“Tijorat banklari tomonidan kichik biznes subyektlariga budjetdan tashqari jamgʻarmalar va “Mikrokreditbank” kredit liniyalari hisobidan mikrokreditlar berish tartibi toʻgʻrisidagi nizom”ga qoʻshimcha va oʻzgartirishlar kiritish haqida (1548-4-son)

30.12.2009

Oʻzbekiston Respublikasi Markaziy banki boshqaruvi Oʻzbekiston Respublikasi Moliya vazirligining

Qarori

[Oʻzbekiston Respublikasi Adliya vazirligi tomonidan 2009-yil 30-dekabrda roʻyxatdan oʻtkazildi, roʻyxat raqami 1548-4]

Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi (Oʻzbekiston Respublikasi Oliy Majlisi Axborotnomasi, 1995-y., 12-son, 247-modda) hamda “Banklar va bank faoliyati toʻgʻrisida”gi (Oʻzbekiston Respublikasi Oliy Majlisining Axborotnomasi, 1996-yil, 5-6-son, 54-modda) qonunlariga muvofiq Oʻzbekiston Respublikasi Markaziy banki Boshqaruvi va Moliya vazirligi qaror qiladi:

1. Oʻzbekiston Respublikasi Markaziy banki Boshqaruvi va Moliya vazirligining 2005-yil 31-dekabrdagi 273-V, 111-sonli qarori (roʻyxat raqami 1548, 2006-yil 21-fevral) (Oʻzbekiston Respublikasi qonun hujjatlari toʻplami, 2006-yil, 8-son, 60-modda) bilan tasdiqlangan “Tijorat banklari tomonidan kichik biznes subyektlariga budjetdan tashqari jamgʻarmalar va “Mikrokreditbank” kredit liniyalari hisobidan mikrokreditlar berish tartibi toʻgʻrisida”gi nizomga ilovaga muvofiq qoʻshimcha va oʻzgartirishlar kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Markaziy bank raisi F. MULLAJONOV

Toshkent sh.,

2009-yil 21-noyabr,

33/2-son

Moliya vaziri R. AZIMOV

Toshkent sh.,

2009-yil 21-noyabr,

112-son

Oʻzbekiston Respublikasi Markaziy banki Boshqaruvi va Moliya vazirligining 2009-yil 21-noyabrdagi 33/2 va 112-sonli qaroriga ILOVA

“Tijorat banklari tomonidan kichik biznes subyektlariga budjetdan tashqari jamgʻarmalar va “Mikrokreditbank” kredit liniyalari hisobidan mikrokreditlar berish tartibi toʻgʻrisida”gi nizomga kiritilayotgan qoʻshimcha va oʻzgartirishlar

1. 1-bandning sakkizinchi xatboshisi quyidagi tahrirda bayon etilsin:

“budjetdan tashqari jamgʻarmalar — Ish bilan taʼminlashga koʻmaklashish davlat jamgʻarmasi, Dehqon va fermer xoʻjaliklarini qoʻllab-quvvatlash jamgʻarmasi, Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi huzuridagi Tadbirkorlikni qoʻllab-quvvatlash va korxonalarni tarkibiy oʻzgartirish jamgʻarmasi hamda sobiq “Biznes Fond”ga qarashli kredit liniyalarini AT “Mikrokreditbank”ga qaytarilishi natijasida shakllanadigan AT “Mikrokreditbank” (quyida — Mikrokreditbank) imtiyozli kredit resurslari”.

2. 39-band quyidagi tahrirdagi beshinchi xatboshi bilan toʻldirilsin:

“Kichik va xususiy tadbirkorlikni rivojlantirishni ragʻbatlantirish Respublika muvofiqlashtiruvchi kengashi qarori bilan belgilangan tumanlardagi loyihalarni moliyalashtirish uchun Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi huzuridagi Tadbirkorlikni qoʻllab-quvvatlash va korxonalarni tarkibiy oʻzgartirish jamgʻarmasi kredit liniyalari hisobidan beriladigan mikrokreditlar Markaziy bankning amaldagi qayta moliyalash stavkasining 50 foizi miqdorida ajratiladi”.

3. 45-band quyidagi tahrirdagi xatboshi bilan toʻldirilsin:

“Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi huzuridagi Tadbirkorlikni qoʻllab-quvvatlash va korxonalarni tarkibiy oʻzgartirish jamgʻarmasi bilan bosh bank oʻrtasida tuziladigan bosh kelishuv Kichik va xususiy tadbirkorlikni rivojlantirishni ragʻbatlantirish Respublika muvofiqlashtiruvchi kengashi bilan kelishilgan holda amalga oshiriladi. Bunda ushbu jamgʻarma tomonidan ochilgan kredit liniyalari hisobidan mikrokreditlar Kichik va xususiy tadbirkorlikni rivojlantirishni ragʻbatlantirish boʻyicha Respublika muvofiqlashtiruvchi Kengashi qarori bilan belgilangan tumanlardagi loyihalarni moliyalashtirish uchun yoʻnaltiriladi”.

4. Mazkur qoʻshimcha va oʻzgartirishlar Oʻzbekiston Respublikasining Mehnat va aholini ijtimoiy muhofaza qilish vazirligi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi, Savdo-sanoat palatasi va Oʻzbekiston fermer xoʻjaliklari uyushmasi bilan kelishilgan.

Mehnat va aholini ijtimoiy muhofaza qilish vaziri v.b. A. XAITOV

2009-yil 21-noyabr

Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi raisi v.b. B. ULAShOV

2009-yil 21-noyabr,

Savdo-sanoat palatasi raisi A. ShAYXOV

2009-yil 21-noyabr

Oʻzbekiston fermer xoʻjaliklari uyushmasi raisi v.b. T. BOZOROV

2009-yil 21-noyabr