Qizilqum fosforit kombinati qurilishi yuzasidan qoʻshimcha chora-tadbirlar toʻgʻrisida (92-son)

20.02.1997

Oʻzbekiston Respublikasi Vazirlar Mahkamasining

qarori

[Koʻchirma]

Qizilqum fosforit kombinati qurilishini jadallashtirish va fosforli oʻgʻitlar ishlab chiqaruvchi korxonalarga mahalliy fosforit xomashyosi yetkazib berish muddatlarini yaqinlashtirish maqsadida Vazirlar Mahkamasi qaror qiladi:

1. Belgilansinki:

a) Qizilqum fosforit kombinatining boyitish fabrikasi Toshqoʻra konida joylashtiriladi;

b) Qizilqum fosforit kombinati qurilishi ikki bosqichda amalga oshiriladi:

konni ochish, 300 ming tonna ruda qazib olish, boyitilmagan fosfor unini tayyorlash va superfosfat ishlab chiqarish uchun Qoʻqon superfosfat zavodiga maxsus vagonlarda joʻnatish ishlarini oʻz ichiga oluvchi 1997-yilning birinchi yarim yilligida ishga tushiriladigan birinchi kompleks;

yiliga 5150 ming tonna ruda qazib olish va uni 2774 ming tonna fosforit konsentratigacha boyitish ishlarini oʻz ichiga oluvchi 2000-yilda ishga tushiriladigan ikkinchi kompleks;

v) ishga tushiriladigan birinchi kompleks qurilishini mablagʻ bilan taʼminlash markazlashtirilgan kredit resurslari hisobidan amalga oshiriladi.

2. Quyidagilar:

ishga tushiriladigan birinchi kompleksning buyurtmachisi etib Navoiy kon-metallurgiya kombinati, “Qizilqumnodirmetalloltin” konsernining Zarafshon qurilish boshqarmasi esa pudratchi etib;

“Oʻzkimyosanoat” uyushmasi ishga tushiriladigan ikkinchi kompleksning buyurtmachisi etib belgilansin.

4. Kuyidagilar:

a) qurilishi 1997-yilning birinchi choragida tamomlanadigan tashqi infrastruktura obyektlari qurilishi boʻyicha:

“Oʻzavtoyoʻl” davlat uyushmasi tashqi avtomobil yoʻllari qurilishi boʻyicha buyurtmachi hamda pudratchi etib;

“Oʻzbekiston temir yoʻllari” davlat-aksionerlik kompaniyasi tashqi temir yoʻl liniyasi qurilishi boʻyicha buyurtmachi, “Oʻzbektransqurilish” davlat uyushmasi esa pudratchi etib;

Aloqa vazirligi tashqi aloqa tarmoqlari va inshootlari qurilishi boʻyicha buyurtmachi hamda pudratchi etib;

“Oʻztransgaz” birlashmasi tashqi gaz taʼminoti tarmoqlari va inshootlari qurilishi boʻyicha buyurtmachi hamda “Oʻzbekneftgaz” korporatsiyasining “Oʻzneftgazqurilish” birlashmasi esa pudratchi etib belgilansin;

b) mablagʻ bilan taʼminlashning manbalari etib:

tashqi avtomobil yoʻllari qurilishi boʻyicha — Respublika yoʻl jamgʻarmasi mablagʻlari;

tashqi temir yoʻl liniyasi qurilishi boʻyicha — budjetdan ajratiladigan mablagʻlar;

tashqi aloqa tarmoqlari va inshootlari, tashqi gaz taʼminoti tarmoqlari va inshootlari qurilishi boʻyicha — tegishli ravishda Aloqa vazirligi, “Oʻzbekneftgaz” korporatsiyasining oʻz mablagʻlari belgilansin.

5. Qizilqum fosforit kombinatining toʻliq texnologik sxemasi boʻyicha Oʻzbekiston Respublikasi Energetika va elektrlashtirish vazirligi, ushbu ishlarni oʻz mablagʻlari hisobiga taʼminlagan holda, tashqi elektr taʼminoti tarmoqlari va inshootlari boʻyicha buyurtmachi hamda pudratchi etib belgilansin.

6. “Oʻzkimyosanoat” uyushmasi, “Oʻzsanoatxoʻjalikqurilish” korporatsiyasi va “Qizilqumnodirmetalloltin” konserni ishga tushiriladigan birinchi kompleks boʻyicha loyiha-smeta hujjatlari, asosiy fondlar, tugallanmagan qurilish va barcha aktivlar va passivlarni qabul qilish-topshirish ishlarini ikki hafta muddatda amalga oshirsinlar.

7. “Oʻzistiqbolstat” davlat qoʻmitasi koʻrsatib oʻtilgan qurilishni respublikaning investitsiya dasturiga kiritsin.

8. “Oʻzkimyosanoat” uyushmasi:

1997-yilning birinchi choragi davomida xorijiy firmalarni jalb etgan holda tender asosida fosfor rudasini boyitishning zamonaviy texnologiyasini tanlasin;

1997-yilning birinchi yarim yilligi mobaynida tanlangan texnologiya boʻyicha Toshqoʻra konida boyitish fabrikasi qurilishining texnik-iqtisodiy asoslanishini qayta ishlab chiqsin va uni ekspertizadan oʻtkazsin;

1997-yilning uchinchi choragida toʻliq texnologik sxema boʻyicha boyitish fabrikasi qurilishining ishlar loyihasini ishlab chiqsin va Oʻzbekiston Respublikasi Vazirlar Mahkamasiga taklif kiritsin.

9. Navoiy kon-metallurgiya kombinati yiliga 300 ming tonna hajmda fosforit rudasi qayta ishlanishi taʼminlanishini nazarda tutgan holda Toshkent viloyatining Chigʻiriq shaharchasidagi 2-ruda boshqarmasining boyitish fabrikasini rekonstruksiya qilish haqida oʻn kun muddatda taklif tayyorlasin va Vazirlar Mahkamasiga kiritsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I.H. Joʻrabekov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1997-yil 20-fevral,

92-son