Ulgurji savdo korxonalari tomonidan yagona soliq toʻlovini boʻnak toʻlovlarini hisobga olgan holda toʻlash tartibi toʻgʻrisidagi nizomni tasdiqlash haqida (2065-son)

14.01.2010

OʻZBEKISTON RESPUBLIKASI MOLIYA VAZIRLIGI OʻZBEKISTON RESPUBLIKASI DAVLAT SOLIQ QOʻMITASI OʻZBEKISTON RESPUBLIKASI MARKAZIY BANKI BOShQARUVINING

Qarori

[Oʻzbekiston Respublikasi Adliya vazirligi tomonidan 2010-yil 14-yanvarda roʻyxatdan oʻtkazildi, roʻyxat raqami 2065]

Oʻzbekiston Respublikasi Prezidentining 2009-yil 22-dekabrdagi PQ-1245-son “Oʻzbekiston Respublikasining 2010-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2009-y., 52-son, 560-modda) muvofiq Oʻzbekiston Respublikasi Moliya vazirligi, Davlat soliq qoʻmitasi va Markaziy bank Boshqaruvi qaror qiladilar:

1. Ulgurji savdo korxonalari tomonidan yagona soliq toʻlovini boʻnak toʻlovlarini hisobga olgan holda toʻlash tartibi toʻgʻrisidagi nizom ilovaga muvofiq tasdiqlansin

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Moliya vaziri R. AZIMOV

Toshkent sh.,

2010-yil 7-yanvar,

2-son

Davlat soliq qoʻmitasi raisi B. PARPIYEV

Toshkent sh.,

2010-yil 7-yanvar,

2010-1-son

Markaziy bank raisi F. MULLAJONOV

Toshkent sh.,

2010-yil 7-yanvar,

39/4-son

Oʻzbekiston Respublikasi Moliya vazirligi, Davlat soliq qoʻmitasi va Markaziy bank Boshqaruvining 2010-yil 7-yanvardagi 2, 2010-1, 39/4-son qaroriga ILOVA

Ulgurji savdo korxonalari tomonidan yagona soliq toʻlovini boʻnak toʻlovlarini hisobga olgan holda toʻlash tartibi toʻgʻrisidagi

NIZOM

Ushbu Nizom Oʻzbekiston Respublikasi Prezidentining 2009-yil 22-dekabrdagi PQ-1245-son “Oʻzbekiston Respublikasining 2010-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2009-y., 52-son, 560-modda) muvofiq ulgurji savdo korxonalari tomonidan yagona soliq toʻlovini boʻnak toʻlovlarini hisobga olgan holda toʻlash tartibini belgilaydi.

I. Umumiy qoidalar

1. Oʻzbekiston Respublikasi Prezidentining 2009-yil 22-dekabrdagi PQ-1245-son “Oʻzbekiston Respublikasining 2010-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2009-y., 52-son, 560-modda) muvofiq 2010-yil 1-yanvardan ulgurji savdo korxonalari uchun oʻtkazilgan operatsiyalardan tushadigan tushum summasining 5 foizi miqdorida yagona soliq toʻlovi boʻyicha boʻnak toʻlovlarini toʻlash kiritildi, ushbu Nizomning 12-bandida belgilangan hollar bundan mustasno.

2. Yagona soliq toʻlovi boʻyicha boʻnak toʻlovlarini oʻtkazish tijorat banklari tomonidan ushbu Nizomda belgilangan tartibda amalga oshiriladi.

3. Ushbu Nizom quyidagilarga tatbiq etilmaydi:

ulgurji dorixona tashkilotlari, Ulgurji savdo korxonalari uyushmasi tizimiga kiruvchi ixtisoslashtirilgan ulgurji baza-kontoralari va ularning hududiy bazalariga;

ayrim normativ-huquqiy hujjatlarga muvofiq, bank hisobvaraqalariga kelib tushadigan pul mablagʻlarining taqsimlanishiga boshqacha tartib belgilangan korxonalarga.

II. Ulgurji savdo korxonalari — yagona soliq toʻlovi toʻlovchilarini hisobga olish

4. Davlat soliq xizmati organlari ushbu Nizom kuchga kirgan kundan boshlab besh kun ichida asosiy va ikkilamchi talab qilib olinguncha depozit hisobvaraqlari ochilgan tijorat banklariga ushbu Nizomning 1-ilovasida keltirilgan shaklda 2009-yil 31-dekabr holati boʻyicha faoliyat koʻrsatayotgan ulgurji savdo korxonalari — yagona soliq toʻlovi toʻlovchilarini koʻrsatgan holda xabarnomani yuboradi.

5. 2010-yilning 1-yanvaridan keyin ulgurji savdo faoliyatini amalga oshirish huquqi uchun litsenziya olgan faoliyat koʻrsatayotgan korxonalar — yagona soliq toʻlovchilar boʻyicha va yangi tashkil etilgan korxonalar boʻyicha davlat soliq xizmati organlari mazkur korxonalarga litsenziya berilganligi toʻgʻrisidagi axborot litsenziyalovchi organdan olingan kundan boshlab uch kun muddatda asosiy va ikkilamchi talab qilib olinguncha depozit hisobvaraqlari ochilgan tijorat banklariga ushbu Nizomning 1-ilovasida keltirilgan shaklda xabarnoma yuboradi.

Ulgurji savdo faoliyati bilan shugʻullanish uchun litsenziyaga ega korxonalar oʻzlarining asosiy va ikkilamchi talab qilib olinguncha depozit hisobvaraqlarini boshqa tijorat banklarida ochganliklari toʻgʻrisidagi axborot Bank depozitorlarining milliy axborot bazasidan kelib tushgan kundan boshlab, davlat soliq xizmati organlari bir ish kuni ichida mazkur tijorat banklariga ushbu Nizomning 1-ilovasida keltirilgan shaklda xabarnoma yuboradi.

6. Davlat soliq xizmati organlari ushbu Nizom talablari tatbiq etiladigan soliq toʻlovchilarni ham ushbu Nizomning 4 va 5-bandlarida nazarda tutilgan muddatlarda ushbu Nizomning 2-ilovasida keltirilgan shaklda xabardor qiladi.

Xabarnoma soliq toʻlovchiga yozma shaklda yoki uning shaxsiy kabineti orqali elektron shaklda yuboriladi.

7. Ulgurji savdo faoliyatini amalga oshirish huquqini beruvchi litsenziya amal qilishi toʻxtatilganda yoki bekor qilinganda, davlat soliq xizmati organlari litsenziyalovchi organdan litsenziya amal qilishi toʻxtatilganligi yoki bekor qilinganligi toʻgʻrisidagi axborotni olgan kundan boshlab bir kunlik muddatda mazkur korxonalar boʻyicha tijorat banklariga ushbu Nizomning 3-ilovasida keltirilgan shaklda xabarnoma yuboradi.

8. Agar davlat roʻyxatidan savdo korxonasi sifatida oʻtmagan, biroq ulgurji savdo faoliyatini amalga oshirish huquqini beruvchi litsenziyani olgan va yagona soliq toʻlovini toʻlash toʻgʻrisida xabarnoma bermagan yangi tashkil etilgan korxonalar ular davlat roʻyxatidan oʻtkazilgan sanadan keyingi birinchi hisobot davrida umumbelgilangan soliqlar boʻyicha soliqlar va majburiy toʻlovlarning hisob-kitoblarini taqdim etsalar, u holda davlat soliq xizmati organlari soliq hisoboti taqdim etilgan kundan boshlab uch kun muddatda tijorat banklariga ushbu Nizomning 3-ilovasida keltirilgan shaklda xabarnoma yuboradi.

9. Har yili, soliq davri uchun soliq hisobotini taqdim etish muddati tugagandan keyin uch kun muddatda, davlat soliq xizmati organlari tijorat banklariga mazkur Nizomning 4 va 5-bandlariga muvofiq avval taqdim qilingan roʻyxatga qoʻshimcha korxonalarning kiritilganligi yoki ulgurji savdo korxonalariga taalluqli boʻlmagan korxonalarni roʻyxatdan chiqarilganligi toʻgʻrisidagi aniqlashtirilgan axborotni yuboradi.

III. Yagona soliq toʻlovi boʻyicha boʻnak toʻlovlarini oʻtkazish tartibi

10. Tijorat banklari davlat soliq xizmati organining xabarnomasini olgan sanadan boshlab uch kun muddatda soliq toʻlovchilar uchun majburiy tarzda qonunchilikda belgilangan tartibda quyidagi bank hisobvaraqlarini ochadi yoki yopadi:

22624 — “Ayrim turdagi aksizli tovarlarni sotadigan yuridik shaxslarning maqsadli mablagʻlari”, Ayrim turdagi aksizli tovarlarni ishlab chiqarish va sotishning hisobi tizimi toʻgʻrisidagi vaqtinchalik nizomga (roʻyxat raqami 1390, 2004-yil 26-iyul) (Oʻzbekiston Respublikasi qonun hujjatlari toʻplami, 2004-y., 30-son, 347-modda) muvofiq ayrim turdagi aksizli tovarlarni sotuvchi ulgurji savdo korxonalari uchun;

22626 — “Korxona va tashkilotlarning maqsadli mablagʻlari”, boshqa turdagi tovarlarni sotuvchi ulgurji savdo korxonalari uchun.

11. Ushbu Nizomning 10-bandida nazarda tutilgan bank hisob raqamiga kelib tushgan mablagʻlar quyidagi tartibda taqsimlanadi:

5% — davlat soliq xizmati organlari tomonidan ushbu Nizomning 1-ilovasida keltirilgan shakldagi xabarnomada koʻrsatilgan 23407 — “Yagona soliq toʻlovi boʻyicha Respublika budjetining daromadlari” hisobvaragʻiga yagona soliq toʻlovi boʻyicha boʻnak toʻlovlari sifatida;

95% — asosiy va ikkilamchi talab qilib olinguncha depozit hisobvaraqlariga oʻtkaziladi, Ayrim turdagi aksizli tovarlarni ishlab chiqarish va sotishning hisobi tizimi toʻgʻrisidagi vaqtinchalik nizomga (roʻyxat raqami 1390, 2004-yil 26-iyul) muvofiq ayrim turdagi aksizli tovarlarni sotishdan kelib tushgan mablagʻlar bundan mustasno va ulgurji savdo korxonasining ixtiyoriga binoan foydalaniladi.

12. Barcha mablagʻlar ushbu Nizom tatbiq qilinadigan korxonalarga faqat ushbu Nizomning 10-bandida nazarda tutilgan bank hisobvaraqlari orqali kelib tushadi, quyidagi mablagʻlar bundan mustasno:

ilgari toʻlangan soliqlar va boshqa majburiy toʻlovlarning qaytishi koʻrinishida davlat budjetidan va davlat maqsadli jamgʻarmalaridan kelib tushgan mablagʻlar;

chakana savdodan inkassatsiya qilingan tushum;

Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasi qarori asosida tushayotgan maqsadli mablagʻlar;

ilgari joylashtirilgan depozitlarning qaytishi;

bir yuridik shaxsning asosiy talab qilib olinguncha depozit hisobvaragʻidan ikkilamchi talab qilib olinguncha depozit hisobvaragʻiga, ikkilamchi talab qilib olinguncha depozit hisobvaragʻidan asosiy talab qilib olinguncha depozit hisobvaragʻiga yoki bitta ikkilamchi talab qilib olinguncha depozit hisobvaragʻidan boshqa ikkilamchi talab qilib olinguncha depozit hisobvaragʻiga kelib tushadigan mablagʻlar;

ilgari konvertatsiya uchun yoʻnaltirilgan mablagʻlarning konvertatsiya qilinmagan qismining qaytishi;

ustav fondiga (ustav kapitaliga) ulush sifatida kelib tushgan mablagʻlar;

foizlar va dividendlar;

grantlar;

oʻziga xizmat koʻrsatuvchi bank bilan amalga oshirilgan valyuta operatsiyalari hamda valyuta birjasida ilgari konvertatsiya qilingan xorijiy valyutani sotishdan kelib tushgan mablagʻlar;

xato oʻtkazilgan mablagʻlarning qaytgan qismi.

Mazkur Nizomning 10-bandida nazarda tutilgan bank hisobvaraqalariga pul mablagʻlari operatsion kun tugaganidan keyin kelib tushgan taqdirda, pul mablagʻlarining taqsimlanishi keyingi operatsion kundan kechiktirmay amalga oshiriladi.

Bunda, Xoʻjalik yurituvchi subyektlarning bank hisobvaraqlaridan pul mablagʻlarini hisobdan chiqarish tartibi toʻgʻrisidagi yoʻriqnoma (roʻyxat raqami 2342, 2012-yil 15-mart) (Oʻzbekiston Respublikasi qonun hujjatlari toʻplami, 2012-y., 11-son, 127-modda) faqat ushbu Nizomning 10-bandida nazarda tutilgan hisobvaraqlardan asosiy va ikkilamchi talab qilib olinguncha depozit hisobvaraqlariga oʻtkaziladigan mablagʻlarga tatbiq etiladi.

IV. Boʻnak toʻlovlarni aks ettirish tartibi

13. Boʻnak toʻlovlarining toʻlangan summalari taqdim qilingan hisob-kitob boʻyicha yagona soliq toʻlovining toʻlanishi lozim boʻlgan summalari hisobiga oʻtkaziladi.

14. Yagona soliq toʻlovi boʻyicha boʻnak toʻlovlari soliq toʻlovchida budjetga toʻlanadigan boʻnak toʻlovlarni hisobga olish hisobvaraqlarida aks ettiriladi.

15. Agar ulgurji savdo faoliyatini amalga oshirish huquqini beruvchi litsenziya olgan yangi tashkil etilgan korxona yagona soliq toʻlovi toʻlovchisi boʻlmasa, u holda yagona soliq toʻlovi boʻyicha boʻnak toʻlovlari summasi Oʻzbekiston Respublikasining Soliq kodeksining (Oʻzbekiston Respublikasi qonun hujjatlari toʻplami, 2007-y., 52 (II)-son) 10-bobida nazarda tutilgan tartibda boshqa soliq turlari va majburiy toʻlovlar boʻyicha qarzlarni qoplash hisobiga oʻtadi yoki soliq toʻlovchiga qaytariladi.

V. Yakuniy qoidalar

16. Yagona soliq toʻlovi boʻyicha boʻnak toʻlovlarining toʻlangan summalari Davlat budjeti, Respublika yoʻl jamgʻarmasi, budjetdan tashqari Pensiya jamgʻarmasi va budjetdan tashqari Taʼlim va tibbiyot muassasalarining moddiy-texnika bazasini rivojlantirish jamgʻarmasi oʻrtasida oʻrnatilgan normativlardan kelib chiqib qonun hujjatlarida belgilangan tartibda taqsimlanadi.

17. Yagona soliq toʻlovi boʻyicha ortiqcha toʻlangan summa soliq toʻlovchining arizasiga koʻra Oʻzbekiston Respublikasi Soliq kodeksining 10-bobida nazarda tutilgan tartibda qaytariladi.

Ariza soliq boʻyicha hisobga olish joyidagi davlat soliq xizmati organlariga yozma shaklda yoki soliq toʻlovchining shaxsiy kabineti orqali elektron shaklda beriladi.

171. Qonun hujjatlariga muvofiq javobgarlikka tortiladi:

davlat soliq xizmati organlari — tijorat banklariga xabarnomani toʻgʻri va oʻz vaqtida yuborilishi uchun;

tijorat banklari — yagona soliq toʻlovi boʻyicha boʻnak toʻlovlarining toʻgʻri va oʻz vaqtida oʻtkazilishi uchun.

18. Yagona soliq toʻlovi boʻyicha boʻnak toʻlovlari summalarining toʻliq tushishi ustidan nazorat davlat soliq xizmati organlari tomonidan amalga oshiriladi.

Ulgurji savdo korxonalari tomonidan yagona soliq toʻlovini boʻnak toʻlovlarini hisobga olgan holda toʻlash tartibi toʻgʻrisidagi nizomga 1-ILOVA

Ulgurji savdo korxonalari tomonidan yagona soliq toʻlovini boʻnak toʻlovlarini hisobga olgan holda toʻlash tartibi toʻgʻrisidagi nizomga 2-ILOVA

Ulgurji savdo korxonalari tomonidan yagona soliq toʻlovini boʻnak toʻlovlarini hisobga olgan holda toʻlash tartibi toʻgʻrisidagi nizomga 3-ILOVA

(Oʻzbekiston Respublikasi qonun hujjatlari toʻplami, 2010-y., 1-2-son, 15-modda; 2011-y., 30-son, 321-modda; 2013-y., 40-son, 539-modda; 2014-y., 16-son, 185-modda; Qonun hujjatlari maʼlumotlari milliy bazasi, 07.09.2018-y., 09/18/2065-4/1851-son)