirlar Mahkamasi qaror qiladi:

1. “Oʻzbekkino” Davlat-aksionerlik kompaniyasi va Toshkent shahar hokimligining 1997-yil may oyining uchinchi oʻn kunligida XII Toshkent xalqaro kinofestivali(TXKF)ni oʻtkazish toʻgʻrisidagi taklifi qabul qilinsin.

2. XII Toshkent xalqaro kinofestivalining tashkiliy qoʻmitasi tarkibi 1-ilovaga muvofiq tasdiqlansin.

Tashkiliy qoʻmita “Oʻzbekkino” Davlat-aksionerlik kompaniyasi bilan birgalikda oʻn kun muddatda XII TXKFning:

tayyorgarlik va oʻtkazish tadbirlari rejasini;

bosh direksiyasi tuzilmasi va shtatlar jadvalini;

reglamenti, qatnashchilari roʻyxati va dasturini tuzsin hamda tasdiqlasin.

3. Belgilab qoʻyilsinki, kinofestivalni tayyorlash va oʻtkazish boʻyicha xarajatlarning valyutadagi qismi 2-ilovaga muvofiq Toshkent shahar hokimligining valyuta fondidan, soʻmdagi sarf-xarajatlar esa teng ulushlarda Vazirlar Mahkamasining zaxira jamgʻarmasidan va Toshkent shahar hokimligi mahalliy budjetidan 3-ilovaga muvofiq qoplanadi.

4. “Oʻzbekturizm” milliy kompaniyasi:

kinofestival qatnashchilari va mehmonlarini qabul qilish, joylashtirish uchun XII TXKF bosh direksiyasi buyurtmasiga binoan mehmonxonalardan joy ajratsin;

chet ellik mehmonlarning turarjoy haqini soʻmlarda Oʻzbekiston Respublikasi fuqarolari uchun belgilangan narxlarda qabul qilishga ruxsat bersin.

5. “Oʻzbekiston havo yoʻllari” milliy aviakompaniyasi “Oʻzbekiston temir yoʻllari” davlat-aksionerlik kompaniyasiga XII TXKF qatnashchilarini Oʻzbekiston fuqarolari uchun tasdiqlangan tariflar boʻyicha bosh direksiya buyurtmasiga binoan soʻmlarda qoplangan holda chiptalar bilan taʼminlash topshirilsin.

6. Samarqand viloyati hokimligi XII TXKF ishtirokchilarini tarixiy obidalar bilan tanishtirishni tashkil etishga amaliy yordam koʻrsatsin.

7. Oʻzbekiston Respublikasi Moliya vazirligi huzuridagi qimmatbaho metallar va qimmatbaho toshlar qoʻmitasi XII TXKFning rasmiy sovrinlarini tayyorlash uchun bosh direksiya buyurtmasiga binoan qimmatbaho metallar ajratsin.

8. “Mahalliy sanoat” davlat korporatsiyasi va “Oʻzbekyengilsanoat” uyushmasi tasdiqlangan eskizlar boʻyicha kinofestival sovrinlarini tayyorlasinlar.

9. Oʻzbekiston Respublikasi Fanlar akademiyasi, Oliy va oʻrta maxsus taʼlim vazirligi hamda “Oʻzbekturizm” milliy kompaniyasi XII TXKF bosh direksiyasi talabnomalariga binoan kinofestivalni tarjimonlar bilan taʼminlasinlar.

10. Oʻzbekiston Respublikasi Tashqi ishlar vazirligi, Davlat soliq qoʻmitasi va “Oʻzbekiston havo yoʻllari” milliy aviakompaniyasi chet ellik qatnashchilarni va XII Toshkent xalqaro kinofestivaliga aloqador yuklarni bojxona, viza va boshqa (shu jumladan, VIR zalida xizmat koʻrsatish) yigʻimlarning barcha turlaridan ozod qilsinlar.

11. Oʻzbekiston Respublikasi Ichki ishlar vazirligi kinofestival oʻtkaziladigan joylarda jamoat tartibini hamda uning qatnashchilari va mehmonlariga xizmat koʻrsatuvchi transport harakati xavfsizligini taʼminlasin.

12. “Oʻzteleradio” kompaniyasi, gazeta va jurnallar tahririyatlari XII Toshkent xalqaro kinofestivalini tayyorlash va oʻtkazishning borishini keng yoritsinlar.

13. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 8-fevral,

70-son

Vazirlar Mahkamasining 1997-yil 8-fevraldagi 70-son qaroriga 1-ILOVA

XII Toshkent xalqaro kinofestivali tashkiliy qoʻmitasining

TARKIBI

Vazirlar Mahkamasining 1997-yil 8-fevraldagi 70-son qaroriga 2-ILOVA

XII Toshkent xalqaro kinofestivali

SMETASI

Vazirlar Mahkamasining 1997-yil 8-fevraldagi 70-son qaroriga 3-ILOVA

XII Toshkent xalqaro kinofestivali

SMETASI