1999-2000-yillarda qarshi magistral kanalidan kafolatli suv oʻtkazishga doir kechiktirib boʻlmaydigan chora-tadbirlar toʻgʻrisida (337-son)
09.07.1999
Oʻzbekiston Respublikasi Vazirlar Mahkamasining
qarori
Qarshi magistral kanalidan kafolatli suv oʻtkazilishini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Qishloq va suv xoʻjaligi vazirligi tomonidan ishlab chiqilgan 1999-2000-yillarda Qarshi magistral kanalidan kafolatli suv oʻtkazishga doir chora-tadbirlar 1-ilovaga muvofiq maʼqullansin.
2. Oʻzbekiston Respublikasi Qishloq va suv xoʻjaligi vazirligi:
Qarshi magistral kanalidan foydalanishning ishonchliligini yaxshilash uchun “Oʻzsuvqurilish” davlat konsernining “Oʻrtaosiyomaxsusqurilish” tresti Doʻstlik gidromexanizatsiya boshqarmasini bir oy muddatda oʻz balansiga qabul qilsin;
“Oʻzbekneftgaz” milliy xolding kompaniyasi bilan birgalikda 1999-2000-yillarda “Oʻzbekkimyomash” ochiq aksiyadorlik jamiyatida nasos stansiyalari va yer snaryadlarini tiklash uchun ehtiyot qismlar, uzel va agregatlar tayyorlanishini taʼminlasin.
3. Oʻzbekiston Respublikasi Moliya vazirligi Qarshi magistral kanalidan kafolatli suv oʻtkazishga doir chora-tadbirlarni amalga oshirish uchun:
1999-yilning ikkinchi yarim yilligida — joriy yil uchun mablagʻ bilan taʼminlashning davlat budjetida tasdiqlangan limitlari boʻyicha;
2000-yilda — Qishloq va suv xoʻjaligi vazirligining Moliya vazirligi bilan kelishilgan hisob-kitoblari boʻyicha oʻz vaqtida mablagʻ bilan taʼminlasin va mablagʻ ajratsin.
Oʻzbekiston Respublikasi Davlat soliq qoʻmitasi Qishloq va suv xoʻjaligi vazirligi hamda Tashqi ishlar vazirligi bilan birgalikda Doʻstlik gidromexanizatsiya boshqarmasi faoliyatiga soliq solish masalasini Turkmanistonning tegishli idoralari bilan bir oy muddatda hal etsin.
4. Oʻzbekiston Respublikasi Energetika va elektrlashtirish vazirligi nasos stansiyalari kaskadining uzluksiz ishlashini taʼminlovchi Qarshi magistral kanali obyektlarini energiya bilan kafolatli taʼminlash yuzasidan zarur chora-tadbirlarni amalga oshirsin.
Energetika va elektrlashtirish vaziri V.Y. Otayev nasos stansiyalarining energiya bilan ishonchli taʼminlanishi va ularning uzluksiz ishlashi uchun shaxsan javob berishi toʻgʻrisida ogohlantirilsin.
5. Qarshi magistral kanalidan kafolatli suv oʻtkazilishini taʼminlash va suv resurslaridan oqilona foydalanish tadbirlarining bajarilishini nazorat qilish boʻyicha Respublika komissiyasi 2-ilovaga muvofiq tarkibda tasdiqlansin.
6. Oʻzbekiston Respublikasi Tashqi ishlar vazirligi manfaatdor vazirliklar va idoralar bilan birgalikda Turkmaniston hukumati bilan xizmat koʻrsatuvchi xodimlarni bir joydan ikkinchi joyga koʻchirish va Qarshi magistral kanalining Turkmaniston hududidagi obyektlarini qoʻriqlash masalalarini belgilangan tartibda kelishib olsin.
7. Oʻzbekiston Respublikasi Qishloq va suv xoʻjaligi vazirligi, Makroiqtisodiyot va statistika vazirligi, Moliya vazirligining Qarshi magistral kanalini rekonstruksiya qilish loyihasini 2000-yildan boshlab Oʻzbekiston Respublikasi Investitsiya dasturiga kiritish toʻgʻrisidagi, shuningdek, xalqaro moliya institutlari kredit mablagʻlarini koʻrsatib oʻtilgan loyihani mablagʻ bilan taʼminlashga jalb etish boʻyicha takliflariga rozilik berilsin.
Oʻzbekiston Respublikasi Qishloq va suv xoʻjaligi vazirligi Qarshi magistral kanalini rekonstruksiya qilishga zarur loyiha hujjatlarini ishlab chiqishni mablagʻ bilan taʼminlash manbalari boʻyicha takliflarni, qishloq xoʻjaligi va irrigatsiya sohasidagi loyihalarni amalga oshirish uchun Xalqaro tiklanish va taraqqiyot banki qarzi hisobiga mablagʻlarni va boshqa grant mablagʻlarini jalb qilish ham shu jumlaga kiradi, ishlab chiqsin va bir oy muddatda kiritsin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.M.Olimjonov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1999-yil 9-iyul,
337-son
Vazirlar Mahkamasining 1999-yil 9-iyuldagi 337-son qaroriga 1-ILOVA
1999-2000-yillarda Qarshi magistral kanalidan kafolatli suv oʻtkazish boʻyicha
TADBIRLAR
(2-ilova Oʻzbekiston Respublikasi Vazirlar Mahkamasining 2000-yil 9-sentabrdagi 359-sonli qaroriga muvofiq oʻz kuchini yoʻqotgan)