Iqtisodiy hamkorlik, savdo va investitsiyalar toʻgʻrisida

11.06.2009

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi va Birlashgan Arab Amirliklari Iqtisodiyot vazirligi oʻrtasida

anglashuv Memorandumi

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi va Birlashgan Arab Amirliklari Iqtisodiyot vazirligi, bundan keyin “Tomonlar” deb ataluvchilar,

ular oʻrtasidagi mavjud doʻstlik va hamkorlik aloqalarini mustahkamlash istagidan kelib chiqib,

iqtisodiy aloqalar, savdo va investitsiyalar orqali hissa qoʻshishni, oʻz xalqi uchun farovonlikka erishishni maqsad qilib,

mahsulotlar, xizmatlar va oʻzaro investitsiyalar oqimini kuchaytirish zaruriyatiga qatʼiy ishonib,

iqtisodiy, ilmiy va sanoatdagi hamkorlik, texnologiyalar yetkazib berish, savdo va investitsiya uchun yetakchi tarmoqlarni qoʻllab-quvvatlash ahamiyatini anglab,

toʻgʻridan toʻgʻri xorijiy investitsiyalar Tomonlardan har birining manfaatlarini taʼminlashini anglab,

quyidagilarni kelishib oldilar:

1-modda

Ushbu Anglashuv Memorandumining maqsadi ikki davlat oʻrtasida savdo, sanoat, xizmat koʻrsatish va investitsiyalar sohasida iqtisodiy aloqalarini yanada faollashtirishdan iboratdir.

2-modda

Tomonlar har ikki davlatdagi iqtisodiy maʼlumotlarni almashishga rozilik bildiradilar. Shuningdek, har ikki Tomon savdo, investitsiya, eksport va importga oid qonunchilik boʻyicha ham maʼlumotlarni almashishga rozi ekanliklarini izhor qiladilar.

3-modda

Har ikki Tomon ham 2008-yil mart oyida ikki davlat oʻrtasida imzolangan amaldagi iqtisodiy Bitimni amalga oshirish uchun oʻzaro faoliyat yuritishga rozilik bildiradilar.

4-modda

Tomonlar ikki davlat xususiy sektorlari oʻrtasidagi iqtisodiy va savdo aloqalarini qoʻllab-quvvatlashga rozilik bildiradilar. Tomonlar ikki davlat Savdo-sanoat palatalari oʻrtasidagi aloqalarni ragʻbatlantirishga va ularga homiylik qilishga rozi ekanliklarini izhor qiladilar.

5-modda

Tomonlar ikkala davlatdagi davlat va xususiy kompaniyalar tomonidan oʻzaro investitsiyalarni ragʻbatlantirishga rozilik bildiradilar.

6-modda

Tomonlar ikki davlatdagi ulkan savdo, sanoat va investitsiya imkoniyatlarini tushunib yetadilar. Tomonlar xususiy sektorlar uchun ishbilarmonlar delegatsiyalari almashinuvini oʻzida mujassamlashtirgan oʻzaro tanishuv dasturlarini yaratish va savdo koʻrgazmalarini tashkillashtirish uchun ikki davlatdagi Savdo-sanoat palatalarini ragʻbatlantirishga rozilik bildiradilar.

7-modda

Mazkur Anglashuv Memorandumi yuridik majburiy hisoblanmaydi va xalqaro huquq doirasida hech qanday huquq va majburiyatlarni yuklamaydi.

8-modda

Ushbu Anglashuv Memorandumi Tomonlar tarafidan imzolagandan soʻng kuchga kiradi va Tomonlardan biri ikkinchi Tomonga olti oylik muddatda ushbu Memorandumni toʻxtatish boʻyicha yozma xabardor qilmagunga qadar, cheklanmagan muddatda amalda boʻladi.

9-modda

Tomonlar ushbu Memorandumga istalgan paytda, oʻzaro kelishuv asosida, yozma ravishda oʻzgartirish va qoʻshimchalar kiritishlari mumkin.

Toshkent shahrida 2009-yil 11-iyun kuni ikki nusxada har biri oʻzbek, arab va ingliz tillarida imzolandi, bunda barcha matnlar bir xil kuchga ega.

(imzolar)