Oʻzbekiston Respublikasi davlat budjetining 2009-yil toʻqqiz oyidagi ijrosi yakunlari toʻgʻrisida (1096-I-son)

18.11.2009

Oʻzbekiston Respublikasi Oliy Majlisi Qonunchilik palatasining

Qarori

Oʻzbekiston Respublikasi Vazirlar Mahkamasi tomonidan taqdim etilgan Oʻzbekiston Respublikasi Davlat budjetining 2009-yil toʻqqiz oyidagi ijrosi yakunlari toʻgʻrisidagi hisobotni koʻrib chiqib, Oʻzbekiston Respublikasi Oliy Majlisining Qonunchilik palatasi qaror qiladi :

1. Oʻzbekiston Respublikasi Davlat budjetining 2009-yil toʻqqiz oyidagi ijrosi yakunlari toʻgʻrisidagi hisobot tasdiqlansin.

Hisobot davrida Davlat budjeti yalpi ichki mahsulotga nisbatan 0,2 foiz miqdorda profitsit bilan ijro etilganligi maʼlumot uchun qabul qilinsin.

2. Oʻzbekiston Respublikasi Vazirlar Mahkamasi iqtisodiyotning eng muhim tarmoqlarida zamonaviy diversifikatsiya qilingan iqtisodiyotni shakllantirishga qaratilgan tuzilmaviy oʻzgarishlar, modernizatsiyalash, texnik va texnologik jihatdan yangilash amalga oshirilishini taʼminlasin. Qatʼiy va aniq maqsadga yoʻnaltirilgan pul-kredit siyosati oʻtkazilishini, soliq tushumi mexanizmi takomillashtirilishini, Davlat budjeti xarajatlari samaradorligi oshirilishi va uning ijtimoiy yoʻnaltirilganligi kuchaytirilishini davom ettirsin. Bunda “Qishloq taraqqiyoti va farovonligi yili” Davlat dasturini amalga oshirish davom ettirilishiga alohida eʼtibor qaratsin.

3. Qoraqalpogʻiston Respublikasi Vazirlar Kengashining, viloyatlar va Toshkent shahar hokimliklarining eʼtibori budjet intizomiga rioya etilishi ustidan nazoratni kuchaytirish, budjetga soliqlar va boshqa majburiy toʻlovlarning toʻliq tushishini, mintaqalarning moliyaviy salohiyatini kengaytirish yuzasidan taʼsirchan choralar koʻrish va shu asosda mahalliy budjetlar xarajatlarini moliyalashtirishni taʼminlash zarurligiga qaratilsin.

4. Ushbu Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri D. TOSHMUHAMEDOVA

Toshkent sh.,

2009-yil 18-noyabr,

1096-I-son