Boshoqli don ekinlarini navlar boʻyicha joylashtirishni takomillashtirish, ularning seleksiyasi va urugʻchiligini yaxshilashga doir qoʻshimcha chora-tadbirlar toʻgʻrisida (317-son)

28.06.1999

Oʻzbekiston Respublikasi Vazirlar Mahkamasining

qarori

Respublika xoʻjaliklarida boshoqli don ekinlarining yuqori hosilli, kasalliklarga va zararkunandalarga chidamli istiqbolli navlarini oqilona joylashtirishni, mintaqalarning tuproq-iqlim sharoitlarini hisobga olgan holda boshoqli don ekinlari navlarini yangilash va ularni navlar boʻyicha joylashtirishning har yilgi dasturlari oʻz vaqtda ishlab chiqilishi va amalga oshirilishini taʼminlash maqsadida Vazirlar Mahkamasi qaror qiladi:

1. Boshoqli don ekinlari navlarini yangilash va ularni navlarga koʻra joylashtirish dasturini ishlab chiqish va amalga oshirish boʻyicha ilovaga muvofiq tarkibda doimiy ishlovchi respublika komissiyasi tashkil etilsin.

2. Quyidagilar komissiyaning asosiy vazifalari etib belgilansin:

boshoqli don ekinlari urugʻchiligini yaxshilashga doir takliflarni oʻrganish va ishlab chiqish, ularni respublika mintaqalarining tuproq-iqlim sharoitlariga muvofiq navlar boʻyicha rayonlashtirish va joylashtirish asoslanganligini tahlil qilish;

har bir mintaqada koʻpi bilan 3-4 xil yuqori hosilli, yotib qolmaydigan, kasalliklar va zararkunandalarga chidamli navlar ekilishini nazarda tutgan holda boshoqli don ekinlari navlarini respublikaning turli iqlimli hududlarida yetishtirish uchun tanlash;

respublikaning turli mintaqalariga tatbiqan yangi serhosil va kasalliklarga chidamli navlarni jadal yaratish va ularni ishlab chiqarishga joriy qilish maqsadida boshoqli don ekinlariga doir seleksiya-urugʻchilik ishlarini olib borishning zamonaviy texnologiyalari va yoʻnalishlarini izlab topish hamda joriy etish;

respublikaning janubiy mintaqalari, ayniqsa choʻl va yarimchoʻl mintaqalari uchun navli urugʻlar yetishtirish chora-tadbirlarini ishlab chiqish va amalga oshirish;

ilmiy-tadqiqot institutlari, tajriba stansiyalari, idoraviy boʻysunishidan qatʼi nazar, nav sinash uchastkalarining faoliyatini tahlil qilish, seleksionyerlar va urugʻshunoslarni ragʻbatlantirish yuzasidan takliflar tayyorlash;

elita, birinchi va keyingi reproduksiyali urugʻlikka boʻlgan ehtiyojni, shu jumladan lalmi zona uchun, ularni don mahsulotlari korxonalari, xoʻjaliklar tomonidan ishlab chiqarish va tayyorlash hajmini aniqlash;

navlarning hosildorligini va boshqa sifat koʻrsatkichlarini koʻrsatgan holda boshoqli don ekinlarini navlar boʻyicha joylashtirish va navlar sinovi natijalari boʻyicha axborot-tahlil materiallarini vaqti-vaqti bilan nashr etish va joylarga yetkazish.

3. Doimiy ishlovchi respublika komissiyasi Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda:

urugʻchilik xoʻjaliklari faoliyati samaradorligini oʻrgansinlar, zaruriyat boʻlganda ularning soni va joylashishini don ekuvchi xoʻjaliklarning yuqori sifatli urugʻliklarga boʻlgan ehtiyojini toʻliq qondirishdan kelib chiqib qayta koʻrib chiqsin;

boshoqli ekinlar urugʻligi tayyorlab qoʻyilayotgan don mahsulotlari korxonalari ishini tahlil qilsin, ularni urugʻlik material tayyorlash, ularga ishlov berish, ularni tozalash, navlarga ajratish, dorilash va saqlashga ixtisoslashtirish masalalarini koʻrib chiqsin, bunda “Oʻzdonmahsulot” korporatsiyasi tizimida respublikaning janubiy mintaqalarining tabiiy-iqlim sharoitlarini hisobga olgan holda ular uchun boshoqli don ekinlari urugʻligi tayyorlash korxonasi tashkil etishni nazarda tutsin.

4. Oʻzbekiston Respublikasi Qishloq va suv xoʻjaligi vazirligi, Oʻzbekiston Qishloq xoʻjaligi ilmiy-ishlab chiqarish markazi, Davlat kimyo komissiyasi boshoqli don ekinlari hosilini kasalliklar va zararkunandalardan himoya qilish yuzasidan tavsiyalarni bir oy muddatda ishlab chiqsinlar, ularda urugʻlikni tayyorlab qoʻyish, ularga ishlov berish va dalalarni tayyorlashda, shuningdek boshoqli don ekinlari oʻsishi davrida ekinlarni kasalliklar, zararkunandalar va begona oʻtlardan agrotexnik va agrokimyoviy himoya qilish chora-tadbirlarini belgilasinlar hamda doimiy ishlovchi respublika komissiyasiga tasdiqlash uchun kiritsinlar.

5. Doimiy ishlovchi respublika komissiyasi har yili boshoqli don ekinlari hosili yigʻishtirib olingandan keyin 1-avgustgacha respublikaning barcha tumanlari va viloyatlari sharoitida rayonlashtiriladigan boshoqli don ekinlarining yangi navlari sinovi natijalarini keng muhokama qilsin. Boshoqli don ekinlari navlarini sinash yakunlari Oʻzbekiston Respublikasi Qishloq va suv xoʻjaligi vazirligining maxsus yillik “Axborotnoma” jurnalida eʼlon qilinsin.

6. Belgilansinki, Doimiy ishlovchi respublika komissiyasi har yili kelgusi yil hosili uchun boshoqli don ekinlarini navlar boʻyicha joylashtirish masalalari yuzasidan Hukumat qarorlari loyihalarini ishlab chiqadi.

Komissiyaning oʻz vakolatiga kiruvchi masalalar boʻyicha topshiriqlari respublikaning barcha vazirliklari va idoralari tomonidan bajarilishi majburiydir.

7. Respublika komissiyasi 2000-yil hosili uchun boshoqli don ekinlarini navlar boʻyicha joylashtirish yuzasidan Vazirlar Mahkamasi qarori loyihasini bir oy muddatda kiritsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Doimiy ishlovchi komissiya raisi B. Olimjonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1999-yil 28-iyun,

317-son