Sugʻurtalovchining muvaqqat maʼmuriyati toʻgʻrisidagi nizomni tasdiqlash haqida (2058-son)

22.12.2009

Oʻzbekiston Respublikasi Moliya vazirining

buyrugʻi

[Oʻzbekiston Respublikasi Adliya vazirligi tomonidan 2009-yil 22-dekabrda roʻyxatdan oʻtkazildi, roʻyxat raqami 2058]

Oʻzbekiston Respublikasining “Sugʻurta faoliyati toʻgʻrisida”gi Qonuniga muvofiq buyuraman:

1. Sugʻurtalovchining muvaqqat maʼmuriyati toʻgʻrisidagi Nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Vazir R. AZIMOV

Toshkent sh.,

2009-yil 20-noyabr,

108-son

Moliya vazirining 2009-yil 20-noyabrdagi 108-sonli buyrugʻiga ILOVA

Sugʻurtalovchining muvaqqat maʼmuriyati toʻgʻrisidagi

NIZOM

Mazkur Nizom Oʻzbekiston Respublikasining sugʻurtalovchi muvaqqat maʼmuriyatining ishlash tartibini belgilaydi.

I. Umumiy qoidalar

1. Mazkur Nizom sugʻurtalovchining arizasiga binoan uning litsenziyasi bekor qilingan hollarga, shuningdek uning muassislarining (ishtirokchilarining) yoki taʼsis hujjatlarida shunday vakolat berilgan sugʻurtalovchining boshqaruv organi qaroriga binoan qayta tashkil etilishi yoxud tugatilishiga taalluqli emas.

2. Sugʻurtalovchi muvaqqat maʼmuriyatining funksiyasi boʻlib sugʻurtalovchining ilgari amal qilgan boshqaruv organlarining vakolatlarini amalga oshirish hisoblanadi.

3. Sugʻurtalovchining muvaqqat maʼmuriyati sugʻurtalovchi litsenziyasining amal qilishi tugatilgan kundan eʼtiboran besh kun ichida Oʻzbekiston Respublikasi Istiqbolli loyihalar milliy agentligining (bundan buyon matnda vakolatli davlat organi deb yuritiladi) buyrugʻi bilan tayinlanadi.

4. Sugʻurtalovchining ilgari amal qilgan boshqaruv organlarining vakolatlari sugʻurtalovchining muvaqqat maʼmuriyati tayinlangan sanadan boshlab toʻxtatib turiladi va sugʻurtalovchining muvaqqat maʼmuriyatiga oʻtadi. Muvaqqat maʼmuriyat sud qaror chiqargunga qadar boʻlgan davrda oʻz faoliyatini amalga oshiradi.

5. Sugʻurtalovchining muvaqqat maʼmuriyati oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga hamda boshqa qonunchilik hujjatlariga, shuningdek mazkur Nizomga amal qiladi.

6. Sugʻurtalovchining muvaqqat maʼmuriyati aʼzolarining moddiy-texnika taʼminoti va mehnatiga haq toʻlash sugʻurtalovchining mablagʻlari hisobidan amalga oshiriladi. Sugʻurtalovchining muvaqqat maʼmuriyati har bir aʼzosining har oylik pul mukofoti miqdori sugʻurtalovchining rahbari uchun mehnatga haq toʻlash tizimida nazarda tutilgan oʻrtacha oylik ish haqi miqdoridan kam boʻlmasligi lozim.

II. Sugʻurtalovchi muvaqqat maʼmuriyatining tarkibi

7. Sugʻurtalovchining muvaqqat maʼmuriyati rahbar va boshqa aʼzolardan iborat.

8. Sugʻurtalovchining muvaqqat maʼmuriyati aʼzolarining soni uch kishidan oshmasligi lozim. Sugʻurtalovchi muvaqqat maʼmuriyatining shaxsiy tarkibi vakolatli davlat organi tomonidan belgilanadi.

9. Sugʻurtalovchi muvaqqat maʼmuriyatining tarkibiga Oʻzbekiston Respublikasi oliy taʼlim muassasalarida olingan oliy maʼlumotga yoki xorijiy davlatlarning taʼlim muassasalarida olingan hamda qonunchilik hujjatlariga muvofiq Oʻzbekiston Respublikasidagi oliy maʼlumotga ekvivalent deb tan olingan oliy maʼlumotga ega boʻlgan va sugʻurta sohasida ikki yildan kam boʻlmagan ish stajiga ega boʻlgan (sugʻurta agenti sifatidagi, shuningdek, yordamchi, texnik va xizmat koʻrsatuvchi xodimlar lavozimlaridagi ish staji hisobga olinmaydi) shaxslar kiritilishi mumkin.

10. Sugʻurtalovchi muvaqqat maʼmuriyatining tarkibiga sugʻurtalovchining mulkdorlari (muassislari, aksiyadorlari) va (yoki) xodimlari, boshqa shaxslarning ishlarini va (yoki) mulklarini boshqarishga cheklovlari mavjud boʻlgan shaxslar kiritilishiga yoʻl qoʻyilmaydi.

III. Sugʻurtalovchi muvaqqat maʼmuriyatining faoliyatini tashkil etish

11. Sugʻurtalovchining ilgari amal qilgan boshqaruv organlari sugʻurtalovchining muvaqqat maʼmuriyati tayinlangan sanadan boshlab ikki ish kunidan kechiktirmasdan sugʻurtalovchining faoliyati bilan bogʻliq boʻlgan barcha hujjatlarni hujjatlar roʻyxati boʻyicha, muhr va shtamplarni, moddiy va boshqa boyliklarni topshirishi, sugʻurtalovchining muvaqqat maʼmuriyati esa qabul qilib olishi lozim.

12. Sugʻurtalovchining muvaqqat maʼmuriyati oʻzining tayinlanganidan keyin sugʻurtalovchining mulkidan sugʻurtalovchining mulkdorlari (muassislari, aksiyadorlari) va xodimlari tomonidan ruxsatsiz foydalanishni oldini olish boʻyicha choralarni koʻrishi lozim.

13. Sugʻurtalovchi muvaqqat maʼmuriyatining qarorlari uning barcha aʼzolarining oddiy koʻpchilik ovozi bilan qabul qilinadi. Sugʻurtalovchining muvaqqat maʼmuriyati aʼzolarining ovozlari teng boʻlganda, sugʻurtalovchining muvaqqat maʼmuriyati rahbarining ovozi hal qiluvchi hisoblanadi.

14. Sugʻurtalovchining muvaqqat maʼmuriyati xarajat operatsiyalarini amalga oshirishga haqli emas, sugʻurtalovchining boshqaruv xarajatlari (maʼmuriy xarajatlari), sugʻurtalovchiga tushayotgan pullarni hisobga yozish va ilgari tuzilgan sugʻurta shartnomalari boʻyicha sugʻurta hodisalari yuz berganda sugʻurta tovonini (sugʻurta toʻlovini) toʻlash bilan bogʻliq hollar bundan mustasnodir.

15. Sugʻurtalovchining muvaqqat maʼmuriyati uning zimmasiga yuklatilgan funksiyalarni amalga oshirishda olingan maʼlumotning maxfiyligini taʼminlashi lozim.

16. Sugʻurtalovchining muvaqqat maʼmuriyati oʻz ishi yakunlari boʻyicha hisobot tuzadi.

IV. Sugʻurtalovchi muvaqqat maʼmuriyatining hisoboti

17. Sugʻurtalovchi muvaqqat maʼmuriyatining hisoboti uch nusxada tuziladi (vakolatli davlat organi, sugʻurtalovchini tugatish toʻgʻrisidagi ariza yoʻllangan sud va sugʻurtalovchi uchun bittadan), sugʻurtalovchi muvaqqat maʼmuriyatining barcha aʼzolari tomonidan imzolanadi, sugʻurtalovchining muvaqqat maʼmuriyati rahbarining imzosi bilan tasdiqlanadi. Sugʻurtalovchining muvaqqat maʼmuriyati hisobotining varaqlari raqamlangan va tikilgan boʻlishi lozim.

18. Sugʻurtalovchining muvaqqat maʼmuriyati sud qaror chiqarganidan keyin besh kun davomida sugʻurtalovchi muvaqqat maʼmuriyatining hisobotini tuzishi hamda vakolatli davlat organiga va sugʻurtalovchini tugatish toʻgʻrisidagi ariza yoʻllangan sudga topshirishi lozim.

19. Sugʻurtalovchi muvaqqat maʼmuriyatining hisobotida sugʻurtalovchining muvaqqat maʼmuriyati tomonidan bajarilgan ishlar toʻgʻrisidagi batafsil maʼlumotlar aks ettiriladi.

20. Sugʻurtalovchi muvaqqat maʼmuriyatining hisoboti quyidagilarni oʻz ichiga olishi lozim:

hisobotning nomi, tuzilgan sanasi va joyi;

sugʻurtalovchining rekvizitlari (shu jumladan, amal qilishi tugatilgan sugʻurta faoliyatini amalga oshirish uchun litsenziyaning seriyasi, raqami va berilgan sanasi) va sugʻurtalovchi faoliyatining umumiy tavsifi;

sugʻurtalovchining muvaqqat maʼmuriyati tayinlanishining asosi (sugʻurtalovchi litsenziyasining amal qilishini tugatish toʻgʻrisidagi qarorning, vakolatli davlat organining sugʻurtalovchining muvaqqat maʼmuriyatini tayinlash toʻgʻrisidagi buyrugʻining raqami va sanasi) va uning shaxsiy tarkibi;

sugʻurtalovchining mulkidan sugʻurtalovchining mulkdorlari (muassislari, aksiyadorlari) va xodimlari tomonidan ruxsatsiz foydalanishni oldini olish boʻyicha sugʻurtalovchining muvaqqat maʼmuriyati tomonidan koʻrilgan choralar toʻgʻrisidagi axborot;

sugʻurtalovchining boshqaruv xarajatlari (maʼmuriy xarajatlari), sugʻurtalovchiga tushayotgan pullarni hisobga yozish va ilgari tuzilgan sugʻurta shartnomalari boʻyicha sugʻurta hodisalari yuz berganda sugʻurta tovonini (sugʻurta toʻlovini) toʻlash bilan bogʻliq sugʻurtalovchining muvaqqat maʼmuriyati tomonidan amalga oshirilgan xarajat operatsiyalari toʻgʻrisidagi axborot;

sugʻurtalovchining muvaqqat maʼmuriyati ixtiyoriga koʻra boshqa axborot.

21. Sugʻurtalovchi muvaqqat maʼmuriyatining hisobotiga quyidagi hujjatlarning nusxalari ilova qilinadi:

sugʻurtalovchining muvaqqat maʼmuriyatiga sugʻurtalovchining ilgari amal qilgan boshqaruv organlari tomonidan topshirilgan hujjatlarning roʻyxati;

sugʻurtalovchi muvaqqat maʼmuriyatining qarorlari;

sugʻurtalovchining muvaqqat maʼmuriyati ixtiyoriga koʻra boshqa hujjatlar.

V. Yakuniy qoidalar

22. Sugʻurtalovchi muvaqqat maʼmuriyatining harakatlari ustidan sudga shikoyat qilinishi mumkin.

23. Mazkur Nizom talablarini buzganlikda aybdor boʻlgan shaxslar qonunchilik hujjatlariga muvofiq javobgarlikka tortiladilar.