Temir yoʻl transporti sohasida hamkorlikni yanada kengaytirish va birgalikdagi yuklar tashuvini rivojlantirish boʻyicha chora-tadbirlar toʻgʻrisida

11.09.2008

Oʻzbekiston Respublikasi Hukumati bilan Ozarbayjon Respublikasi Hukumati oʻrtasida

Bitim

Oʻzbekiston Respublikasi Hukumati bilan Ozarbayjon Respublikasi Hukumati, bundan keyin “Tomonlar” deb ataluvchilar,

Oʻzbekiston Respublikasi bilan Ozarbayjon Respublikasi oʻrtasida yoʻlovchi va yuklarni tashish, shuningdek ularning hududlari boʻylab tranzit tashuvining muhimligini eʼtiborga olib,

Tomonlar davlatlari milliy manfaatlaridan kelib chiqqan holda, oʻzaro manfaatli shartlar asosida temir yoʻl transporti sohasidagi hamkorlikni birgalikda rivojlantirish istagida,

1996-yil 27-mayda Boku shahrida imzolangan Oʻzbekiston Respublikasi va Ozarbayjon Respublikasi oʻrtasida doʻstlik va hamkorlik toʻgʻrisidagi Shartnomani va 1997-yil 18-iyunda Toshkent shahrida imzolangan Oʻzbekiston Respublikasi va Ozarbayjon Respublikasi oʻrtasida har tomonlama hamkorlikni va sheriklik munosabatlarini yanada rivojlantirish toʻgʻrisidagi Deklaratsiyani inobatga olib,

mavjud va yangi qurilayotgan temir yoʻllardan oʻzaro manfaatli ravishda foydalanish, Yevropa — Kavkaz — Osiyo transport koridori boʻylab qitʼalararo oʻzaro tashuvlarni kelajakda yanada rivojlantirishning muhimligini tasdiqlab, shuningdek, transport sohasida har tomonlama hamkorlikni, shu jumladan, birgalikda tashuvlarni amalga oshirish orqali yanada chuqurlashtirishga intilib,

ikki davlat uchun kuchga kirgan xalqaro koʻp tomonlama bitimlarga amal qilgan holda,

quyidagilar toʻgʻrisida kelishib oldilar:

1-modda

Har bir Tomon oʻz davlati hududida yoʻlovchi va yuklarni temir yoʻllarda xalqaro tashuvlarni amalga oshirish uchun oʻzarolik asosida eng qulay sharoitlarni taʼminlaydi.

Tomonlar Yevropa — Kavkaz — Osiyo xalqaro transport koridoriga yoʻlovchi va yuklarning qoʻshimcha hajmini jalb etish maqsadida, kelishilgan tarif siyosatini yurgazish va imtiyozlarni qoʻllash, intermodal va multimodal tashuvlarni kengroq qoʻllash, transport koridori boʻylab xalqaro logistika markazlarini barpo etishga yoʻnaltirilgan chora-tadbirlarni koʻradilar.

Tomonlar, ikki tomonlama va koʻp tomonlama asosda erishilgan ahdlashuvlarga muvofiq ekspeditorlik xizmatlarini amalga oshirishga koʻmaklashadilar.

2-modda

Ushbu Bitim maqsadlari uchun quyidagilar Tomonlarning vakolatli organlari hisoblanadi:

Oʻzbekiston Respublikasi uchun — Tashqi iqtisodiy aloqalar, investitsiyalar va savdo vazirligi, “Oʻzbekiston temir yoʻllari” Davlat aksiyadorlik temir yoʻl kompaniyasi;

Ozarbayjon Respublikasi uchun — Transport vazirligi.

3-modda

Har bir Tomon oʻz qonunchiligi va amaldagi xalqaro-huquqiy normalar doirasida yoʻlovchilar tashish, harakatlanuvchi sostavni oʻtkazish va yuklarni tashishni, shu jumladan uchinchi davlatlarga/dan tranzitini taʼminlaydilar.

Tomonlar oʻz hududlari boʻylab qoʻshimcha tranzit yuklar oqimini jalb qilish maqsadida, Tomonlar oʻz vakolatli organlariga tegishli Bitim imzolash orqali kelishilgan tarif siyosatini, tariflarga preferensiyalarni mavjud temir yoʻllari hamda yangi Baku — Tbilisi — Kars temir yoʻli boʻylab biriktirilgan tranzit yuk tashuvlarga qoʻllashni topshiradilar.

Yevropa — Kavkaz — Osiyo transport koridori raqobatbardoshligini yanada rivojlantirish maqsadida, Tomonlar YI va BMT xalqaro dasturlarining samaradorligini oshirish boʻyicha, transport kommunikatsiyalari va transport sektoriga investitsiyalarni jalb qilish uchun maqbul sharoit yaratish boʻyicha birgalikda harakat qiladilar.

4-modda

Tomonlar tuziladigan ikki tomonlama shartnomalarda belgilangan hajmlarda temir yoʻl transporti ehtiyojlari uchun texnika, uskunalar, ehtiyot qismlari, moddiy, yoqilgʻi-energetika manbalari va moylarni oʻzaro yetkazib berishni taʼminlovchi Oʻzbekiston Respublikasi bilan Ozarbayjon Respublikasining moddiy-texnika taʼminoti tashkilotlari hamda muassasalari va boshqa xoʻjalik yurituvchi subyektlarga koʻmaklashadilar.

5-modda

Tomonlar oʻzining milliy qonunlarga muvofiq oʻz davlatlari hududida yoʻlovchi va yuklarni temir yoʻl transportida tashishni amalga oshirish xavfsizligini taʼminlaydilar.

Tomonlardan birining transport vositalari, xodimlari, yoʻlovchilari yoki yuklari ishtirokida avariya yoki baxtsiz hodisalar yuz berganda boshqa Tomon, tegishli transport vositasini roʻyxatdan oʻtkazgan Tomonni bu toʻgʻrida xabardor qiladi va tergov natijalari toʻgʻrisida axborot beradi.

Zararni qoplash Tomonlar uchun kuchga kirgan, ushbu masalani tartibga soluvchi xalqaro hujjatlar asosida hal etiladi.

6-modda

Tomonlar xizmat koʻrsatuvchi xodimlari va ishlari poyezdlar yoʻnalishi boʻyicha oʻtadigan shaxslarning mehnat shart-sharoitlari xavfsizligini taʼminlaydilar, boshqa Tomon davlatining hududida turgan temir yoʻl xodimlariga ularning xizmat majburiyatlarini bajarishda, shartnoma asosida ovqatlanish va dam olishni tashkil etishda koʻmaklashadilar.

Tomonlarning har biri boshqa Tomonning xizmat koʻrsatuvchi xodimlariga davlatlari qonunchiligida koʻrsatilgan hajmda shoshilinch tibbiy yordam koʻrsatadilar.

7-modda

Tomonlar oʻzlarining milliy qonunlariga muvofiq oʻz davlatlarining hududlarida boshqa Tomonning temir yoʻl transport korxonalari va aksionerlik jamiyatlari, kompaniyalari vakolatxonalarining faoliyat olib borishlari uchun shart-sharoitlar yaratishga koʻmaklashadilar.

8-modda

Tomonlar temir yoʻl transporti mutaxassislarini tayyorlash sohasida hamkorlik qiladilar.

Tegishli oʻquv muassasasini tamomlagandan soʻng, berilgan ixtisoslik hujjatlari ikkala Tomon davlatining hududlarida ularning milliy qonunchiligiga muvofiq tegishli protseduralar oʻtkazilgach, bir xil yuridik kuchga ega boʻladi.

9-modda

Tomonlar ushbu Bitimning alohida qoidalarini amalga oshirish maqsadida temir yoʻl transportini boshqarish boʻyicha vakolatli organlarga zarur hollarda tegishli hujjatlar tuzish huquqini beradilar.

10-modda

Tomonlar temir yoʻl tashuvlari sohasida boshqa Tomonning manfaatlariga daxldor qabul qilingan yoki tayyorlanayotgan qarorlar toʻgʻrisida bir-birlarini xabardor qiladilar.

11-modda

Ikkala Tomon davlatlarining hududi boʻylab tashuvlar, shuningdek ularning davlatlari hududi orqali harbiy maqsaddagi yuklar yoki boshqa xavfli yuklarning tranzit oʻtishi Tomonlarning milliy qonunchiligi bilan tartibga solinadi.

12-modda

Ushbu Bitimni talqin qilish yoki qoʻllashda yuzaga keladigan barcha bahsli masalalarni Tomonlar muzokaralar va maslahatlashuvlar orqali hal qiladilar.

13-modda

Tomonlarning oʻzaro kelishuviga binoan ushbu Bitimga uning ajralmas qismi boʻlib hisoblanadigan, alohida protokollar bilan rasmiylashtiriladigan va 14-moddada koʻrsatilgan tartibda kuchga kiradigan oʻzgartirishlar va qoʻshimchalar kiritilishi mumkin.

14-modda

Ushbu Bitim Tomonlarning uning kuchga kirishi uchun zarur boʻlgan ichki davlat protseduralarini bajarganligi toʻgʻrisidagi soʻnggi yozma xabarnomani olgan sanadan boshlab kuchga kiradi.

Ushbu Bitim besh yil muddatga tuziladi. Tomonlardan hech biri uning amaldagi muddatining yakunidan kamida olti oy avval boshqa Tomonni Bitim amal qilishini toʻxtatish toʻgʻrisida yozma ravishda xabardor qilmasa, uning amal qilish muddati keyingi besh yillik muddatga oʻz-oʻzidan uzaytiriladi.

Ushbu Bitimning amal qilishi toʻxtatilgan holda, uning qoidalari u amal qilgan davrda tuzilgan barcha tegishli hujjatlarga nisbatan ularning toʻla bajarilishiga qadar qoʻllaniladi.

Boku shahrida 2008-yil 11-sentabrda ikki asl nusxada, har biri oʻzbek, ozarbayjon va rus tillarida tuzildi, bunda barcha matnlar bir xil yuridik kuchga ega. Ushbu Bitim qoidalarini talqin qilishda kelishmovchiliklar yuzaga kelgan holda rus tilidagi matndan foydalaniladi.

(imzolar)