Respublika yengil sanoatini boshqarishni takomillashtirish toʻgʻrisida (PF-3102-son)

01.07.2002

Oʻzbekiston Respublikasi Prezidentining

Farmoni

Respublika toʻqimachilik, trikotaj, tikuvchilik va chinni sanoati tarmoqlarini yanada rivojlantirish hamda ularni boshqarish tizimini takomillashtirish uchun qulay shart-sharoitlarni yaratish, bozor munosabatlarini chuqurlashtirish, paxta tolasini chuqur qayta ishlash hisobiga yengil sanoat mollari ishlab chiqarishni koʻpaytirish va eksport salohiyatini oshirish maqsadida:

1. Oʻzbekiston yengil sanoat mollari ishlab chiqarish davlat uyushmasi (Oʻzbekyengilsanoat)ni Engil sanoat mollari ishlab chiqarish davlat-aksiyadorlik kompaniyasi "Oʻzbekyengilsanoat" (“Oʼzbekyengilsanoat”) etib qayta tashkil qilish toʻgʻrisida Vazirlar Mahkamasi Isteʼmol tovarlari ishlab chiqarish va savdo kompleksining, Davlat mulki qoʻmitasi va "Oʻzbekyengilsanoat" uyushmasining takliflari qabul qilinsin.

2. Quyidagilar Engil sanoat mollari ishlab chiqarish davlat-aksiyadorlik kompaniyasi "Oʻzbekyengilsanoat" (“Oʼzbekyengilsanoat”) faoliyatining asosiy vazifalari va yoʻnalishlari deb hisoblansin:

ichki va tashqi bozorlarning marketing tadqiqotlarini amalga oshirish, toʻqimachilik, trikotaj, tikuvchilik va chinni sanoati mollariga boʻlgan ehtiyojning oʻsishini oʻrganish hamda bashorat qilish;

respublika isteʼmol bozorining aholi oʻrtasida xaridorgir boʻlgan vatanimiz yengil sanoatining yuqori sifatli mollari bilan toʻldirilishini taʼminlash;

tarmoqning eksport salohiyatini mustahkamlash, kompaniya korxonalari tomonidan raqobatbardosh mollar ishlab chiqarilishini butun choralar bilan koʻpaytirish hamda ularning jahon bozorlariga kirib borishini tashkil qilish;

paxta tolasidan, boshqa mahalliy xomashyo va materiallar manbalaridan foydalanishni chuqurlashtirish hamda uning kompleksliligini oshirish, hozirgi vaqtda import boʻyicha olib kelinayotgan butlovchi buyumlar va yordamchi ashyolar ishlab chiqarishni oʻzlashtirish;

tarmoqda yagona texnika va investitsiya siyosatini oʻtkazish, toʻqimachilik, trikotaj va tikuvchilik sanoati korxonalarining kooperatsiyalashuviga, ishlab chiqarishni respublikaning aholi zich yashaydigan tumanlarida mahalliylashtirishga koʻmaklashish;

zamonaviy texnologiyalarni joriy etish, yangi buyumlar ishlab chiqarishni oʻzlashtirish, tarmoq korxonalarini yangilash va texnika bilan qayta qurollantirish uchun toʻgʻridan toʻgʻrixorijiy sarmoyalarni keng jalb etish;

bozor islohotlarini oʻtkazishda, kadrlar tayyorlash va ularning malakasini oshirishni tashkil etishda kompaniya korxonalariga yordam koʻrsatish.

3. “Oʻzbekiston SSR Engil sanoat vazirligi negizida Oʻzbekiston yengil sanoat mollari ishlab chiqarish davlat uyushmasi ("Oʻzbekyengilsanoat")ni tashkil etish toʻgʻrisida” Oʻzbekiston Respublikasi Prezidentining 1991-yil 6-maydagi PF-202-son Farmoni oʻz kuchini yoʻqotgan deb hisoblansin.

4. Oʻzbekiston Respublikasi Vazirlar Mahkamasi oʻn kun muddatda ushbu Farmonni ijro etish yuzasidan qaror qabul qilsin.

Oʻzbekiston Respublikasi Prezidenti I. KARIMOV

Toshkent sh.,

2002-yil 1-iyul,

PF-3102-son