Savdo va investitsiyalarni ragʻbatlantirish toʻgʻrisida

28.05.2009

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi va Braziliya Federativ Respublikasi Rivojlantirish, sanoat va tashqi savdo vazirligi oʻrtasida

ANGLAShUV MEMORANDUMI

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi va Braziliya Federativ Respublikasi Rivojlantirish, sanoat va tashqi savdo vazirligi, bundan keyin “Tomonlar” deb ataluvchilar,

Ikki davlat oʻrtasida savdo-iqtisodiy hamkorlikni kengaytirish va mustahkamlash istagida, va

Oʻzarolik va oʻzaro manfaatlilikka asoslangan yangi hamkorlik sohalarini rivojlantirish istagi mavjudligini eʼtiborga olgan holda,

quyidagilar toʻgʻrisida kelishib oldilar:

1-modda. Qoʻshma ishchi guruh

Tomonlar savdo va investitsiyalarni qoʻllab-quvvatlash maqsadida Qoʻshma ishchi guruh tuzishni kelishib oldilar (bundan keyin “Ishchi guruh” deb ataladi).

2-modda. Maqsad

Ishchi guruh ikki davlat oʻrtasidagi iqtisodiy munosabatlarni mustahkamlash, ishbilarmon doiralar faoliyatini rivojlantirish maqsadida ikkala davlatning davlat va xususiy sektorlari oʻrtasida maʼlumotlar va fikrlar almashinuviga koʻmaklashish, savdo va investitsiyalarni ragʻbatlantirish va ikki tomonlama savdo operatsiyalarini yengillashtirish yoʻlida faoliyat olib boradi.

3-modda. Yigʻilishlarni oʻtkazish muddati

Ishchi guruh har yili kamida bir marotaba yoki zaruriyat tugʻilganda navbatma-navbat Braziliyada va Oʻzbekistonda mazkur Memorandumni tatbiq etish va uning ijrosini taʼminlash maqsadida yigʻilishlarini oʻtkazadi.

4-modda. Ishchi guruh aʼzosi

1. Braziliya Federativ Respublikasi rivojlantirish, sanoat va tashqi savdo vaziri va Oʻzbekiston Respublikasi tashqi iqtisodiy aloqalar, investitsiyalar va savdo vaziri yoki ular tomonidan tayinlangan vakillar Ishchi guruhga hamraislik qiladilar.

2. Ishchi guruhning har bir raisi Ishchi guruh ishida qatnashish uchun davlat organi va xususiy sektor vakillarini taklif qilishi mumkin.

5-modda. Kun tartibi

1. Ishchi guruh yigʻilishi davomida ishbilarmon doiralar faoliyatini rivojlantirish hamda savdo va investitsiyalarga koʻmaklashish bilan bogʻliq mavzular Ishchi guruh tomonidan muhokama qilinadi va zarur ichki maslahatlashuvlar oʻtkazilgandan soʻng har bir yigʻilish masalalari boʻyicha qaror qabul qilinadi.

2. Tomonlar Ishchi guruhning muhokamasiga savdo, investitsiyalar va ikki tomonlama ishbilarmon doiralarga tegishli masalalarni maʼlumot uchun yoki ilgari surish uchun kiritishi mumkin.

3. Ishchi guruh faqat shu sohalar bilan cheklanmagan holda qishloq xoʻjaligi mahsulotlari, tekstil, kimyo mahsulotlari, avtomobil va avtomobil ehtiyot qismlari, telekommunikatsiya jihozlari, ofislarni avtomatlashtiruvchi asboblar, elektron mahsulotlar va boshqa sohalarda savdo va investitsiyaviy imkoniyatlarni rivojlantirishga eʼtibor qaratadi.

6-modda. Boshqa ikki va koʻp tomonlama yigʻilishlar bilan muvofiqlashtirish

Ishchi guruh oʻz faoliyatini Iqtisodiy va savdo sohasida hamkorlik boʻyicha Hukumatlararo komissiyasining yigʻilishlari kabi boshqa davlat yoki xususiy sektorning ikki va koʻp tomonlama yigʻilishlari natijalari bilan muvofiqlashtiradi.

7-modda. Yakunlovchi qoidalar

1. Mazkur Memorandum imzolangan sanadan boshlab kuchga kiradi va cheklanmagan muddatda amalda boʻladi.

2. Tomonlarning oʻzaro kelishuviga muvofiq mazkur Memorandumga istalgan vaqtda yozma ravishda va diplomatik kanallar orqali oʻzgartishlar kiritilishi mumkin.

3. Tomonlardan har biri istalgan vaqtda ikkinchi Tomonni mazkur Memorandumni bekor qilish istagi haqida yozma ravishda va diplomatik kanallar orqali xabardor qilishi mumkin. Tegishli xabarnoma olingan kundan 90 kundan keyin ushbu Memorandum oʻz kuchini yoʻqotadi.

4. Mazkur Memorandumni qoʻllash yoki talqin qilishda yuzaga keladigan nizolar Tomonlar oʻrtasida diplomatik kanallar orqali toʻgʻridan toʻgʻri muzokaralar yoʻli bilan hal etiladi.

Brazilia shahrida 2009-yil 28-may kuni ikki nusxada har biri oʻzbek, portugal va ingliz tillarida tuzildi, bunda barcha matnlar bir xil kuchga ega.

Ushbu Memorandumni talqin qilishda kelishmovchiliklar yuzaga kelgan holda ingliz tilidagi matn ustuvor hisoblanadi.

(imzolar)