Alkogolli mahsulotlar uchun eng kam ulgurji-sotish va chakana narxlarni joriy etish toʻgʻrisida (327-son)

23.12.2009

Oʻzbekiston Respublikasi Vazirlar Mahkamasining

qarori

Alkogolli mahsulotlarni noqonuniy ishlab chiqarish va sotishga yoʻl qoʻymaslik yuzasidan nazoratni yanada kuchaytirish maqsadida Vazirlar Mahkamasi qaror qiladi:

1. 2010-yil 1-yanvardan boshlab alkogolli mahsulotlar (pivodan tashqari) uchun ularning 1-ilovaga muvofiq narxlardan past narxlarda sotilishi mumkin boʻlmagan eng kam ulgurji-sotish va chakana narxlar joriy etilsin.

2. Belgilab qoʻyilsinki:

alkogolli mahsulotlar (pivodan tashqari) uchun eng kam ulgurji-sotish va chakana narxlar, mahsulotlarni sotish narxlari va hajmi oʻzgarishidan kelib chiqqan holda, Oʻzbekiston Respublikasi Vazirlar Mahkamasi bilan kelishib Oʻzbekiston Respublikasi Moliya vazirligi va Davlat soliq qoʻmitasi tomonidan qayta koʻrib chiqilishi mumkin;

alkogolli mahsulotlarni qonun hujjatlarida belgilangan eng kam ulgurji-sotish va chakana narxlardan past narxlarda sotish holatlari aniqlangan taqdirda alkogolli mahsulotlar ishlab chiqaruvchi korxonalarga va chakana savdo korxonalariga nisbatan tegishli jarima sanksiyalari qoʻllanadi, aybdor shaxslar esa belgilangan tartibda javobgarlikka tortiladi.

3. “Oʻzvinosanoat-xolding” xolding kompaniyasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda:

alkogolli mahsulotlar uchun eng kam ulgurji-sotish va chakana narxlar boʻyicha belgilangan talablarga 2010-yil 1-yanvardan boshlab rioya etilishini taʼminlash yuzasidan kompleks chora-tadbirlar koʻrsin;

ishlab chiqaruvchi korxonalarga va chakana savdo korxonalariga 2010-yil 1-yanvardan boshlab alkogolli mahsulotlar uchun eng kam ulgurji-sotish va chakana narxlar joriy etilishi toʻgʻrisida oʻn kun muddatda maʼlum qilsin;

alkogolli mahsulotlar uchun eng kam ulgurji-sotish va chakana narxlar joriy etilishi toʻgʻrisida ommaviy axborot vositalari orqali tushuntirish ishlarini amalga oshirsin.

4. Oʻzbekiston Respublikasi Moliya vazirligi, Davlat soliq qoʻmitasi, Monopoliyaga qarshi kurashish qoʻmitasi 2010-yil 1-yanvardan boshlab, belgilangan tartibda monitoring va tekshirishlarni amalga oshirishda alkogolli mahsulotlarning belgilangan eng kam ulgurji-sotish va chakana narxlardan past narxlarda sotilishi hollarini aniqlash va bartaraf etish chora-tadbirlarini koʻrsinlar.

5. 2010-yil 1-yanvardan boshlab Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimchalar kiritilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirning birinchi oʻrinbosari R.S. Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2009-yil 23-dekabr,

327-son

Vazirlar Mahkamasining 2009-yil 23-dekabrdagi 327-son qaroriga 1-ILOVA

Alkogolli mahsulotlar (pivodan tashqari) uchun eng kam ulgurji-sotish va chakana narxlar

Vazirlar Mahkamasining 2009-yil 23-dekabrdagi 327-son qaroriga 2-ILOVA

Oʻzbekiston Respublikasi Hukumatining ayrim qarorlariga 2010-yil 1-yanvardan boshlab kiritilayotgan oʻzgartirish va qoʻshimchalar

2. Vazirlar Mahkamasining 2003-yil 13-fevraldagi 75-son qarori (Oʻzbekiston Respublikasi QT, 2003-y., 2-son, 15-modda) bilan tasdiqlangan Oʻzbekiston Respublikasida chakana savdo qoidalari 60-bandiga quyidagi mazmundagi xatboshi qoʻshilsin:

“qonun hujjatlarida belgilangan eng kam chakana narxdan past narxlar boʻyicha”.