“Aloqa Deu” Oʻzbekiston-Koreya qoʻshma korxonasi faoliyati toʻgʻrisida (294-son)
09.06.1999
Oʻzbekiston Respublikasi Vazirlar Mahkamasining
qarori
Oʻzbekiston pochta va telekommunikatsiyalar agentligi va “DEU Telekom” kompaniyasi tomonidan tashkil etilgan aloqa asbob-uskunalari va texnikasini ishlab chiqarish boʻyicha “Aloqa DEU” Oʻzbekiston—Janubiy Koreya qoʻshma korxonasining moliyaviy-iqtisodiy ahvolini barqarorlashtirish, korxona qarzlarini kamaytirish va uni moliyaviy sogʻlomlashtirish maqsadida Vazirlar Mahkamasi qaror qiladi:
1. “Aloqa DEU” qoʻshma korxonasining janubiy koreyalik sherigi “DEU Telekom” kompaniyasining 16327,4 ming AQSh dollari miqdoridagi ilgari olib kelingan butlovchi buyumlarni, “Aloqa DEU” qoʻshma korxonasining “DEU Telekom” kompaniyasi oldidagi koʻrsatib oʻtilgan summadagi qarzini oʻzaro hisobga olish shartlarida tegishli kontrakt tuzgan holda qaytarib olib ketishi toʻgʻrisidagi taklifi maʼlumot uchun qabul qilinsin.
2. Belgilansinki:
olib chiqib ketiladigan asbob-uskunalar uchun bojxona toʻlovlari undirilmaydi, bojxona rasmiylashtiruvi uchun yigʻimlar bundan mustasno;
mazkur kontrakt boʻyicha valyuta tushumining bir qismi majburiy sotilmaydi.
3. Oʻzbekiston Respublikasi Davlat bojxona qoʻmitasi:
“Aloqa DEU” qoʻshma korxonasiga mahsulotlarni Koreyaga ortib joʻnatish va 16327,4 ming AQSh dollari miqdoridagi asbob-uskunalar va butlovchi buyumlarni saqlash va joʻnatish boʻyicha bojxona tartibotlarini oʻz vaqtida rasmiylashtirishga koʻmaklashsin;
“DEU Telekom” kompaniyasiga mazkur kontrakt boʻyicha butlovchi buyumlarni “Aloqa DEU” qoʻshma korxonasi hududida (Urganch shahri) uchinchi shaxslarga sotgungacha saqlash uchun imkon yaratib bersin.
4. Oʻzbekiston pochta va telekommunikatsiyalar agentligi “DEU Telekom” kompaniyasi va manfaatdor idoralar bilan birgalikda korxonani moliyaviy sogʻlomlashtirish va faoliyatini qayta ixtisoslashtirish, uning ishlab chiqarish quvvatlaridan foydalanish boʻyicha tadbirlarni ikki oy muddatda ishlab chiqsin.
5. Mazkur qarorning bajarilishini nazorat qilish Bosh vazir Oʻ.T. Sultonov zimmasiga yuklansin.
Vazirlar Mahkamasining Raisi I.KARIMOV
Toshkent sh.,
1999-yil 9-iyun,
294-son