Ilmiy unvonlar berish toʻgʻrisidagi nizomga oʻzgartirish va qoʻshimchalar kiritish haqida (262-2-son)

23.01.2010

OʻZBEKISTON RESPUBLIKASI VAZIRLAR MAHKAMASI HUZURIDAGI OLIY ATTESTATSIYA KOMISSIYASI RAYoSATINING

Qarori

[Oʻzbekiston Respublikasi Adliya vazirligi tomonidan 2010-yil 23-yanvarda roʻyxatdan oʻtkazildi, roʻyxat raqami 262-2]

Oʻzbekiston Respublikasi Prezidenti huzuridagi Vazirlar Mahkamasining 1992-yil 9-sentabrdagi 421-son “Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi faoliyatini tashkil etish masalalari toʻgʻrisida”gi qaroriga (Oʻzbekiston Respublikasi Hukumatining qarorlari toʻplami, 1992-y., 9-son, 28-modda) asosan Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi Rayosati qaror qiladi:

1. Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi Rayosatining 1996-yil 25-yanvardagi 34/2-son qarori bilan tasdiqlangan Ilmiy unvonlar berish toʻgʻrisidagi nizomga (roʻyxat raqami 262, 1996-yil 10-iyul) ilovaga muvofiq oʻzgartirish va qoʻshimchalar kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Rais v.b. K. SULTONOV

Toshkent sh.,

2009-yil 24-dekabr,

160/13-son

Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi Rayosatining 2009-yil 24-dekabrdagi 160/13-son qaroriga ILOVA

Ilmiy unvonlar berish toʻgʻrisidagi nizomga kiritilayotgan oʻzgartirish va qoʻshimchalar

1. 4-bandning ikkinchi xatboshi chiqarib tashlansin.

2. Quyidagi mazmundagi 41-band bilan toʻldirilsin:

“41. Professor, dotsent va katta ilmiy xodim ilmiy unvonlariga ega boʻlganlarga belgilangan namunadagi attestat beriladi. Ushbu attestat ilmiy unvonlar berish toʻgʻrisidagi qaror qabul qilingan paytdan boshlab, bir oy muddat davomida OAK Rayosati qarori asosida rasmiylashtiriladi”.

3. 5-bandda:

ikkinchi, toʻrtinchi, sakkizinchi va toʻqqizinchi xatboshilari “dotsent” degan soʻzdan keyin “yoki katta ilmiy xodim” degan soʻzlar bilan toʻldirilsin;

uchinchi xatboshi “ilmiy stajga hamda” degan soʻzlardan keyin “dotsent yoki” degan soʻzlar bilan toʻldirilsin;

yettinchi xatboshi quyidagi tahrirda bayon etilsin:

“oliy oʻquv yurtining yoki unga tenglashtirilgan oʻquv yurtining kafedra mudiri yoki professori lavozimiga tanlov boʻyicha saylanib, tegishli oliy maʼlumotga, dotsent yoki katta ilmiy xodim ilmiy unvoniga ega boʻlgan hamda yakka mualliflikda oliy oʻquv yurti uchun darslik yoki oʻquv-metodik qoʻllanma yaratgan, nashr etilgan oʻquv-metodik, ilmiy va ijodiy ishlari boʻlgan, maʼruzalar va maxsus turkum darslarni yuqori malakada olib borayotgan, kamida besh yil pedagoglik ish stajiga ega va shu lavozimlarda toʻliq stavkada ikki oʻquv yili davomida muvaffaqiyatli ishlagan Oʻzbekiston Respublikasi, Qoraqalpogʻiston Respublikasi xalq artistlari, hofizlari, xalq rassomlari, xalq meʼmorlari, xalq oʻqituvchilari, yozuvchilari, shoirlari, Oʻzbekiston Respublikasi fan arboblari, Oʻzbekiston Respublikasi sanʼat arboblari, xizmat koʻrsatgan artistlari, rassomlari, meʼmorlari, trenerlari va madaniyat xodimlariga berilishi mumkin”.

4. 6-band “yuqori malakali mutaxassis tayyorlagan” degan soʻzlardan keyin “dotsent yoki” degan soʻzlar bilan toʻldirilsin.